Првпат граѓаните имаат своја влада, која ја избрале и е тука да им се најде, без разлика колку чини тоа, да се релоцираат и да се најдат средства од буџетот. Откупот на грозјето оваа година беше пример дека граѓаните имаат своја влада подготвена да помогне секогаш кога тоа им е потребно, рече премиерот Заев на седницата за пратенички прашања.

„Милијарда и триста милиони евра се пуштени кај граѓаните, посебно кај лозаропроизводителите, производителите на тутун – тоа се илјадници наши семејства, од кои најголем број живеат само од тоа“, соопшти премиерот.

Фокусирајќи се кон одговорот околу состојбите во лозарството, Заев посочи дека 45 проценти во цената или вкупната сума на пари што ја добиле лозарите е од откупувачите, а 55 проценти од својата земја.

„Тоа никој пат не било така, причините се нормално последиците од ковид, кои ги намалија пласманите на винското грозје, односно виното, останати количини на залихи и неопходноста од интервенција на државата. Државата не се мислеше кога требаше да им се помогне на лозарите и го направи тоа. Покрај стандардните субвенции по хектар, кои се даваат, а се дополнително зголемени во последните години – даде дополнително 2 денара, уште плус 2 денара, па уште 4 денари, па плус мерката за извоз – да стимулира, сé со конечна цел да се откупи и последното зрно грозје. Тоа го направивме. Кога се јавија потребите за дестилирање, тоа беше дополнително можност како алатка да им помогнеме на лозаропроизводителите да дојдат до екстра 4 денари. Парите се сите кај производителите, не се кај откупувачите. Денес е исплатено сè. Сè. Дополнително   со репрограм се најдоа пари и дополнителни средства за да можат да бидат исплатени“, објасни премиерот.

Тој посочи дека и мерката за извозот дава резултат.

„Оваа година ни е со најголем извоз на винско грозје, посебно наливното вино, токму поради стимулацијата што ја дадовме, за повеќе да се извезува. Работиме максимално на поддршка на сè што е поврзано со извозот, за да постигнат нашите трговци, откупувачи, поголема компетитивност на меѓународните пазари и поголем дел од македонското грозје да се пласира колку што може повеќе надвор“, додаде Заев.