Свет
Прв телефонски разговор меѓу Путин и Бајден
Новиот американски претседател, Џо Бајден, денеска го одржал првиот телефонски разговор со својот руски колега, пренесе Белата куќа, додавајќи дека тој се соочил со претседателот Путин за низа прашања почнувајќи од неодамнешниот кибер-напад на американската компанија „Солар виндс“ до сомневањата за труење на водечкиот руски опозиционер Алексеј Навални.
„Владимир Путин му честита на Џозеф Бајден за почетокот на работата во својство на претседател на САД. Истакна дека нормализацијата на односите меѓу Русија и САД би била од интерес на двете земји и со оглед на нивната одговорност за одржување на безбедноста и стабилноста во светот тоа би било од интерес и на меѓународната заедница“, се вели во соопштението за разговорот што го објави Кремљ.
Прес-секретарката на Бајден, Џен Псаки, рече дека тој го почнал телефонскиот повик со намера да разговара за СТАРТ (договорот за ограничување на стратешкото нуклеарно вооружување), кој администрацијата на Бајден се надева дека ќе го продолжи, руската агресија во Украина, кибер-нападот на „Солар виндс“, чиј обем сè уште се утврдува, извештаите дека Русија давала награди за елиминација на американски војници што служат во Авганистан, мешањето на Москва во претседателските избори во САД и труењето на Алексеј Навални.
„Неговата намера беше да разјасни дека Соединетите Американски Држави ќе дејствуваат цврсто во одбрана на нашите национални интереси како одговор на малигните активности на Русија“, рече Псаки истакнувајќи дека повикот се случил за време на нејзиниот брифинг и дека поцелосно резиме ќе објави подоцна.
Според информациите од светските медиуми, кај двете страни има волја најбргу што може да ги завршат неопходните процедури за натамошно функционирање на договорот за заемно ограничување на ракетно-нуклеарните арсенали.
Договорот истекува на 5 февруари.
Повикот дошол на барање на Москва, соопштија американски дипломатски извори, кои додаваат дека Бајден сакал најпрвин да разговара со европските лидери и неговите советници пред да оствари телефонски разговор со Путин.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Борис Џонсон објавува мемоари во кои го напаѓа Макрон
Поранешниот британски премиер Борис Џонсон се пресметува со францускиот претседател Емануел Макрон во своите мемоари, чии делови беа објавени во „Дејли Мејл“.
На 10 октомври, поранешниот британски конзервативен лидер објавува мемоари во кои го раскажува своето искуство во политиката, особено времето во Даунинг стрит од 2019 до 2022 година, обележано со преговорите со Европската унија за Брегзит и Ковид-19.
„Иако Макрон е шармантен лично и иако честопати се согласувавме за важни прашања, тој навистина го мислеше тоа кога рече дека Велика Британија треба да биде казнета за Брегзит“, пишува Џонсон.
Тој опширно ги опишува неговите разговори со европските лидери како што се поранешната германска канцеларка Ангела Меркел и Емануел Макрон, на чив нагласок се потсмева кога зборуваат англиски.
„Во некои теми, се плашам дека тој навистина направи штета“, вели Џонсон за Макрон.
Тој лично го критикува францускиот претседател за неговиот став за прашањето со мигрантите кои илегално го преминуваат Ла Манш за да стигнат од Франција во Обединетото Кралство, што е многу чувствителна тема за британската страна.
Во жестокото обвинение, тој сугерира дека Макрон дури бил подготвен да ги затвори очите пред бандите кои тргуваат со луѓе за да им го влоши животот на Британците кои ја напуштиле ЕУ, пишува медиумот.
„Во најмала рака, ми се чинеше можно дека тој го користи проблемот и дискретно дозволуваше доволно голем број мигранти да го преминат „каналот“ за да ги излуди Британците и да го поткопа едно од најважните прашања на Брегзит – враќањето на контролата на нашите граници“, пишува Џонсон.
Откако го напушти Даунинг стрит во летото 2022 година, Џонсон повторно стана колумнист на таблоидот „Дејли Мејл“.
Свет
Песков: Русија ги осудува убиството на лидерот на Хезболах и нападите врз Либан
Русија ги осудува убиството на лидерот на Хезболах, Хасан Насрула, и израелскиот напад врз Либан и верува дека тоа доведе до значителна дестабилизација на регионот на Блискиот Исток, изјави денеска портпаролот на Кремљ, Дмитриј Песков.
„Руската страна ги осудува сличните акции. Сметаме дека тие доведоа до значително дестабилизација на ситуацијата во регионот“, рече Песков одговарајќи на новинарско прашање, пренесува „РИА новости“.
Песков изјави дека неселективното бомбардирање станбени области во Либан доведува до огромен број жртви, што ќе резултира со хуманитарната катастрофа што ја гледаме во Газа, пренесува „Танјуг“.
Од минатата недела израелските воздухопловни сили вршат масовни напади врз цели на Хезболах во Либан, пишува медиумот.
Израелски авиони извршија и неколку целни воздушни напади врз Бејрут, во кои беше убиен и лидерот на Хезболах, Хасан Насрала.
Свет
Објавено драматично видео од последиците од ураганот Хелен: „Ова е постапокалиптично“
Новите снимки откриваат огромни штети во Северна Каролина по ударот на ураганот Хелен, кој ја опустоши американската сојузна држава предизвикувајќи катастрофални поплави. Членот на градскиот совет на Шарлот, Тарик Бохари, сподели фотографија од езерото Луре преполно со отпадоци опишувајќи ја сцената како постапокалиптична.
Ураганот Хелен, кој на крајот на минатата недела ги опустоши југоисточните држави на САД, предизвика катастрофални поплави од Флорида до Вирџинија, огромни материјални штети и според последните податоци однесе најмалку 90 животи.
Жителите на југоисточните американски држави почнаа со санирање на штетите откако милиони луѓе останаа без струја, а беа уништени домови, патишта и мостови.
Најмалку 90 луѓе ги загубија животите во невремето, пресмета „Ројтерс“ врз основа на податоците на локалните власти во Јужна и Северна Каролина, Флорида, Џорџија, Вирџинија и Тенеси. Си-ен-ен, пак, јавува за вкупно 93 загинати лица.
Според последните податоци, најмногу луѓе, од кои 36, починале во Северна Каролина. Јужна Каролина пријавила 25 смртни случаи, Џорџија – 17, а Флорида – 11. Вирџинија пријавила два смртни случаја, како и Тенеси.
Се стравува дека бројот на загинати може да биде поголем. Осигурителните компании проценуваат дека штетата предизвикана од ураганот Хелен би можела да изнесува меѓу 15 и повеќе од 100 милијарди долари.