Македонија
Царовска на конференција за холокаустот: Од најрана возраст да се научи какви последици може да создадат предрасудите

Сеќавањата за холокаустот создаваат голем немир и болка, особено помеѓу потомците на жртвите и хероите, за болната идеја да се истреби цел еден народ, како и кај секој друг човек со нормален разум и развиени емоции. Но, токму таа болка создава и сплотеност и ја одржува борбата за ова зло никогаш да не се повтори. Република Северна Македонија е активен учесник во таа борба, истакна министерката за образование и наука, Мила Царовска, за време на онлајн-работилницата „Справување со антисемитизмот преку образование“, во организација на ОБСЕ-ОДИХР и УНЕСКО, а со поддршка на Министерството за образование и наука и Меморијалниот центар на холокаустот на Евреите од Македонија.
„Верувам, сите ќе се согласиме дека образованието е најмоќната алатка за справување со антисемитизмот и воопшто со дискриминацијата, насилството и нетолеранцијата. Само преку едукација на граѓаните може да се спречи уништувањето на демократските вредности во секое општество“, рече Царовска додавајќи дека токму поради тоа, образовниот систем ги насочува учениците да стекнуваат сеопфатни знаења и да влечат поуки од вакви историски случувања.
Министерката потенцира дека секој човек мора да сфати уште од најрана возраст колку е лоша злоупотребата на моќта, какви последици може да создадат нетрпеливоста, предрасудите, нетолеранцијата по која било основа, но исто така какви последици може да создаде и индиферентноста на поединци, групи или воопшто на општеството кон таквите појави.
Младите, како што рече таа, мора да научат да препознаваат негативни појави и опасности и да стекнат чувство на лична одговорност дека и од нив зависи какво општество ќе создаваме.
„Во нашите училишта се учи за холокаустот. Тој е интегриран во дел од наставните програми во предметите, а има и навистина доста материјали, но и прирачници како да се организира наставата на оваа тема. И тие постојано се надополнуваат со поддршка на низа партнерски организации и институции. Во оваа пригода сакам да им се заблагодарам на ОДИХР и УНЕСКО и за новите изработени едукативни материјали, кои верувам ќе бидат исклучително важни за надополнување на фондот на знаења на учениците и корисни за целта што ја остваруваме“, потенцира Царовска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За три дена, 109 повредени од Кочани доставиле барања и предлози на телефонската линија на Владата

109 граѓани за три дена од пуштање на телефонската линија за повредените лица и нивните семејства, која е во директна комуникација со Канцеларијата на Ппретседателот на Владата, ја искористиле можноста и доставиле свои барања и предлози, соопштија од Владата.
Од таму велат дека тоа покажува дека оваа телефонска линија дава резултат и дека Владата е отворена за секаква сугестија и идеја.
„Како Влада преку низа на мерки помагаме за помош на повредените и нивните семејства. Ова е заедничка борба и нема да отстапиме од неа, бидејќи секој граѓанин има право на соодветна здравствена заштита и медицинска нега, токму поради тоа како Влада донесовме одлука за рехабилитација во Пониква на повредените лица кои се во стабилна здравствена состојба, но им е потребна дополнителна медицинска услуга. Тим на лекари од 10 јуни до 20 август во рехабилитацискиот центар Пониква на сите лица ќе им пружат дополнителна медицинска грижа, но и психолошка поддршка“, велат од Владата.
Од таму ги повикуваат и ги охрабруваат сите повредени лица кои се засегнати да се јават на телефонскиот број 070/355-526 и да ги изразат своите барања и потреби.
Македонија
Сончево време, попладне локален дожд

Времето денеска ќе биде сончево со мала до умерена облачност. Попладне ќе има услови за локален развој на нестабилна облачност со пороен дожд и грмежи. Ќе дува слаб ветер од променлив правец. Минималната температура ќе биде во интервал од 12 до 20, а максималната ќе достигне од 26 до 35 степени.
Во Скопје, сончево со мала до умерена облачност. Ќе дува слаб ветер од северен правец. Минималната температура ќе се спушти до 17, а максималната ќе достигне до 34 степени.
Од денеска следува период на стабилно и сончево време со мала до умерена локална облачност. Дневните температури ќе бидат без значителни промени.
Македонија
Мурал од балкански рис исцртан на фасадата на Театар Комедија

Со мурал од балкански рис и мала прослава, Македонското еколошко друштво вчера го прослави Светскиот ден на рисот.
„Конечно најдовме дом за муралот, најдовме и артист кој го нацрта, и најдовме човек кој има визија и кој е отворен за соработка, а тоа е директорот на Театар Комедија – Дарко Спасов. Целта ни е со овој мурал да ја подигнеме јавната свест, не само на рурално туку и на урбано ниво. Кога работите ќе згуснат ни треба секаква поддршка, од секоја популација“, изјави раководителот на Програмата за закрепнување на балканскиот рис, Диме Меловски.
Тој се заблагодари на поддршката од Театар Комедија и директорот Дарко Спасов.
„Велат исти птици во исто јато летаат“, вели директорот Спасов, кој го изрази своето задоволство од соработката со Македонското еколошко друштво.
Освен муралот на фасадата на Театар Комедија, пред објектот поставена е и инфо табла со основните податоци за рисот, како и QR код кој води до новата интернет страница посветена на балканскиот рис: balkanlynx.com.
По поздравните обраќања, присутните членови и соработници на МЕД, се упатија кон Бистро Комедија каде што во неформална атмосфера имаа прилика да поразговараат за досегашните постигнувања, но и да разменат идеи и предлози за идни активности.