Поради претстојното 21. издание на Виз Ер Скопски маратон, што ќе се одржи на 05.10.2025 (недела), а на кој ќе учествуваат рекордни над 14.000 натпреварувачи од 58 земји, во недела ќе важи привремен режим на сообраќај во главниот град. Ова значи дека одредени улици ќе бидат целосно или делумно затворени за сообраќај во периодот на одржување на маратонот, а променетиот режим ќе биде на сила до завршувањето на маратонот, до 14:00 часот.

Целта на сите трки е на Плоштад Македонија. Стартот на маратонската, полумаратонската и штефатната трка e во 08:05 часот пред Собранието на Р. Македонија, додека натпреварувачите на Комерцијална Банка трката на 5 км ќе стартуваат во 08:00 часот во близина на Црвениот крст на РМ и ќе се движат во насока на Аеродром. Сепак, организаторите апелираат тркачите да дојдат барем 20 минути порано. При влез во старт зоната, се апелира секој тркач да влезе во соодветниот бокс за својата трка или таргет време што го има одбрано при процесот на регистрација, сѐ со цел да не се создаваат турканици.

Трасата на Комерцијална Банка 5K трката започнува во близина на Црвениот крст на РМ, право по ул.„11-ти Октомври“, лево по бул.„Крушевска Република“, десно по бул.„3-та Македонска Бригада“, полукружно на крстосница помеѓу бул.„3-та Македонска Бригада“ и ул.„Васко Карангелевски“ и по истата траса назад до целта – Плоштад „Македонија“ на ул.„11-ти Октомври“.

Патеката за маратонската трка, полумаратонот и штафетната трка, ќе стартува на улицата „11 Октомври“ пред Собранието и тргнува во правец кон запад по улица „Митрополит Теодосиј Гологанов“. Тркачите ќе трчаат право во двете насоки до крај на овој булевар и продолжуваат право по ул. „Васил Чакаларов“, каде по семафорите во населба Хром, ќе свртат полукружно и ќе се вратат во правец кон центар по истите улици и булевари. Кога ќе се враќаат тркачите кај Собрание, ја продолжуваат трасата по улица „11 Октомври“ кон Црвен Крст и ќе свртат кај Тутунски комбинат лево на бул. „Крушевска Република“ и десно на „Трета Македонска Бригада“. По неа ќе се трча до раскрсницата кај Американ Колеџ и ќе се врти лево по улица „Васко Карангелески“. Потоа ќе трчаат право сѐ до раскрсницата со бул. „Јане Сандански“. На раскрсницата ќе се врти десно и ќе се трча сѐ до раскрсницата со Бул. „Србија“, каде, пред неа се врти полукружно во истата коловозна страна (другата страна од булеварот е слободна за сообраќај во правец кон Центар) и ќе трчаат до пред раскрсницата кај Тобако 2. Тркачите полукружно ќе се враќаат до раскрсницата кај Сансет, ул. „Васко Карангелески“, десно до крај и повторно десно ќе излезат на „Трета Македонска Бригада“. Трчаат по истата патека до Собрание, со тоа што полумаратонците финишираат на Плоштад Македонија, а маратонците трчаат уште еден круг.

За време на одржувањето на маратонот сообраќајот ќе биде пренасочуван по околните улици, при што МВР апелира до граѓаните да ги почитуваат наредбите што ќе ги издаваат полициските службеници долж трасите на движење и навремено да го планираат своето движење.

Проширување на улицата Цветан Димов во Чаир ќе биде еден од првите проекти на Орце Ѓорѓиевски, кандидатот на ВМРО-ДПМНЕ за градоначалник на Скопје, доколку биде избран. Денес на чаирчани им вети булеварско решение за улицата која е едно од најтесните сообраќајни грла на Скопје која место да се помине за пет минути, поради метежот од паркирани автомобили и пешаци, се вози по половина час.

Сообраќајниот метеж овде одамна го надмина прагот на издржливост, рече Ѓорѓиевски

„Првиот и најзначаен проект за оваа општина е изградбата на булеварот Цветан Димов. По години одлагање по изборите конечно ќе се почне со реализација на овој проект кој претставува главна сообраќајна артерија што го поврзува Чаир со центарот на главниот град. Денес на овој потег дневно се движат по околу 100.000 возила бидејќи тука минуваат возачи од Чаир, Бутел и Шуто Оризари. Три општини кои се силно зависни токму од овој булевар. Сообраќајниот метеж овде одамна го надмина прагот на издржливост, а воедно носи и големи безбедносни ризици. Согласно проектот од мојата програма за Скопје овој булевар ќе биде изграден со шест коловозни ленти, велосипедски патеки, тротоари, зеленило и современо осветлување со што ќе се реши хроничниот хаос, но уште поважно, ќе се подобри безбедноста на сите учесници во сообраќајот“, рече Ѓорѓиевски.

Проектот за уредување на Цветан Димов објасни дека е дел од неговата стратегија „Визија нула несреќи“, преку која до 2030 година Скопје ќе редизајнира 50 критични улици и крстосници применувајќи европски стандарди за урбана безбедност.

Освен булеварот, Ѓорѓиевски најави и изградба на катна гаража.

„Паралелно со булеварот ќе почнеме и изградба на монтажна катна гаража кај трговскиот центар „Чаирчанка“ непосредно до нас. Со години наназад овој дел од градот се соочува со драматичен недостиг на паркинг места. Со новиот монатжен систем ќе добиеме решение кое е брзо, функционално и безбедно без дополнително оптоварување на јавниот простор како што е во моментов. Оваа гаража ќе понуди зголемен капацитет и уредено паркирање со што ќе се растовари околината и ќе се подобри квалитетот на животот во овој густо населен дел во Чаир“, рече Ѓорѓиевски.

Доколку биде избран за градоначалник Ѓорѓиевски рече дека овој проект ќе го почне веднаш по ребалансот на буџетот, што, пак, ќе му биде прва обврска во Град Скопје.

Проширувањето на Цветан Димов ќе го почне истовремено со пристапите за подземната сообраќајница на „Лимак“ како приоритети за кои веќе има проекти.

„Верувам дека граѓаните ќе ми дадат поддршка, не за да победам во првиот круг туку за да не губиме две до три недели, затоа ги повикувам граѓаните масовно, референдумски да излезат. Пред нас имаме зимски период во кој ќе мора за некои процеси веднаш да реагираме и да ги доведеме во нормална состојба“, повика Ѓорѓиевски.

Најавите за проширување на Цветан Димов не се ништо ново за чаирчани оти ги слушаат секои избори. По изборите во 2021 година дури имаше и обид да почне реализација на проектот, но кога дојде до фаза да се преговара за експропријација на голем дел од дуќаните кои треба да се урнат за да се прошири улицата активностите запреа, а Град Скопје под водство на Данела Арсовска ги пренамени предвидените средства за други проекти и долгови.

Последна инвестиција на Град Скопје на оваа улица, беше бетонската ограда поставена во мај 2021 година кога градоначалник на Скопје беше Петре Шилегов. Бетонската ограда се покажа исклучително функционална оти, онаму каде што ја има, не може да се врти полукружно, а значително го намали и бројот на пешаци кои претрчуваа насекаде. Пешаци и сега има, но за да ја преминат улицата мора да ја прескокнат бетонска ограда. Арсовска, на почетокот на мандатот најави дека ќе ја вади, но проектот за проширување беше одложен, а оградата остана.