Свет
Американски научници: Мајките што имале Ковид-19 во бременоста им пренесуваат антитела на бебињата
Бремените жени што имаат Ковид-19 им пренесуваат антитела против оваа инфекција на своите деца, откриле истражувачи од Универзитетот во Пенсилванија. Студијата е објавена во списанието „ЈАМА педијатрија“.
Заштитата на новороденчињата од инфекција првенствено зависи од антителата што се пренесуваат од мајката на бебето преку плацентата. Ова исто така важи и за заштита од САРС-КоВ-2, сепак деталите за пренос на антитела во овој случај сè уште не се целосно разјаснети, пишува „Газета.ру“.
Истражувачите откриле дека колку порано идната мајка се зарази од коронавирусот во првите месеци од бременоста, толку е поголема концентрацијата на антитела во крвта на папочната врвца.
„Нашите резултати се во согласност со она што може да се очекува од студиите на други вируси“, рече професорот Скот Хенсли, еден од авторите на студијата.
Истражувачите следеле 1.714 жени што родиле помеѓу април и август 2020 година. 83 од нив имале Ковид-19, а кај 72 бебиња научниците откриле антитела во крвта на папочната врвца, без оглед дали мајката имала симптоми на инфекција или не. Кај речиси половина од децата нивото на антитела било исто или поголемо отколку кај мајката, а во една четвртина од случаите било од 1,5 до двапати повисоко.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Вонредна состојба во Еквадор поради нарко бандите: петмина загинати во нов вооружен напад
Пет лица се убиени вчера во Еквадор во нов вооружен напад во услови на вонредна состојба воведена поради зголеменото насилство од страна на бандите поврзани со шверц на дрога, соопшти полицијата.
„Полицијата пронашла четворица мртви и еден повреден, кој бил пренесен во болница, каде што починал поради сериозноста на повредите“, изјавила полицијата за Франс прес, прецизирајќи дека петмината мажи имаат прострелни рани.
Нападот се случил во градот Дуран, соседен пристанишен град Гвајакил и еден од центрите на насилство на бандите. Според полицијата, неколку лица во две возила излегле од автомобилот и отвориле оган.
Крајбрежната провинција Гвајас, каде што бандите за шверц на дрога водат немилосрдна војна, е една од шесте еквадорски провинции кои се во вонредна состојба од почетокот на јули по напливот на вооружени напади.
Свет
Авганистанец планирал терористички напад во САД на денот на изборите, имал посебна виза
27-годишен Авганистанец кој живее во Оклахома е уапсен под сомнение дека планирал терористички напад во име на Исламската држава на американска територија на денот на претседателските избори, 5 ноември, објавија американските правосудни власти.
Насир Ахмад Тавхеди го планирал нападот во име на Исламската држава, според обвинението. Инаку, тој живеел во Оклахома со сопругата и едногодишното дете откако влегол во САД во 2021 година со специјална имигрантска виза.
Тој беше корисник на специјална програма за имигрантска виза, која прима до 50 луѓе годишно, и е достапна за луѓе кои работеле со вооружените сили на САД или под раководство на шефот на мисијата како преведувачи во Ирак или Авганистан. .
Во обвинението не е наведено дали Тавхеди работел како преведувач во Авганистан. Според судските документи, американската федерална полиција со пристап до сметката на Гугл на Насир Ахмад Тавхеди забележала дека тој редовно се консултира со пропагандата на Исламската држава (ИД).
Тој бил во контакт преку пораки на Телеграма со лице идентификувано од федералната полиција како регрут на ИД. Со ова лице разговарал за неговите планови да набави оружје и да го врати своето семејство во Авганистан.
Тој беше уапсен во понеделникот со наводен соучесник, малолетниот брат на неговата сопруга, за време на таен состанок со федералните агенти за купување автомати и муниција, соопштија американските правосудни власти.
„Министерството за правда го попречи планот на обвинетиот да добие полуавтоматско оружје за да изврши насилен напад во име на ИСИС на американско тло на денот на изборите“, рече секретарот Мерик Гарланд во соопштението.
Тој е обвинет за обид да обезбеди материјална поддршка на ИСИС и набавка на огнено оружје за да изврши федерално злосторство или тероризам, по две точки кои носат максимална казна од 20 години и 15 години затвор, соопшти Министерството за правда.
Милитантната организација Исламска држава уби и егзекутира илјадници луѓе во име на своето екстремно религиозно толкување пред да биде територијално поразена во Ирак во 2017 година и Сирија во 2019 година.
Европа
Силен земјотрес ја погоди Романија
Во текот на ноќта на територијата на Романија е забележан силен земјотрес со јачина од 4,2 степени според Рихтеровата скала, објави ЕМСЦ.
Според податоците, земјотресот се случил синоќа околу 23 часот, а епицентарот бил блиску до Букурешт.
Меѓутоа, американскиот USGS наведува малку поинакви размери, па тврдат дека бил уште посилен – 4,4 степени според Рихтеровата скала.
Засега нема информации за евентуална штета или повредени.