Македонија
ВМРО-ДПМНЕ ќе поднесе кривична пријава против Џафери
ВМРО-ДПМНЕ соопшти дека ќе поднесе кривична пријава против претседателот на Собранието Талат Џафери поради „свесно кршење на Уставот и законите“.
Криивичната пријава се случува откако пред два дена претседателот на Собранието Џафери пред Комитетот за надворешна политика на ЕП се обрати на албански јазик.
По тој повод, професорката и пратеничка од ВМРО-ДПМНЕ, Гордана Силјановска Давкова, на прес-конференција во Собранието остро го критикуваше однесувањето на Џафери. Таа истакна дека со обраќањето, тој го прекршил Уставот преку своја лична интерпретација на одредбите на јазикот, како и дека за истото треба да одговара, а ја повика и претседателката на Уставниот суд да постапи по иницијативите за оценка на уставноста на Законот за употреба на јазиците.
„Претседателот на Собранието Талат Џафери го промовираше на меѓународен план јазичниот федерализам имено тој зборуваше на албански јазик, би сакала да упатам на уставното решение, односно на амандманот 5 од Уставот, Член 1 во кое јасно се вели дека на целата територија на Република Македонија и во нејзините меѓународни односи службен јазик е македонскиот јазик и неговото кирилско писмо“, вели пратеничката Силјановска Давкова.
Силјановска посочи дека ставот 2 од истиот Член од Уставот вели дека јазикот кој го зборуваат најмалку 20 % од граѓаните исто така е службен јазик со неговото писмо, но во истиот член никаде не пишува дека истиот може да се употребува во меѓународните односи.
„Ова значи дека господинот Талат Џафери си го допиша Уставот преку своја лична интерпретација на одредбите за јазикот“, истакна Силјановска Давкова.
Пратеничката посочи дека претседателот на Собранието треба прв да покаже дека е под Уставот и законите, а дека и го почитува Деловникот и треба така и да се однесува во меѓународните односи.
„Во меѓународната јазична практика дури и во федерации како Шварцарија или Белгија кадешто ние пратениците ги добиваме законите на два јазика, секогаш постои автентична верзија, заради опасноста од различниот превод да се гласа за различни решенија, не ми е јасно кој е авторот на ваквиот модел, пратениците Албанци можат да ги добиваат материјалите на албански јазик, но не постои обврска за пратениците Македонци, Турци, Роми, Власи и останати да добиваат текст на албански јазик, па по тоа ова е невообичаена пракса дури и за Европскиот парламент, и очигледно е ова некоја нова јазична инвенција“, појасни Силјановска.
Силјановска вели дека оваа како што рече јазична инвенција не само што е незаконска и неуставна и доведува до големи забуни.
„Очекував службите во Собранието да му алармираат на претседателот на Собранието, но очигледно дека тој мисли дека се’ е дозволено, точно е дека ваквите текстови доаѓаат и од Владата“, вели Силјановска Давкова.
Таа потенцираше дека личните документи се издаваат на македонски јазик како и на тој јазик во согласност со закон, значи „и“, „и“, не „или“, „или“, како и го потенцираше примерот кој се случи во Тетово каде матичните служби им велат на граѓаните дека мораат да ги добијат личните документи двојазично затоа што нивниот број бил низок од 20 проценти, кое е уште едно кршење на Уставот.
„Ја повикувам претседателката на Уставниот суд која вели дека никој не може да влијае врз неа, да ги процесуира неколкуте иницијативи за оценка на уставноста на законот на употреба на јазиците, јас како професор одгoворно тврдам дека и процедурално тој е донесен спротивно на Уставот и законот во скратена постапка со европско знаменце, а овој закон не беше потпишан од претседателот на државата, а без негов потпис тој закон е невалиден, односно станува збор за неовластено фалсификување, на потег треба да биде Уставниот суд“, појасни Силјановска Давкова.
Интерпелација за Џафери денеска најави Левица, а поддршка доби и од ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Следува променливо облачно време со повремени врнежи од дожд и снег
Времето утре ќе биде променливо облачно со врнежи од дожд, кои локално ќе бидат пообилни (над 25 l/m²), особено попладне и во текот на ноќта. На планините врнежите ќе бидат од снег. Ќе дува засилен ветер од јужен правец (над 60 km/h).
Минималната температура ќе биде во интервал од 7 до 12, а максималната ќе достигне од 10 до 17 степени.
Во Скопје, променливо облачно со повремен дожд, особено кон крајот на денот и во текот на ноќта. Ќе дува умерен ветер од јужен правец. Минималната температура ќе се спушти до 8, а максималната ќе достигне до 14 степени.
Времето во наредните денови
Под влијание на циклонска активност во следните денови времето ќе биде променливо облачно со повремени врнежи од дожд, а на планините од снег. Поради продор на постуден воздух и засилен северен ветер во четврток врнежите ќе преминуваат во снег на повисоките и во некои од пониските места.
На планините во западните делови ќе се формира нова снежна покривка, а помала покривка се очекува и во пониските места. Во петок ќе има преодно стабилизирање на времето, а во деновите од викендот, особено во сабота повторно ќе има локални врнежи од дожд и снег, кои наместа ќе бидат пообилни. Температурите ќе бидат во опаѓање.
Македонија
(Видео) Николоски: 40 километри од автопатот Охрид – Кичево се веќе во функција
Вицепремиерот и министер за транспорт Александар Николоски на својот фејсбук профил објави ноќно видео од автопатот Охрид-Кичево, каде истакнува дека 40 километри од автопатот се ставени во функција.
„Погледнете го ова прекрасно ноќно видео од делот од автопатот Охрид – Кичево. 40 километри се веќе во функција. Се надевам голем број македонски граѓани ќе возат по овој автопат на пат кон Балканскиот Ерусалим – Охрид за овој Божиќ. Честитки на сите вредни работници кои се посветија на неговата изградба! За многу години Божиќ и Бадник!“ порача вицепремиерот Николоски.
Македонија
(Фото) Мицкоски: Бадник не е само ден, туку порака дека заедништвото, љубовта и солидарноста нe прават посилни
„Во пресрет на Бадник, денеска поделивме пакети помош во Карпош, Гази Баба, Чаир, Аеродром, Ѓорче Петров, Кисела Вода, Бутел и Центар со желба секое семејство да ја почувствува топлината на празникот на својата трпеза“, извести премиерот Христијан Мицкоски преку социјалните мрежи.
„Бадник не е само ден, туку порака дека заедништвото, љубовта и солидарноста нe прават посилни“, додаде Мицкоски.

