Свет
Лидерот на Хутите го предупреди Иран да не престанува со збогатувањето ураниум
Лидерот на јеменските бунтовници Хути, Мухамед Али Ал-Хути, го повика Иран да не го запира збогатувањето ураниум пред страните во нуклеарниот договор од 2015 година да се вратат на договорот.
„Ако Иран прифати да престане со збогатувањето ураниум пред другите страни да го спроведат договорот, тој ќе ја повтори грешката од претходниот договор кој не беше спроведен и покрај гаранциите, а преговорите подоцна ќе бидат поврзани со ракетната програма на Иран“, напиша Ал-Хути на Твитер.
„Основата на секој договор е практично спроведување, а не само дијалог и потпис, како што прават САД и нивните сојузници со нивните договори, вклучително и Стокхолмскиот договор, што одбија да го спроведат“, додаде тој.
Во 2018 година САД еднострано се повлекоа од нуклеарниот договор во 2015 година потпишан со Иран и повторно ги воведоа санкциите претходно укинати според договорот. Иран, откако чекаше повеќе од една година, одговори со продолжување на збогатувањетото ураниум.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
ЕЕА: само околу една третина од водните површини во Европа се со добар квалитет
И покрај целта поставена од ЕУ во 2015 година, сите водни тела да бидат оценети како вода со добар квалитет, само околу една третина од површинските води во Европа се во добра состојба, се вели во извештајот на Европската агенција за животна средина (ЕЕА).
Според податоците од 19 земји-членки собрани од ЕЕА во 2021 година, околу 37 отсто од површинските води во Европа имаат барем добар еколошки статус, додека 29 отсто имаат добар хемиски статус, пренесува лондонски Гардијан. Првичниот рок за постигнување на целта на ЕУ е продолжен до 2027 година, но податоците покажуваат дека овој рок ќе биде пропуштен со голема разлика.
„Состојбата со водата во Европа не е добра. Нашите води се соочуваат со голем број предизвици кои ја загрозуваат безбедноста на водата во Европа“, рече Лина Ила-Мононен, извршен директор на ЕЕА.
Извештајот на ЕЕА откри дека земјоделските активности имаат најголемо влијание врз површинските и подземните води на Европа, бидејќи се испумпува премногу вода, а во исто време се испуштаат премногу загадени отпадни води, а се наведува и влијанието на термоелектраните кои ослободуваат токсични честички, пренесува Танјуг.
Свет
Jужна Кореја испука предупредувачки истрели поради севернокорејските провокации
Одговарајќи на потегот на Северна Кореја да урива делови од меѓукорејскиот пат, јужнокорејската армија денеска испука предупредувачки истрели јужно од воената демаркациона линија што ги раздвојува двете Кореи, соопшти Здружениот генералштаб на армијата на Јужна Кореја.
Откако вети дека ќе го прекине патниот и железничкиот сообраќај со Јужна Кореја, кои порано беа симболи на меѓукорејската соработка, Северна Кореја уништи делови од нејзините патишта што ја поврзуваа со Јужна Кореја, објави денеска Ројтерс.
Минатата недела севернокорејската војска објави план за „целосно одвојување“ на севернокорејската територија од Јужна Кореја, велејќи дека ја информирала американската војска за потегот за да „спречи какво било погрешно толкување и случајни судири“.
Двете Кореи се поврзани со патишта и железници долж линијата Ѓеонгуи, која го поврзува јужнокорејскиот пограничен град Пају со севернокорејскиот Каесонг и линијата Донгхаи долж источниот брег, објави агенцијата Јонхап.
Овој потег доаѓа откако Северна Кореја ги ескалира меѓукорејските тензии откако нејзиниот лидер Ким Џонг-ун на крајот од минатата година ги дефинираше двете Кореи како „две непријателски држави“, преземајќи чекори за уништување на меѓукорејските копнени патишта.
Оттогаш, Северна Кореја ги отстрани уличните светилки и постави мини по должината на линијата Ѓеонгуи и Донги, и распореди војници за изградба на противтенковски бариери и зајакнување на оградата од бодликава жица на нејзината страна од демилитаризираната зона што ги дели двете земји.
Тензиите, според агенциите, дополнително се зголемија откако Северна Кореја објави дека јужнокорејската војска трипати овој месец испратила дронови над Пјонгјанг.
Ким Џо-Јонг, влијателната сестра на севернокорејскиот лидер, предупреди на „страшна катастрофа“ доколку повторно бидат откриени јужнокорејски беспилотни летала над Пјонгјанг.
Свет
(Видео) Снимен моментот кога Северна Кореја ги разнесе патиштата што ја поврзуваат со Јужна
Северна Кореја разнесе делови од патот на својата страна од силно милитаризираната граница меѓу двете Кореи, објави началникот на здружениот генералштаб на Јужна Кореја, кој сподели и видео од инцидентот.
Околу пладне по локално време, разнесени се делови од патот северно од воената демаркациона линија меѓу двете земји, соопшти Здружениот штаб. Јужнокорејската војска го засили надзорот и подготвеноста за одговор, се додава.
Сеул претходно предупреди дека Пјонгјанг планира да разнесе патишта. Тензиите на Корејскиот полуостров се зголемија откако Северна Кореја ја обвини Јужна Кореја дека испраќа беспилотни летала над нејзиниот главен град Пјонгјанг.
🇰🇵🇰🇷SEOUL (@CNN) — South Korean military releases new video of North Korea blowing up 2 road / railways that used to connect the Koreas.
CNN Story: https://t.co/VXH8iZVrcd pic.twitter.com/x8wF2JhfS6
— Mike Valerio (@ValerioCNN) October 15, 2024
Северна Кореја во петокот соопшти дека беспилотните летала фрлиле голем број непријателски летоци врз Пјонгјанг, што го смета за политичка и воена провокација што може да доведе до вооружен конфликт.
Портпаролот на Здружениот генералштаб на Јужна Кореја одби да каже дали со наводните беспилотни летала управувала јужнокорејската војска или цивили во понеделникот.
Севернокорејскиот лидер, Ким Џонг-ун, во понеделникот се сретна со претставници на одбраната и безбедноста, а тема на разговорот беше одговорот на „сериозната непријателска провокација која го наруши суверенитетот на КНДР“, објави севернокорејскиот државен медиум КЦНА.
Руското Министерство за надворешни работи вчера ја обвини Јужна Кореја за зголемување на тензиите со соседната земја и повика на дипломатија за воспоставување мир и безбедност на Корејскиот полуостров.
„Обезбедувањето долгорочен мир и стабилност во подрегионот е можно само преку политички и дипломатски средства. Нема алтернатива освен ако агресијата не е вистинската цел на Јужна Кореја и нејзиниот поголем сојузник, САД“, изјави портпаролката на руската дипломатија Марија Захарова.
Русија и Северна Кореја ги зајакнаа дипломатските и воените врски од почетокот на руската инвазија на Украина во 2022 година.
Во понеделникот Путин до Думата, долниот дом на рускиот парламент, достави текст за ратификација на договорот за стратешко партнерство со Северна Кореја, објави новинската агенција Интерфакс. Во случај на вооружен напад на едната земја, другата треба да и пружи воена помош, стои во текстот на договорот.