Kако Министерство и како Влада ќе покажеме дека нашите деца имаат еднаков потенцијал како и децата од развиените земји, кои постигнуваат високи резултати на меѓународните тестирања, порача денеска министерската за образование, Мила Царовска, при посетата на основното училиште „Исмаил Ќемали“ во скопски Чаир, каде што локалната самоуправа во соработка со АД МЕПСО обезбеди 19 паметни табли.

„За да имаме квалитетно образование, потребни се добри, квалитетни и современи наставни програми, обучен и квалитетен наставен кадар и инвестиција во инфраструктура и опрема во училиштата и на сето ова интензивно и посветено работиме. Може да се види дека повеќето од општините интензивно инвестираат во нова дидактика, во нови материјали – табли, таблети, компјутери, како и во нови наставни материјали, кои им се потребни, за да имаме современо образование“, рече министерката додавајќи дека нема силна држава без квалитетно образование.

Градоначалникот на општина Чаир, Висар Ганиу, рече дека инвестицијата во вредност од 1,6 милион денари е важна за квалитетен образовен процес според современи стандарди.

„Светот бргу се отвора кон дигитализација. Инвестициите во училиштатата, следствено на тоа и во знаењето, се највредната работа што може да ја направиме како општина“, рече Ганиу.

За генералниот директор на АД МЕПСО, Куштрим Рамадани, инвестицијата во паметни табли е помош за учениците, кои треба да се насочуваат кон иновативните паметни технологии.