По повод 24 години од загинувањето на македонските бранители, припадници на резервниот состав на Армијата кај месноста Љуботенски Бачила, премиерот Христијан Мицкоски објави порака дека „Македонија се потпира на влогот на овие луѓе и нивното дело“.

-Почит и слава за хероите од Љуботен. Само со вистина, почит и искрена желба за помирување можеме да изградиме општество каде вакви трагедии нема да се повторат. Нека е вечна нивната жртва за татковината. Македонија се потпира на влогот на овие луѓе и нивното дело, напиша претседателот на Владата на Фејсбук.

На 10 август 2001 година, на патот кон месноста Љуботенски Бачила со воено товарно возило, при активирање на мина животот го загубија осум припадници на резервниот состав на Армијата: Томе Бадаровски, Гоце Чанкуловски, Бранко Јанев, Томислав Настевски, Марјанчо Бошковски, Ивица Златевски, Томе Димовски и Раде Јанковски.

На овој ден му се оддава почит и на Ацо Ангеловски кој во 2000 година загина во Арачиново при оружен напад врз полициска патрола.

Полициски службеници од СВР Скопје вчеравечер во периодот од 18.00 до 2.00 часот при зајакната акциска контрола во делот на сообраќајот, како и во насока на одржување на поволна безбедносна состојба на подрачје на град Скопје, констатирале 99 сообраќајки прекршоци.

Единаесет  возила се подигнати со специјално возило „Пајак”, одземени се две возила поради предизвикување голема бучава, приведени се две малолетни лица за утврдување на идентитет, незастанување на даден знак Стоп и возење без возачка дозвола. Лишени од слобода се четири лица бидејќи при преглед кај нив биле пронајдени наркотични средства.

Како што информираат од МВР, во координација со инспектори за животна средина извршено е мерење на јачина на бучава на угостителски објекти, при што било констатирано дека два угостителски објекти во централно градско подрачје го нарушиле јавниот ред и мир со пуштање гласна музика и им се сочинети  записници за констатирани прекршоци.

Во текот на изминатата вечер, исто така,  контролирани се и угостителски објекти во координација со Државен пазарен инспекторат при што е извршена контрола на документацијата.

Центарот за управување со кризи информира дека до 9 часот наутро, регистрирани се вкупно 22 пожари на отворен простор. Од нив, само еден е сè уште активен, а 21 се изгаснати. Додека температурите се многу високи и сите бараме климатизирани простории, овие луѓе се на терен и се борат со екстремно високи температури од жешкото сонце и од огновите.

Единствениот активен пожар е во срцето на Националниот парк „Јасен“ во општина Македонски Брод, каде што гори мешана шума. Таму е мобилизирана значителна противпожарна сила, бидејќи станува збор за заштитено подрачје со исклучителна природна вредност и разновиден животински свет.

Останатите пожари, иако сега изгаснати, вчера предизвикаа сериозни интервенции низ целата држава. Во Тетовскиот регион, пламенот зафати ниска вегетација кај селата Озормиште и Тежето, како и во Слатино и Џепчиште, а во близина на железничката станица во градот и во Шемшово гореше запалено ѓубре. И Гостивар не остана поштеден – во близина на фирма во Мизраше гореше ниска вегетација, а во селото Симница повторно беше запалено ѓубре.

На југот од државата, во Струмичкото село Смолари, како и во Валандово, пламенот уништуваше ниска вегетација и плантажи. Во битолскиот регион, во близина на РЕК Битола, пожарот зафати тревни површини, а во селото Братиндол изгореа ниски растенија. Исто така, во прилепската касарна и во селата Дебреште и Лопатица гореше ниска вегетација, која поради сувото време брзо се ширеше.

Во централниот дел на земјата, Велес се бореше со пожар кај селото Отовица, а Куманово со пламен до патарината на автопатот Куманово – Скопје. Во источниот дел, селото Крупиште во Карбинци беше зафатено од пожар, како и селото Црвивци во Кичево. Сарај гореше кај селото Радуша, додека во Ранковце беше зафатена тревната површина покрај патот.

Иако сите овие пожари сега се изгаснати, надлежните предупредуваат дека високите температури и сувото време создаваат идеални услови за нивно повторно појавување. Апелираат граѓаните да бидат исклучително внимателни и да пријават секое забележано палење трева или отпад, со цел да се спречат нови големи катастрофи.