Во Словенија во последните 24 часа регистрирани се 24 инфекции со коронавирус, а сите други индикатори се многу поволни, така што владата нема да ја продолжи состојбата на епидемија, која завршува на 15 јуни.

Од 1.023 ПЦР-теста, потврдени се 24 заразени или 2,3 процента. Седумдневниот просек на инфекции во еден ден падна на 147, а двонеделната инциденца на 100.000 жители падна на 130.

Починале двајца пациенти со Ковид-19, соопшти словенечкото Министерство за здравство.

Од почетокот на епидемијата починале 4.406 лица заразени од коронавирус, во болниците се 134 пациенти, а 26,1 проценти од населението се целосно имунизирани со вакцини, објави Националниот институт за јавно здравје (НИЈЗ).

Владата најави дека по 15 јуни нема да ја продолжува состојбата на епидемија прогласена во вториот бран на 18 октомври, но некои епидемиолошки мерки ќе останат во сила.

Во преодната фаза, додека Словенија не влезе во т.н. зелена фаза според критериумите на Европскиот центар за контрола на болестите (EЦДЦ), што се очекува кон крајот на јуни или почетокот на јули, носењето маска и натаму ќе биде задолжително во затворен простор.

Ограничувањата, како што е бројот на присутни во затворено, остануваат во сила, а услови за присуство на концерти и други настани сè уште ќе бидат негативен тест на коронавирус, прележан Ковид-19 или целосна вакцинација.

Владата го повтори својот апел до оние што сè уште не одлучиле да се вакцинираат да го сторат тоа што е можно побргу бидејќи сега има доволно вакцини, а оваа недела ќе биде организирана и масовна вакцинација.