Свет
Рига ќе ги казнува граѓаните за гледање нелегални прекугранични канали
Десетици илјади Летонци, кои зборуваат руски јазик, ќе мора да ја намалат јачината на звукот на телевизорот и да се чуваат од маалските кодоши откога стапи во сила новиот закон според кој гледачите на нелиценцирани сателитски телевизии ќе бидат казнети, дури и само за избирање на каналот, пренесува РТ.
Претходно овој месец, локалните медиуми објавија дека Сеимас, парламентот на оваа балтичка држава, го усвои нацрт-законот со кој ќе се криминализира гледањето неодобрени преноси.
Мрежите што ќе бидат засегнати со новиот закон вклучуваат десетици руски телевизиски канали, чиј сигнал може да се фати и преку границата. Повеќе од еден од тројца Летонци зборуваат руски дома, но на десетици радиодифузери кои прикажуваат програми на овој јазик им беа одземени лиценците и им беше забрането да емитуваат програма во земјата од почетокот на овој месец.
Иварс Аболинс, претседател на летонскиот Национален совет за електронски медиуми (НЕПЛП), издаде соопштение за забраната.
„Ние го заштитивме, го штитиме и ќе го штитиме нашиот информативен простор“, рече тој.
Регулаторите тврдат дека гостите во контактните емисии на каналите на руски јазик предизвикувале омраза и повикувале на војна во Европа.
Руската амбасада во Рига жестоко протестира на оваа одлука. Во објавата на својата фејсбук-страница таа рече дека овој закон е како од најдобрите традиции на диктатурата.
Потегот на Рига, наверојатно, е инспириран од фактот дека најголемата опозициска партија во земјата, Хармонија, е предводена од руски говорители и има блиски врски со левичарската руска групација „Фер Русија“. Хармонија освои 23 од 100 места во Сеимас на изборите во 2018 година.
„Повреда на слободата на говорот? Ова е само почеток на тоа“, додаде тој. „Очигледно среде слободен пазар летонските телевизиски канали не може да се натпреваруваат, дури и во информативниот простор на сопствената земја“.
Сега гледачите, најверојатно, ќе се соочат со финансиски казни ако бидат фатени како гледаат недозволени програми. Пратениците посочуваат дека 62.000 домаќинства се приклучени на нелегални сателитски преноси во 2018 година, последната година за која има податоци.
„Репортери без граници“ минатото лето објавија предупредување откако голем број балтички земји забранија неколку одделни канали на РТ. Оттаму рекоа дека иако е легитимно да се брани и да се промовира независно и сигурно информирање, овие забрани се злоупотреба на политиката на санкции на ЕУ.
„Наместо да се забрануваат медиуми на несигурна правна основа, земјите може да побараат од сите медиуми да ја гарантираат уредничката независност, а потоа може да воведат легитимни санкции ако се утврди дека медиумите не постапуваат во согласност со нивните обврски“, велат од „Репортери без граници“.
Украина исто така неодамна се најде на удар на руските и европските политичари за својата одлука да блокира и забрани серија канали на руски јазик, управувани и продуцирани од Украинци што зборуваат руски. Секој трет Украинец дома зборува на руски јазик како прв јазик, но Киев тврди дека каналите се пропаганда на Кремљ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Бајден ги нарече Индија и Јапонија „ксенофобични земји“: Не сакаат мигранти, а тие се она што не прави силни
Американскиот претседател Џозеф Бајден ги нарече Индија и Јапонија „ксенофобични земји“ затоа што не сакаат да примат мигранти.
Тој го рече ова за време на говорот на настанот за собирање средства за неговата изборна кампања, во средата навечер, на донаторска вечера пред публика составена претежно од Азиски Американци., пишуваат тамошните медиуми. Бајден рече дека претстојните избори во САД се за „слобода и демократија“ и дека економијата на земјата напредува поради нив и многу други, „бидејќи САД ги пречекуваат имигрантите“.
„Зошто Јапонија има економски проблеми? Зошто Индија? Затоа што се ксенофобични. Тие не сакаат мигранти, а тие се она што не прави силни, бидејќи имаме прилив на работници кои сакаат да бидат тука и сакаат да придонесат“, додаде американскиот претседател.
На овие зборови на Бајден досега не реагираа ниту јапонската ниту индиската влада.
Свет
Директорката на американското разузнавање: Русија напредува на бојното поле, но војната во Украина нема да заврши наскоро
Директорката на Националната разузнавачка служба на САД, Аврил Хејнс денеска оцени дека војната во Украина нема наскоро да заврши, а развојот на ситуацијата на домашен и меѓународен план е во корист на рускиот претседател Владимир Путин.
Хејнс пред Комитетот за вооружени служби на Сенатот изјави дека Русија ги интензивирала нападите врз украинската инфраструктура за да ја намали способноста на Киев да распоредува војници и оружје, да го забави военото производство и да ја принуди Украина да ги разгледа преговорите.
„Сè поагресивните тактики на Путин против Украина, како што се ударите врз енергетската инфраструктура на Украина, имаат за цел да создадат впечаток во Украина дека продолжувањето на борбата само ќе ја зголеми штетата за Украина и нема да понуди пат до победата“, рече Хејнс.
Говорејќи пред Комитетот за проценка на заканите на САД во 2024 година, таа рече дека „оваа агресивна тактика веројатно ќе продолжи“ и „војната нема да заврши наскоро“.
Хејнс изјави дека Русија напредува на бојното поле и дека нејзините сили наскоро би можеле да направат тактички пробив во Доњецк и Харков, пренесува Танјуг.
Регион
(Видео) Избрана е новата Влада на Србија
Собранието на Србија со 152 гласа ја изгласа новата Влада на премиерот Милош Вучевиќ. Два дена траеше расправата за составот на Владата и нејзиниот план за работа, при што опозицијата го оспори кредибилитетот на Вучевиќ, посочувајќи дека, како и досега, за секоја одлука ќе биде прашан претседателот на државата Александар Вучиќ.
Новата Влада на Србија брои 31 член, од кои една третина се нови имиња во споредба со претходната Влада на чело со Ана Брнабиќ.
Премиерот Вучевиќ претходно изјави дека длабоко верува во историскиот договор меѓу Србите и Бошњаците и рече дека сака добри односи и со Хрватите. Истовремено, тој рече дека нема да ги гради овие односи на штета на сопствените интереси и дека Србија нема да се откаже од традиционалните пријатели.
Посебно внимание предизвикаа двајцата министри кои се под санкции на САД: Александар Вулин ќе биде вицепремиер, а Ненад Поповиќ ќе биде министер без ресор.