Советот на Општина Ѓорче Петров донесе одлука за доделување субвенции на жителите за набавка на нови велосипеди и енергетски ефикасни уреди за затоплување во 2025 година.

За првпат, општината издвојува средства во износ од 500.000 денари за субвенционирање на дел од трошоците за купен велосипед, во висина до 3.000 денари по лице.

Истовремено, обезбедени се и 1.000.000 денари за субвенционирање на трошоци за набавка на клима уреди и топлотни пумпи, со цел замена на постоечките нееколошки уреди на јаглен, дрва или мазут.

Граѓаните може да добијат: до 15.000 денари за клима уред и до 21.000 денари за топлотна пумпа согласно утврдените критериуми.

„Со овие мерки покажуваме дека општината активно се вклучува во поддршка на граѓаните и заштита на животната средина. Ги поттикнуваме одржливите форми на транспорт и овозможуваме премин кон почисти и побезбедни енергетски решенија. Секоја инвестиција што значи подобар квалитет на живот за нашите сограѓани е вредност за која вреди да се бориме,“ – изјави Александар Стојкоски, градоначалник на Општина Ѓорче Петров.

Право на користење имаат сите жители на Општина Ѓорче Петров кои ќе ги исполнат условите од јавниот повик.

Јавниот повик ќе биде објавен наскоро. Се повикуваат сите заинтересирани граѓани да аплицираат навремено.

Уставниот суд денеска ја укина одлуката за давање одобрение за основање на приватното средно училиште „Медресеја Иса Беу“ во село Кондово, Скопје, која е донесена од страна на Владата на 26 март 2024 година.

„Судот оцени дека одлука на Владата е незаконита и неуставна бидејќи Владата дала согласност, односно дозволила Исламската верска заедница (ИВЗ) да биде основач на средно училиште – гимназија“, соопштија од Судот.

Од таму наведуваат дека ова е во спротивност со членот 7 од Законот за средното образование, кој забранува верско организирање и дејствување и истакнување верски симболи во средните училишта.

„Исто така, содржината на одлуката не е во согласност со Амандманот VII од Уставот, според кој верските заедници може да основаат само верски училишта во кои се предава веронаука, односно се проповеда и изучува конкретна религија. Судот ги прифати како основани наводите во иницијативата дека со донесувањето на оспорената одлука Владата ја повредила уставната одредба за одвоеност на државата од верските прашања“, соопштија од Уставниот суд.

Синоќа се одржа седница на Централниот одбор на СДСМ на која се дискутираше за повеќе теми поврзани со актуелната политичко-економска ситуација во земјата, беа донесени неколку заклучоци но и одлуки за подготовките на партијата за претстојните локални избори.

Од денес, 30.04.2025 година, започнува постапката за утврдување на кандидатите на СДСМ за советници и градоначалници на претстојните локални избори.

„Преку отворена, инклузивна, транспарентна и демократска внатрепартиска постапка, СДСМ заедно со своето членство ќе ги избере најдобрите кандидати за локалните избори. Целта е СДСМ да биде претставена од способни и кредибилни личности, кои уживаат доверба и во својата околина, и меѓу сопартијците, но и од граѓаните кои живеат во општините. Луѓе кои можат да испорачаат резултати и имаат капацитет да ја спроведат програмата со која партијата ќе настапи пред граѓаните“, велат од СДСМ.

Исто така, Централниот одбор го овласти претседателот на партијата, Венко Филипче, да оствари разговори со постојните коалициски партнери на СДСМ, како и со потенцијални нови коалициски сојузници за настап на локалните избори.

„Централниот одбор на СДСМ оцени дека непосредно пред локалните избори, иституциите под контрола на власта, координирано вршат притисок врз градоначалниците од редовите СДСМ. Тоа го сметаме за тенденциозен политички притисок и претставува злоупотреба на државните институции во партиски цели од страна на ДПМНЕ. СДСМ со сите механизми кои ги има на располагање ќе го штити интегритетот на нашите градоначалници и ќе ги брани демократските стандарди и приници“, велат од партијата.

Пратеничката група на СДСМ подготвува и специјален закон за обезбедување конкретна и директна поддршка за семејствата погодени од трагедијата во Кочани. Законот ќе биде поднесен во Собранието во текот на следната недела. Тој е изготвен според меѓународни искуства и добри практики од земји кои се соочиле со слични несреќи.

„Со законот се предвидува финансиска и институционална помош за семејствата на настраданите, како и дополнителна поддршка за оние кои имаат повредени блиски. Целта е да се помогне во надминување на последиците и трошоците што произлегуваат од трагичниот настан, но и да се зајакнат институционалните системи што се покажаа како недоволно подготвени“, велат од партијата.

Од таму велат дека остро се спротивставуваат и го осудуваат секој обид за политичка злоупотреба.

„За време на средбата со родителите пратениците на СДСМ забележаа членови на подмладокот на политичката партија Левица, доколку се приклучиле со цел да извлечат политичка и партиска корист најостро ги осудуваме“, велат од партијата.