Општина Центар и ова лето обезбедува згрижување на деца од прво до трето одделение (до 10 години) во детските градинки на подрачјето на локалната самоуправа. Во моментот се згрижени над 100 деца во седум клонови на градинките „13 Ноември“, „Кочо Рацин“ и „Раде Јовчевски Корчагин“.

За упис потребни се апликација, доказ за вакцинален статус и фотокопија од лична карта како потврда дека детето е жител на Општина Центар.

„Наш приоритет е секое дете да добие квалитетна грижа, а родителите да имаат поддршка во текот на летото. Заради зголемениот интерес од страна на родителите, ја проширивме листата на објекти во кои се згрижуваат деца“, посочи градоначалникот на Општина Центар, Горан Герасимовски.

Децата се примаат во седумте клонови: ЈУДГОЦ „Раде Јовчевски Корчагин“ – клон Пинокио, ЈУДГОЦ „Кочо Рацин“ – Матичен, Бели Мугри и Наум Наумовски Борче, како и ЈУДГОЦ „13 Ноември“ – Матичен, Беко и Парк.

Поради големиот интерес, капацитетите на градинките се речиси исполнети, а останати се уште малку слободни места.

„Во текот на летниот период, Општина Центар континуирано им излегува во пресрет на родителите со работни обврски, згрижувајќи ги повозрасните деца во градинките, каде што можат да се дружат и да се социјализираат, квалитетно поминувајќи го своето време“, трчр Герасимовски.

По децении празни ветувања, одложувања и манипулации, вчера беше историски ден за еднаквоста и правдата во Северна Македонија. Владата го усвои Законот за правична и соодветна застапеност, фундаментален акт што гарантира уставното спроведување на принципот на правична застапеност во државните институции, велат од коалицијата Влен.

Според нив, овој закон претставува конкретен и обврзувачки чекор кој за прв пат воспоставува јасна и извршителна нормативна основа за уставниот принцип на соодветна застапеност.

„Преку овој закон се создава извршниот механизам кој ќе го надгледува и обезбедува ефикасното и одговорно спроведување на принципот на застапеност. За само една година владеење, го постигнавме она што не беше реализирано 24 години по Охридскиот рамковен договор. Создадовме силна основа за унапредување на застапеноста во вистинскиот пат, пат кон еднаквост, достоинство и правда за сите заедници. Оние кои се против овој закон се истите оние кои со текот на годините ја деградираа застапеноста и ги оставија граѓаните жртва на манипулации и неправда. Ова не е само политичко прашање, туку одговорност кон иднината на државата и нејзините граѓани. Убедени сме дека граѓаните ќе ја ценат оваа промена и ќе застанат зад законот што носи еднаквост и достоинство за сите“, велат од Влен.

Кривичниот суд пресуди доживотен затвор за Љупчо Палевски, Боре Видевски, Велибор Манев, Влатко Кешишов за грабнување и за убиството  на 14-годишната Вања Ѓорчевска и 74-годишниот Панче Жежовски, случај што ја потресе целата јавност. Таткото на Вања, Александар Ѓорчевски е ослободен од обвинение.

Судењето против Љупчо Палевски, Боре Видевски, Велибор Манев, Влатко Кешишов, како и таткото на Вања, Александар Ѓорчевски, траеше десет месеци. Основното јавно обвинителство побара максимална казна доживотен затвор за Палевски, Кешишев, Видевски и Манев, а за таткото на Вања, кој е обвинет за помагање, побара судот да му ја одреди соодветната затворска казна.

Според обвинението, тие заедно испланирале грабнување на 14-годишното девојче Вања Ѓорчевска со цел да присилат член на нејзиното потесно семејство да даде парични средства за откуп.

На 22.11.2023 година, првообвинетиот Палевски, заедно со уште тројца претходно обвинети, заеднички извршиле грабнување на Панче Жежовски во Велес, со намера да го присилат да им го даде сопственото возило „цитроен“ за да го користат за грабнување на девојчето во Скопје.

Обвинетите отишле до куќата на оштетениот, физички го совладале и го врзале, а потоа го ставиле во багажникот и се упатиле до местото наречено Рудник во околината на Велес, каде што од користољубие и на свиреп начин, со умисла го лишиле од живот со огнено оружје – пиштол во калибар од 9 милиметри.

На 27.11.2023, обвинетите, помогнати од обвинет родител, извршиле грабнување на девојчето во влезот од зграда на улицата Наум Наумовски-Борче во Скопје. Ја врзале и ја однеле во близина на местото наречено Дупки, во атарот на селото Бразда, па таму на свиреп начин со умисла го лишиле од живот малолетното лице.

Малолетната Вања и велешанецот Панче, кои беа пријавени за исчезнати на 27 и 24 ноември, беа пронајдени мртви во близина на Скопје и Велес на 3 декември 2023 година.