Македонија
Димовски, Шекеринска и Спасовски: АНБ и членството во НАТО се гарант за националната безбедност

Агенцијата за национална безбедност денеска организираше настан по повод две години од своето основање.
Настанот се одржа во присуство на претседателот Стево Пендаровски, вицепремиерот за борба против корупцијата, Љупчо Николовски, министерот за здравство, Венко Филипче, и бројни претставници на владините институции како и на независните тела партнери во соработката на Агенцијата.
На настанот се обрати директорот на Агенцијата за национална безбедност Виктор Димовски:
„Денес со задоволство можам да истакнам дека Агенцијата согласно целта за која е основана, веќе две години успешно ги штити националната безбедност, независноста, суверениетот, уставното уредување и основните права и слободи на човекот и граѓанинот гарантирани со Уставот.
Свесни за нашата улога во безбедносно-разузнавачката заедница продолжуваме посветено да работиме на реформските процеси, согласно највисоките НАТО-стандарди, со цел наше натамошно усовршување и овозможување на брз и ефикасен одговор на ризиците и заканите по безбедноста на државата и граѓаните.
Длабоко сум уверен дека вработените во Агенцијата со својата стручност и професионализам ќе продолжат со реализација на уставните и законските надлежности преку успешно справување со тековните безбедносни предизвици на национално, регионално и глобално ниво со амбиции да станеме респектабилен и кредибилен партнер во областа на безбедноста на регионален и на поширок меѓународен план“, истакна Димовски.
Министерката за одбрана, Радмила Шекеринска, рече дека дури и во периоди на пандемија и буџетски кратења, изнајдени биле буџетски ресурси за да се покијат потребите на безбедносните служби.
„Безбедноста навистина нема цена. И ние како држава во минатото увидовме дека сето она што се смета за заштеда е само краткорочно, а вистинската инвестиција е во силни и професионални институции кои нема да зависат од ничија политичка волја.
Нашата задача како нова 30 -та членка на НАТО беше да покажеме дека сме држава со институции на кои може да им се верува. Процесот на таканаречен ветинг којшто го работеа неколку институции не беше лесен. Понекогаш тие одлуки влијаеја дури и на одлуките на Владата или на претседателот. Меѓутоа, тој процес беше неопходен. И тој процес покажа дека партнерите и сојузниците, во Северна Македонија навистина имаат и знаење и искуство, имаат и сила да носат одлуки коишто се професионални. Дозволете ми во оваа прилика да се заблагодарам и на НАТО, но и на партнерските земји коишто ни помогнаа во овој процес и ни овозможија да ги научиме лекциите, да не ги учиме премногу на наши грешки, туку да изградиме солидни институции“, нагласи Шекеринска.
На настанот, во име на Агенцијата беа доделени благодарници на низ институции кои помогнале во работата и кои безрезервно пружиле поддршка во спроведувањето на реформите.
Благодарници беа доделени на премиерот Зоран Заев, министерот за внатрешни работи Оливер Спасовски, директорот на ОТА, итн.
Во име на наградените се обрати министерот Спасовски, кој истакна дека станува збор за безбедносна институција која претставува суштествен фактор во заштитата на безбедноста на сите наши граѓани.
„Пред две години во самиот зачеток на формирањето на Агенцијата за национална безбедност на сите нас ни беше јасно дека тоа претставува еден исчекор напред и е важен политички момент за нашата држава, кога Агенцијата беше формирана како самостоен, но законски строго регулиран дел од безбедносниот систем, наместо дотогашната Управа за безбедност и контраразузнавање при МВР.
Ваквата реформа на безбедносно-разузнавачките служби, која беше нужност согласно препораките од Извештајот на Рајнхард Прибе, овозможи формирање агенција по сите европски и НАТО-стандарди, модерна и демократска институција.
Денеска две години подоцна АНБ е етаблирана и почитувана институција како во рамки на нашата држава така и во светски рамки. Задоволство ми е да истакнам дека ние како МВР имаме одлична соработка со АНБ и токму таа меѓусебна координација резултираше со низа успешни акции. Убеден сум дека оваа одлична соработка во интерес на граѓаните ќе продолжи и во иднина и со тоа заеднички ќе придонесеме за безбедноста на државата“, заклучи Спасовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Алиу: Се зајакнуваат капацитетите на болницата во Прилеп, промовирана нова медицинска опрема во вредност над 50 милиони денари

