Македонија
(Видео) Заев: Загадениот воздух во Скопје веќе не е горлива тема како резултат на акциите што ги спроведовме
На одбележувањето на Светскиот ден на заштита на животната средина, скопскиот градоначалник Петре Шилегов и премиерот Зоран Заев, присуствуваа на акција на Град Скопје за расчистување на поранешниот полигон за обука на возачи под Кале.
На акцијата присуствуваа и Директорката на УЈП, Сања Лукаревска и заменик-министерот за информатичко општество и администрација, Александар Бајдевски.
„Оваа година им се придружив на активностите што по повод овој ден ги организира Град Скопје кој продолжува да го реализира ‘Акцискиот план – Скопје зелен град’, проект кој во фокусот ги стави решенијата за предизвиците за заштита на животната средина и создавање на одржлив развој на градовите. Факт е дека како резултат на активностите од овој проект и на низата други значајни сеопфатни проекти оваа година не разговараме за загаден воздух во главниот град, односно имаме огромно намалување на бројот на денови со надминати концентрации на пи-ем честички. Некои ќе се повикаат на времето, климатските промени, но факт е дека намалувањето е резултат и на заедничка акција на сите. Резултат е и на зголемената свест кај граѓаните, која е на највисоко ниво до сега и е дополнителен поттик за оваа Влада да продолжи со еколошките проекти како што беше замената на загадувачките печки на дрва и на фосилни горива со еколошки чисти инвертери во Скопје и во неколку други градови“, посочи во своето обраќање премиерот Заев.
Градоначалникот Шилегов посочи дека ридот на Кале е една од најкритичните точки на градот во смисла на ерозија.
„Не случајно ја одбравме оваа локација, која изминативе три години беше предмет на анализа на Град Скопје и УНДП како дел од проектот ‘Отпорно Скопје’ и изготвени се две студи: Студија за озеленување и пошумување на подрачјето на Град Скопје и Студија за ерозија и акциски план на Град Скопје. Градот во соработка со УНДП има засадено над 11.500 садници со цел спречување на ерозивните процеси“, порача Шилегов.
Тој најави дека оваа локација во иднина ќе биде во фокус на градот во смисла на уредување на јавниот простор.
„Овој простор треба да премине во организирано паркирање, но и да се изградат нов памптрак полигон, скејт парк, кошаркарски игралишта со цел овој простор кој во минатото беше сериозно девастиран и заборавен од градските власти да го ставиме во употреба на скопјани. Во оваа прилика сакам да апелирам до скопјани, особено граѓаните што доаѓаат од Аеродром, Ново Лисиче, Бутел и Чаир наместо да одат да паркираат пред ЗОО Скопје да го користат овој простор, којшто сега е слободен за паркирање, исчистен и релативно безбеден“, кажа скопскиот градоначалник.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Оставка на директорот на основното училиште во Ѓорче Петров каде деца се обидоа да силуваат соученик
Градоначалникот на општината Ѓорче Петров, Александар Стојкоски, соопшти дека од лични и морални причини оставка поднел директорот на општинското основно училиште во кое се случи обид за силување на ученик. На негово место, веќе е именуван нов ВД директор.
Стојкоски информираше и дека е формирана комисија која ќе поведува дисциплинска постапка против четворица вработени, а суспендиран е одговорниот наставник за одделението. По утврдувањето на одговорноста на секој од нив, зависно од дејствијата кои ги презеле или пропуштиле, соодветно ќе бидат санкционирани.
„Изразувам жалење и најсилна осуда за немилиот настан во едно од нашите ООУ, во која се инволвирани ученици од најмалите одделенија. Информираме дека сме во постојана комуникација од моментот на пријавување на настанот со сите инволвирани институции, МВР, МОН, социјални служби и обвинителство“, рече Стојкоски додавајќи дека општината и училиштето соодветно ги презеле сите мерки согласно Законот за основно образование и Законот за наставници и стручни соработници, како и согласно Упатството за постапката за пријавување и заштита на ученици жртви на насилство, злоупотреба и занемарување.
МВР претходно објави дека завчера во период од 11 до 15 часот, во двор на основно училиште на подрачјето на Ѓорче Петров, ученикот бил физички нападнат од двајца негови соученици, кои се обиделе да извршат полово дејствие врз него.
Случајот во полицијата го пријавил таткото на ученикот.
Македонија
(Видео) Огромни гужви за излез од Скопје, на патарината „Миладиновци“ колони од два километри
Огромни гужви има попладнево на наплатната станица „Миладиновци“ на излез од Скопје.
„Тука е полошо од грчка граница. Сите свират, се обидуваат да ги престигнат автомобилите. Ужас! “, коментираат за „Макфакс“ патници кои останале заглавени на патарината.
И оние кои поседуваат М-таг картички не можат да се доближат до наплатната рампа, а заглавени се и автобусите на редовните линии кон Куманово, Кратово, Крива Паланка, Штип, Берово, Кочани.
Голем број граѓани го напуштија градот поради претстојниот продолжен празничен викенд.
Македонија
Македонците во Бугарија се обесхрабруваат да се идентификуваат, не постои свест за правата на малцинствата, нотира Советот на Европа
Советодавниот комитет на Советот на Европа во својот најнов извештај посочува дека во Бугарија постои значителен недостаток на свест за малцинските права.
Се нотира дека во земјата не може да се забележи значителен напредок во спроведувањето на препораките за да се обезбеди ефективен пристап до правата на малцинствата.
„Додека Бугарија играше сè поактивна улога во промовирањето на правата на лицата кои им припаѓаат на бугарските малцинства во странство, вакви напори не биле забележани и во рамките на Бугарија. Како и во претходните циклуси, лицата кои се идентификуваат како Македонци ја повторија својата долгогодишна желба да бидат заштитени според Рамковната конвенција, но бидејќи властите не го прифаќаат постоењето на објективни критериуми за нив, овие лица не можат да уживаат пристап до индивидуалните малцински права. Нивните долгорочни обиди да регистрираат здруженија кои ја промовираат македонската заедница не беа успешни. Власите не гледаат објективни критериуми ниту за лицата кои се идентификуваат како Помаци односно етничките Македонци со исламска вероисповед кои во земјата и натаму се нарекуваат бугарски муслимани“, стои во извештајот на Советодавниот комитет.
Во документот се упатуваат препораки до бугарските власти да ги усогласат своите активности со Рамковната конвенција за заштита на националните малцинства. Притоа се нотира дека се потребни повеќе активности од властите во голем број сфери поврзани со правата на потребни се лица кои припаѓаат на националните малцинства.
Лица кои се самоидентификуваат како Македонци, кои продолжиле да бараат заштита според Рамковната конвенција, пријавиле до Советодавниот комитет дека некои постапки на властите ги сфатиле како активно обесхрабрување да се самоидентификуваат како етнички Македонци. Се додава дека се пријавени и напади за време на јавни настани, како и пречки во организирање протести и различни настани. Соговорниците на Советодавниот комитет напоменаа дека во бугарското општество нема свест за значењето на малцинските права и дека нема разбирање, националните малцинства да бидат составен и ценет дел од Бугарија.
Во извештајот, во неколку точки, се напоменува и дека Европскиот суд за човекови права, во 12 случаи против Бугарија, утврдил, непочитување на правото на слобода на собирање и здружување, поднесени од здруженијата на Македонците, кои пак властите упорно одбиваат да ги регистрираат.