Регион
Наставници од словенечко училиште развиле сериозни несакани ефекти по вакцинација со „Астразенека“
Во Основното училиште „Миха Пинтар Толедо“ во Велење, Словенија, кај голем број вакцинирани наставници се појавиле тешки несакани ефекти, а наставата беше откажана денес.
Поради болест на 26 наставници, откажан е целиот педагошки процес во училиштето, затоа што немаат доволно кадар да предаваат. Наставниците беа вакцинирани со вакцината на „Астразенека“.
„Еден од наставниците рече дека неговата реакција веќе стивнала и дека може да дојде на работа денес, но другите сè уште се чувствуваат лошо“, рече директорот на училиштето, Себастјан Куковец. Тој додаде дека наставниците генерално пријавиле висока температура (39 Целзиусови степени), вртоглавица и главоболка.
Како што вели, ќе продолжат со вакцинацијата.
„Мило ми е што повеќето од вработените решија да се вакцинираат“, рече Куковец.
Словенечкиот портал „24УР“ пишува дека во вторникот, вработените во основно училиште во Церкница биле вакцинирани со „Астразенека“. И таму, наводно, неколку наставници имале реакција по вакцинирањето, па затоа не дошле на работа во средата и четвртокот.
Синдикатот на вработените во образованието ги повика здравствените власти јавно и недвосмислено да се изјаснат за безбедноста на вакцината откако Данска, Норвешка, Италија и Исланд „од претпазливост“ ја прекинаа употребата на „Астразенека“ во четвртокот поради сомнение дека предизвикува згрутчување на крвта.
Министерот за здравство Јанез Поклукар за ПОП-ТВ изјави дека ги разбира сомневањата на наставниците, но дека тие треба да имаат доверба во медицинската професија.
Нема причина да се запре кампањата за вакцинација, рече Поклукар.
Тој додаде дека во Словенија не биле користена серијата на вакцини на „Астразенека“ за која се сомневале во Австрија поради несакани ефекти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Вучиќ му се заблагодарил на Путин за рускиот гас по поволни цени
Српскиот претседател Александар Вучиќ изјави дека имал „отворен, долг и содржаен“ телефонски разговор со својот руски колега Владимир Путин, со кого не се слушнале речиси две и пол години.
Вучиќ му се заблагодарил на Путин поради тоа што Русија и оваа сезона обезбедила гас за Србија по поволни цени.
Путин испратил честитки по повод 80-годишнината од ослободувањето на Белград, а Вучиќ се заблагодарил на единиците на советската Црвена армија, кои учествувале заедно со српските во ослободувањето на главниот град за време на Втората светска војна.
– Посебно му се заблагодарив на претседателот Путин за сѐ што направи за да има Србија и оваа зима доволно количество гас, по многу поволни цени – порача српскиот претседател на своите профили на социјалните платформи.
Вучиќ истакна дека „изразил надеж“ дека Србија нема да ѝ воведува санкции на Руската Федерација и изразил благодарност на поддршката од Русија во Обединетите нации за интегритетот и територијалниот суверенитет на Србија.
Регион
Претседателот на Хрватска изрази загриженост за можен израелски напад врз Иран
Хрватскиот претседател Зоран Милановиќ ја коментираше актуелната геополитичка ситуација, нагласувајќи дека евентуалниот израелски напад врз Иран може да има сериозни последици за светскиот мир и економијата.
– Се соочуваме со настани кои можат да имаат непроценливо влијание врз светскиот мир, поредок и глобалната економија, доколку израелската влада одлучи да го нападне Иран во следните две недели. Знаејќи ги нивните методи на работа и дејствување, тие би можеле да го направат тоа една недела пред американските избори и на тој начин да се обидат да го вовлечат светот во нов циклус на војна и да ни ја подигнат цената на нафтата на 300 долари. Тоа не се нереални работи, ова се случува пред наши очи – изјави Зоран Милановиќ.
Милановиќ ја коментираше и војната во Украина.
– За жал, војната во Украина е при крај и, за жал, единствениот начин на кој можеше да заврши, за што многу луѓе зборуваат две и пол години, но претпоставувам дека тоа денес се смета за русофобија или путинизам. Тоа е слепило, тоа е многу несериозно и опасно однесување – рече тој и испрати јасна порака: „Јас ќе ја чувам Хрватска од вакви конфликти и каде што не ни е местото и каде што не треба, нема да бидеме“.
Регион
Вучиќ и Путин денеска ќе имаат телефонски разговор
Претседателот на Србија, Александар Вучиќ, денеска телефонски ќе разговара со лидерот на Руската Федерација Владимир Путин, пренесуваат српските медиуми.
Двајцата државници ќе разменат мислења за сите актуелни теми, со посебен акцент на регионалните теми, како и за неповолната состојба во која се наоѓа српскиот народ на Косово и Метохија.
Завчера првиот човек на Русија упати срдечна честитка до својот српски колега по повод 80-годишнината од ослободувањето на Белград во Втората светска војна. Во таа прилика потсети дека Русите и Србите заедно се бореле против непријателот, а истакнал и дека е задоволен од односот на српските власти кон загинатите херои од Црвената армија.
Претседателот на Србија, Александар Вучиќ доби покана за учество на Самитот на БРИКС што се одржува во Казан на 23 и 24 октомври. Вучиќ изјави дека наскоро ќе донесе одлука за заминување на Самитот.