Министерот за здравство Азир Алиу, заедно со заменик министерот Јовица Андовски, денеска ја посетија Општата болница во Прилеп по повод промоција на нова медицинска опрема, во вредност над 50 милиони денари.
– Со новата медицинска опрема се зајакнуваат капацитетите на оваа јавна здравствена установа. Поголем дел од опремата е наменет за одделението за гинекологија и акушерство и опфаќа современи апарати и нови гинеколошки столови, со што се создаваат подобри услови за работа и третман. Првпат во Прилеп воведуваме лапароскопија и хистероскопија, што претставува голем напредок во гинеколошко-акушерската здравствена заштита. Со тоа, пациентките повеќе нема да имаат потреба да патуваат во други градови за вакви интервенции, информираше министерот Алиу.
За гинеколошкото одделение е обезбеден дигитален електрокаутер – современ апарат за безбедни и прецизни хируршки интервенции и контрола на крварења. По повеќе од 15 години, целосно се обновени и гинеколошките столови за прегледи и породување, кои овозможуваат повисок стандард на удобност и сигурност за родилките и персоналот.
-Покрај новата опрема, во тек е и постапка за вработување 124 лица на неопределено време, од кои 21 доктор, 49 медицински сестри, 34 болничари, 6 физиотерапевти и друг медицински и немедицински кадар. Овие инвестиции претставуват уште еден значаен чекор во континуираната заложба на Министерството за здравство за унапредување на здравствената заштита и обезбедување современи услови за третман и дијагностика на пациентите, истакна Алиу.
Македонија
Министерството за култура: Дозволата за градба кај куќата на Владо Малески ја издало раководството на СДСМ

Министерството за култура и туризам остро ги отфрли обвинувањата од СДСМ во врска со оштетувањето на заштитениот објект – куќата-музеј на Владо Малески во Струга, оценувајќи ги како „неточни, тенденциозни и политички мотивирани“.
Од Министерството посочуваат дека решението за рушење на соседниот објект и изградба на нов, во сопственост на лице од струшкото село Велешта, е издадено на 17 јули 2023 година, во период кога институциите биле под раководство на СДСМ.
„Ова јасно покажува дека токму претходната власт, наместо да го штити културното наследство, го занемаруваше и игнорираше“, стои во реакцијата.
Од Министерството информираат дека веднаш по добивањето на информациите, стручен тим од Завод и музеј – Охрид извршил увид, а на терен е и инспекциската служба од Управата за заштита на културното наследство, која ја проверува состојбата со објектот.
Во соопштението се нагласува дека ресорот останува „посветен на вистинската заштита и унапредување на културното наследство“, додека, како што наведуваат, СДСМ рушеше објекти, а ги рушеше и јазикот, културата и идентитетот. Министерството порача дека културното наследство не смее да биде жртва на политички манипулации и дневнопартиски интереси.
Вчера беше објавено дека поради изградба на објект во Струга, оштетени биле ѕидот и кровот на куќата-музеј на Владо Малески, авторот на текстот на македонската химна, која е споменик заштитен како културно наследство. Од опозициската СДСМ обвинија дека тоа не е изолиран инцидент,туку резултат на системска незаинтересираност, институционална парализа и политичка неодговорност на власта предводена од ВМРО-ДПМНЕ.
Македонија
Јанков: Масовно излезете на 19 октомври и заокружете го бројот 9 за историска победа во Струмица

Петар Јанков, кандидат за градоначалник на општина Струмица од редовите на ВМРО-ДПМНЕ, денес се заблагодари за огромната поддршка која што ВМРО-ДПМНЕ ја добива од граѓаните во Струмица.
„Секојдневно сме меѓу вас, разговараме, добиваме огромна поддршка, благодарност за поддршката“, вели Јанков.
Јанков ги повика граѓаните на 19 октомври масовно да излезат, да го заокружат бројот 9, се со цел огромна победа во Струмица.
„Ве повикувам на 19 октомври масовно да излезете, да го заокружите бројот 9 и да извојуваме една голема победа во Струмица“, истакна Јанков.