Граѓаните во нашата земја десет години сакаа промена на политичкиот амбиент и ако ДУИ пред десет години беше опозиција, ќе го имавме резултатот кој сега го имаме на локалните избори. Вака актуелниот министер за здравство од коалицијата Вреди гледа на изборните резултати, а на прашањето дали ќе остане министер одговара дека секој ден работи како да не му е грижа на која позиција ќе биде утре оти верува во својата експертиза.

„Резултатите се видливи, но за жал видливи се после десет години. Граѓаните во нашата држава и пред десет години сакаа да има промена во политичкиот амбиент во државата. За жал беа искористени сите можни политички притисоци и администрација од страна на ДУИ за да може да опстои десет години без желба на граѓаните. Тие првпат се соочија со локални избори од позиција на опозиција и ги немаа тие можности да се злоупотреби тој политички момент. Реалноста ова фактички што го гледаме денеска, сите општини во државата се менаџираат од стручњаци од Вреди, верувам дека би била не денеска, ако се вратиме десет години и ако ДУИ била во опозиција тогаш, истиот резултат ќе го имавме и тогаш. За жал тоа е тоа, после десет години имаме нов амбиент во државата“, рече министерот Алиу денес при посетата на Клиниката за кардиологија.

Како владин коалиционер, министерот Алиу уверува дека фокусот на Вреди е постигнување добри резултати оти брзо се доаѓа до процеси во кои граѓаните ако не ги почувствуваат промените ќе се почувствуваат разочарани.

„Тогаш разочараноста ќе биде многу поголема. Ние како политичари ќе имаме голема одговорност ако навистина после ваков добар резултат, после вакви избори, граѓаните не почувствуваат дека ние знаеме различно да менаџираме со политичките процеси и на локални ниво. На централно ниво тоа веќе го докажавме за година и пол. Верувам дека и на локално ниво за година и пол ќе се почувствуваат тие инфраструктурни подобрувања“, рече министерот Алиу.

Алиу стана министер за здравство пред половина година откога поранешниот министер за здравство Арбен Таравари ја напушти коалицијата Вреди по низа несогласувања околу настапот на локалните избори.

Македонија направи вистински избор на локалните избори, граѓаните ги препознаа чесните и искрените намери на ВМРО-ДПМНЕ да ја изгради државата повторно од темелите на промените, истакна на денешната прес-конференција Валентин Манасиевски, член на ЦК на ВМРО-ДПМНЕ.

„Освојувајќи 54 општини на територија на Република Македонија и градот Скопје, ВМРО-ДПМНЕ е апсолутен победник на овие локални избори. Историски промени и победи имаме во Кичево, Карпош и Струмица, издвојувавме големи победи и во Валандово, Дојран, Брвеница, Берово, Делчево, Демир Капија и Крушево, Пробиштип, Росоман, Старо Нагоричане и Чучер Сандево. Во останатите општини кандидатите на ВМРО-ДПМНЕ убедливо победија, а победа имаме и на Орце Ѓорѓиевски во градот Скопје.

СДС на овие избори доживеа огромен дебакл. Освојувајќи само 6 општини, околу 126 илјади гласови и околу 230 советника, СДС е трета партија во државата позади нашиот владин коалициски партнер, партијата ВРЕДИ. СДС на ова ниво, никогаш не биле“.

Граѓаните, вели тој, јасно кажале дека се против политиките на Филипче и неговиот ментор Заев, ко, според него, сеуште ги држи конците во СДС.

„Наместо да се оградат и дистанцираат од Зоран Заев, Филипче и раководството на СДС, продолжуваат да го величат ликот и делото на Зоран Заев, човекот кој ја распродаде и уништи Македонија.

Потребни се итни промени во раководството на СДС. На Македонија и на ВМРО-ДПМНЕ им е потребна силна опозиција. Потребен ни е коректор на политиките, луѓе со кредибилитет и аргументирана критика. Филипче и СДС во моментов се во политички нокдаун, и време е Филипче да си замине од СДС и од политикат“.

На Македонија и е потребна вистинска опозиција, посочи Манасиевски.

„ВМРО-ДПМНЕ оствари историска победа на овие локални избори, освојувајќи 54 општини плус градот Скопје. Владината коалиција покажа дека е стабилна и легитимна, обезбедувајќи вкупно 66 општини од 81, што претставува доверба од граѓаните за нов почеток и вистински промени“, велат од ВМРО-ДПМНЕ.

„Симболиката на оваа победа најсилно се гледа во Кичево, каде кандидатот на ВМРО-ДПМНЕ, доби поддршка од сите етнички заедници, и е слика на заедништво во град кој со години беше бастион на ДУИ. Токму во Кичево, обединувањето на граѓаните стана симбол на отпорот против корупцијата и партиската злоупотреба,

Во Брвеница, Јовица Илиевски победи и покрај нечесната кампања на противкандидатот. Во Карпош, новиот градоначалник е Сотир Лукровски од ВМРО-ДПМНЕ, како и во Град Скопје каде довербата од граѓаните ја доби Орце Ѓорѓиевски од ВМРО-ДПМНЕ.

На овие избори, граѓаните јасно порачаа дека е време за промени, за нови лица и нова енергија што ќе ја води државата напред во следните четири години. Народот реши да стави крај на неправдите и да ја довери својата иднина на луѓе што ќе работат чесно и посветено за нивното добро.

Промени се случија и во Валандово, Дојран, Дебарца, Демир Капија, Крушево, Пробиштип, Росоман и Чучер Сандево, каде што новите градоначалници од редовите на ВМРО-ДПМНЕ ќе ја предводат локалната власт. Вториот изборен круг само ја запечати сликата, ВМРО-ДПМНЕ потврди победа и во Аеродром, Виница, Конче, Неготино, Лозово, Македонски Брод, Могила, Ранковце и Чешиново-Облешево.

Со овие резултати, опозицијата е длабоко поразена. СДС и ДУИ мора сериозно да се консолидираат и реформираат. Потребна е конструктивна опозиција, заснована на аргументи и поддршка за реформи, а не на деструктивни политики и пракси како во времето на СДС и ДУИ.

Во СДС, неколкуте оставки не се доволни кога проблемот лежи во лидерството на Венко Филипче, човек кој беше дел од најкриминалната и најкорумпираната власт во поновата историја на Македонија. Додека тој ја води партијата, СДС ќе остане на дното, а овие избори се доказ дека граѓаните го испратија во историјата.

ВМРО-ДПМНЕ покажува дека има слух за сите граѓани, дури и за оние кои одлучија да не ја дадат својата поддршка никому. Новото раководство ќе работи на тоа да ја заслужи нивната доверба преку вистински промени, конкретни реформи и подобрување на животниот стандард.

Затоа што граѓаните заслужуваат повеќе, заслужуваат власт која ќе се бори за нив, а не против нив“, се додава во соопштението на ВМРО-ДПМНЕ.