Свет
Украина ископа 400 км противтенковски ровови на границата со Русија
Украина ископа околу 400 км противтенковски ровови на границата со Русија во рамките на проектот „Ѕид“, изјави Сергеј Деинеко, кој е на чело на државната служба за гранична стража, пренесува украинската новинска агенција РБЦ.
„Од моментот кога почна проектот ‘Ѕид’, изградени се околу 400 км противтенковски ровови, 330 км паралелни патишта, поставена е 70 км бодликава жица и челична ограда долга 100 км“, рече Деинеко.
Првично, трошоците за проектот се проценуваа на околу 143 милиони долари. Буџетот на крај беше скратен на околу 90 милиони долари.
Деинеко рече дека работата на утврдувањето во регионот Харков е при крај, а во тек е во регионот Чернигов. Во регионот Суми се во тек проекти и истражувачки работи, но инженерските работи таму сè уште не се почнати.
Поранешниот украински премиер Арсениј Јаценјук го претстави проектот „Ѕид“ во 2014 година како линија на утврдувања на границата со Русија во должина од 2.000 км. Првично, проектот требаше да се заврши во рок од шест месеци, но потоа беше продолжен до 2018 година, до 2021 година и, на крај, до 2025 година.
Во март 2016 година украинското Национално биро за борба против корупција почна кривична постапка за околу 623.000 долари украдени од буџетот на проектот. Во 2017 година беа уапсени осуммина осомничени вклучени во корупциската шема.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Непознат маж се обидел насилно да влезе во пилотската кабина на авионот на аеродромот Гардермоен во Осло
Непознат маж се обидел насилно да влезе во пилотската кабина на авионот на „Норвешка Ер“ на аеродромот Гардермоен во Осло, кој требало да полета на летот DI1990 за Сплит во 6.50 часот, а кога не успеал, се заклучил во тоалетот во задниот дел од авионот, објави хрватски Дневник.
Норвешката полиција подоцна го идентификуваше лицето како 23-годишен хрватски државјанин.
Мотивите за овој чин засега не се познати.
Авионот бил полн со патници кои главно патувале во централна Далмација на одмор. Повеќето од нив не забележале дека се случува нешто необично, дури ни оние што седеле напред.
„Авионот веќе полета и додека се движеше кон делот од пистата, наеднаш застана. Првото известување до пилотот било дека има технички проблеми и дека мора да застанат. Полицајците влегле во предниот дел и по краток разговор се упатиле назад каде што се заклучил. Во авионот имало тепачка, сите сакале да видат што се случува, па не било јасно дали полициските сили влегле во тоалетот или патникот сам се предал. Секако, тројца полицајци му ставиле лисици и преку пистата го одвеле до аеродромската зграда“, изјави еден од патниците кој со сопругата патувал за Водице, Хрватска.
Како што подоцна соопшти полицијата, патникот не бил во алкохолизирана состојба или под дејство на други опијати. Засега не е познато кои биле неговите крајни намери.
По завршувањето на сите формалности, новиот лет за Сплит пристигна околу 9 часот.
Компанијата им се извини на сите патници за доцнењето од два часа.
Свет
Седум бебиња загинаа во голем пожар во болница во источниот дел на Њу Делхи
Седум бебиња загинаа во голем пожар во болница во источниот дел на Њу Делхи, а пет се спасени и префрлени во друга болница, соопштија денеска локалните власти.
Сопственикот на болницата за бебиња во која избувна пожарот во саботата е во бегство, соопшти полицијата.
Како што пренесе Тајмс оф Индија, пожарот е ставен под контрола, а истрагата за причините за несреќата е во тек.
Свет
Вирусот на птичји грип е пронајден во говедско месо во САД
Вирусот на птичји грип е пронајден во говедско месо во САД, но официјални лица изјавија дека месото потекнува од една болна млечна крава и дека не било дозволено да се најде во продавниците во земјата, соопшти американското Министерство за земјоделство.
Надлежните прецизираат дека говедското месо останува погодно за консумирање.
Министерството соопшти дека вирусот бил откриен за време на тестирањето на 96 млечни крави кои биле извадени од производната линија бидејќи федералните инспектори забележале знаци на болеста при рутински прегледи на трупови во погоните за преработка на месо. Птичји грип е пронајден само кај една од овие крави.
Птичјиот грип е пронајден во стадата млечни говеда во девет држави, откриен е во млеко и предизвика уништување на милиони кокошки и мисирки. Сепак, неговото откритие во говедско месо е новост за епидемијата што започна во 2022 година.