Македонија
АСОМ: Податоците од играчите се чуваат само до моментот кога ќе се плати данокот на личен доход

Асоцијацијата на спортските обложувалници на Македонија (АСОМ) реагира на наводите на Државната комисија за спречување корупција (ДКСК) за наводно перење пари и злоупотреба на лични податоци во спортските обложувачници.
Од таму велат дека податоци за играчите во обложувачниците се земаат од играчите како би се задржал данокот на личен доход во висина од 15 % од сите добитни тикети.
Овие податоци, велат од АСОМ, се земаат во име и за сметка на државата, а средствата се уплатуваат на дневно ниво во државната каса.
„Обложувачниците немаат никаква потреба дополнително да ги обработуваат овие податоци и тие се користат исклучиво за плаќање на данокот на личен доход од 15 % во име и за сметка на државата и за ниту една друга намена. Пред наметнувањето на оваа давачка спортските обложувачници никогаш не побарувале податоци или обработувале податоци од играчите, ниту имаат потреба од нив“, се наведува во реакцијата.
Дополнително, велат од АСОМ, ДКСК во изјавата неосновано споменува перење пари, без никакво образложение за тоа.
„Нагласуваме дека не може да постои перење пари доколку за исплатените средства е пресметан и платен данокот на личен доход. Обложувачниците уште од 2012 година се поврзани на Надзорниот информациски систем (НИС) на кој се евидентираат во реално време сите уплатени и исплатени тикети, со што евентуалната манипулација е сведена на нула. Освен на НИС, обложувалниците се поврзани и со Управата за финансиско разузнавање (УФР), до која се доставуваат податоци за уплати и исплати. Во согласност со ова, сакаме да констатираме дека државата предвидела ефикасен механизам за контрола на работењето на обложувачниците без можности за грешки“, велат од АСОМ.
Во однос на личните податоци на играчите, од таму велат дека земените податоци од играчите се чуваат само до моментот кога ќе се плати данокот на личен доход, а тоа е на дневно ниво и до нив пристап има само обучен кадар, кој работи во согласност со посебни протоколи и во согласност со позитивните законски прописи за Заштита на личните податоци.
„Податоци за играчите во обложувачниците може да се појават само и исклучиво ако играчот дојде да подигне исплата за тикет и ја приложи својата лична карта на увид, од која се запишуваат потребните податоци според Законот за личниот доход. Не може податок за некој играч да се појави доколку лицето никогаш не остварило добивка и не оставило свои податоци при подигнување исплата на тикет. Асоцијацијата на спортските обложувачници на Македонија со жалење констатира дека ваквите информации ја доведуваат јавноста во заблуда и директно влијаат врз кредибилитетот на целата гранка. Ги повикуваме институциите на системот во целост да ги истражат отворените сомнежи, пред сѐ, во интерес на спортските обложувачници што работат во согласност со сите законски прописи во државата и немаат апсолутно никаков интерес од какви било финансиски малверзации и/или злоупотреба на лични податоци“, се наведува во реакцијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За три дена, 109 повредени од Кочани доставиле барања и предлози на телефонската линија на Владата

109 граѓани за три дена од пуштање на телефонската линија за повредените лица и нивните семејства, која е во директна комуникација со Канцеларијата на Ппретседателот на Владата, ја искористиле можноста и доставиле свои барања и предлози, соопштија од Владата.
Од таму велат дека тоа покажува дека оваа телефонска линија дава резултат и дека Владата е отворена за секаква сугестија и идеја.
„Како Влада преку низа на мерки помагаме за помош на повредените и нивните семејства. Ова е заедничка борба и нема да отстапиме од неа, бидејќи секој граѓанин има право на соодветна здравствена заштита и медицинска нега, токму поради тоа како Влада донесовме одлука за рехабилитација во Пониква на повредените лица кои се во стабилна здравствена состојба, но им е потребна дополнителна медицинска услуга. Тим на лекари од 10 јуни до 20 август во рехабилитацискиот центар Пониква на сите лица ќе им пружат дополнителна медицинска грижа, но и психолошка поддршка“, велат од Владата.
Од таму ги повикуваат и ги охрабруваат сите повредени лица кои се засегнати да се јават на телефонскиот број 070/355-526 и да ги изразат своите барања и потреби.
Македонија
Сончево време, попладне локален дожд

Времето денеска ќе биде сончево со мала до умерена облачност. Попладне ќе има услови за локален развој на нестабилна облачност со пороен дожд и грмежи. Ќе дува слаб ветер од променлив правец. Минималната температура ќе биде во интервал од 12 до 20, а максималната ќе достигне од 26 до 35 степени.
Во Скопје, сончево со мала до умерена облачност. Ќе дува слаб ветер од северен правец. Минималната температура ќе се спушти до 17, а максималната ќе достигне до 34 степени.
Од денеска следува период на стабилно и сончево време со мала до умерена локална облачност. Дневните температури ќе бидат без значителни промени.
Македонија
Мурал од балкански рис исцртан на фасадата на Театар Комедија

Со мурал од балкански рис и мала прослава, Македонското еколошко друштво вчера го прослави Светскиот ден на рисот.
„Конечно најдовме дом за муралот, најдовме и артист кој го нацрта, и најдовме човек кој има визија и кој е отворен за соработка, а тоа е директорот на Театар Комедија – Дарко Спасов. Целта ни е со овој мурал да ја подигнеме јавната свест, не само на рурално туку и на урбано ниво. Кога работите ќе згуснат ни треба секаква поддршка, од секоја популација“, изјави раководителот на Програмата за закрепнување на балканскиот рис, Диме Меловски.
Тој се заблагодари на поддршката од Театар Комедија и директорот Дарко Спасов.
„Велат исти птици во исто јато летаат“, вели директорот Спасов, кој го изрази своето задоволство од соработката со Македонското еколошко друштво.
Освен муралот на фасадата на Театар Комедија, пред објектот поставена е и инфо табла со основните податоци за рисот, како и QR код кој води до новата интернет страница посветена на балканскиот рис: balkanlynx.com.
По поздравните обраќања, присутните членови и соработници на МЕД, се упатија кон Бистро Комедија каде што во неформална атмосфера имаа прилика да поразговараат за досегашните постигнувања, но и да разменат идеи и предлози за идни активности.