Македонија се наоѓа пред сериозна одлука а изборите кои следат во себе не го носат изборот која партија ќе победи, туку каква иднина ќе се одбере, за себе и за своите семејства. Главниот проблем, е што државата е одземена од рацете на народот. Контролата е во стотина души кои управуваат со се во земјава, без одговорност, со многу криминал и корупција, изјави претседателот на ВМРО-ДПМНЕ, Христијан Мицкоски од митингот во Гостивар.

Мицкоски додаде дека нема поголем тендер од кој артановци, бујаровци, и зечевци не собираат процент.

– Тука во Гостивар на пола пат од Тетово се сликаа со лопатите, наместија бини, сечеа ленти за нови автопати дел од коридорите 8 и 10д, еве помина година дена, дупка не ископаа, не па автопат да изградат. Повеќе од 300 милиони евра исплатија во ветар. Таму подизведувач е омилената фирма на ДУИ, бидејќи ДУИ управува со државата наместо народот, потенцираше Мицкоски.

Мицкоски нагласи дека Артан, Бујар и Талат си се послужуваат со Македонија, затоа што имаме слаб СДСМ кој дозволувајќи го тоа скапо си ја купува власта, и деновите поминати во фотелја.

„И овие денови ги слушам оние обвинувања кои се редовен декор секогаш кога ДУИ е нападнато, поради криминал и корупција. Нападното е затоа што се фатени како ја ограбуваат Македонија. И не ги ограбуваат само Македонците. Ги ограбуваат сите, и Македонците и Албанците и Турците и Србите и Власите и Бошњаците, ја ограбуваат Македонија. Фатени во грабеж, обвинуваат дека сме имале против Албанците и затоа сме ги напаѓале“, изјави Мицкоски.

Посочи дека има против ДУИ кои ги злоупотребуваат, меѓу другото и Албанците и нивната мака.

– ДУИ која врз митот права за Албанците, и Артан, и Али направија милиони евра за себе, имаат имот како шеици од Саудиска Арабија, додека албанскиот народ гладува и се сели од Македонија. Најголемата злоупотреба овие дваесет години е состојбата со правата на Албанците кои овие криминалци од ДУИ се обидуваат кога се фатени во криминал да ја наметнат како тема. Секогаш кога тие зборат за ова, на своето конто си редат по уште еден милион народни пари, нагласи Мицкоски.

Оценио дека ДУИ тоа го прават затоа што се исплашени и знаат дека им доаѓа крајот на своето владеење.

– Ќе одат во опозиција, а таму ќе мора најпрвин да одговараат за криминалот, а потоа да се реформираат, рече тој.

Мицкоски нагласи дека бранот е создаден, иако работата не е завршена, мора да се излезе на гласање во вториот круг за да се победат сите сценарија на СДСМ и ДУИ заедно и дека таквите сценарија се победуваат само со голема излезност.

Лидерите на партиите кои се дел од Европскиот фронт на денешната средба во Струга заклучија дека првиот круг од претседателските избори на 24 април помина во мирна, фер и демократска атмосфера, а победата на Бујар Осман од 40.000 гласа над Арбен Таравари – кандидат на опозицијата, тоа е победа која уште повеќе ќе се продлабочи на 8 мај, на парламентарните избори кога Европскиот фронт ќе ја одбележи својата историска победа.

Во овој случај, бидејќи Европскиот фронт повеќе не е дел од претседателската трка во вториот круг од претседателските избори и бидејќи гласот на граѓаните за нас е свет и нивно право, Европскиот фронт наведува дека тоа е ексклузивна волја на граѓаните како што сакаат да го искористат ова право.

„Подолго време наназад, уште пред почетокот на кампањата, се чувствува огромна позитивна енергија која на 24 април се излеа на гласачките места. И вечерва тука, ја чувствувам истата, многу посилно. Можам да кажам дека, заедно со вас, правиме револуција со пенкало. Оваа енергија нека го достигне својот врв на 8 мај. Мора да почнеме поинаку да функционираме и да не молчиме пред неправдите. Мора да се обелоденуваат сите криминали и скандали. Мора да бидеме гласни, за да не станеме невидливи. Криминалот е тој кој треба да биде замолчен. Доста е! Стигнавме до се’ поизвесната победа. Победа врз најкриминалната власт досега. Им благодарам на сите кои ни се приклучија, ни се приклучуваат и допрва ќе ни се придружат. Не смее да дозволиме малцинство од криминалци да владее со мнозинството. Мафијата стана синоним за ДУИ и за СДСМ. Мафијата царува, додека народот пати“, кажа носителот на листата за пратеници на ВМРО-ДПМНЕ во ИЕ6, Дафина Стојаноска и додаде:

„Време е да ставиме крај на ова! Не дозволувајте да ве платат или заплашат. Ако ви нудат пари – тоа се ваши пари. Ако ви нудат многу пари – и тоа се ваши пари. Ако ви се закануваат – знајте дека после 8 мај ќе бидете заштитени од новата Влада која ќе ја формира ВМРО-ДПМНЕ. Затоа велам: сега или никогаш! Време е за победа над мафијата. Не им се плашете – казнете ги. Не бојкотирајте – реагирајте! Излезете масовно на гласање и да не дозволиме сценарија за некаква си политичка или финансиска криза. ДУИ и СДСМ најдобро „пливаат“ во време на кризи, додека народот го оставаат да се прпелка на суво. Не’ опљачкаа, не’ понижија и не’ изрезилија насекаде. Поставуваат замки кои, после поразот, треба да ги угушат промените кои народот со душа ги очекува“.

Стојаноска повика мултиетнички Гостивар да се обедини околу ВМРО-ДПМНЕ и така сплотени да и го зададат последниот удар на оваа власт.

„Да го казниме Али! Да го казниме Артан Груби! Таче од поодамна е веќе небитен. Мултиетнички Гостивар да се обедини околу ВМРО-ДПМНЕ и така сплотени да и’ го зададеме последниот удар на оваа криминална власт. Прво, ајде сите заедно да гласаме за професорката Гордана Силјановска Давкова, најумната и најдостојната Македонка во моментов, и да бидеме горди со нејзините и нашите успеси, а не – „како до сега“ – со поразителниот лик на Водно кој го изгуби тлото под нозете, кој не’ нарекуваше стока, кој го направи Гоце Бугарин и кој помилува криминалци кои ги трујат нашите деца со дрога“, рече Стојаноска и додаде:

„За парламентарните избори, јавно ве повикувам да гласате за бројот 2, за Миле, Дејан, Анета, Ердоган и за мене. Ние сме тие кои стоиме пред вас денес и ви ветуваме дека бројот 2 е за двојна победа над двојното криминално дуо. Бројот 2 е за 4 гласни и борбени пратеници. Пратеници кои никогаш нема да ве изневерат. Излезете на 8 мај и гласајте. Излезете и не го губете гласот за листите кои немаат доволно гласови за пратеник. Изгубените гласови во 6-та изборна единица помагаат исклучиво за пратеник повеќе од ДУИ. Да го испратиме Али во пензија. Доста му беше! Доста му беше уценување и заканување. Али, Груби, Заев и Таче веќе не смеат да ни се повторат. Вие, народот, ја имате историската улога и одлука овој пат. Ние и никој друг! Сега или никогаш“.

Стојаноска го повика народот за поддршка на Гордана Силјановска Давкова и ВМРО-ДПМНЕ и коалицијата „Твоја Македонија“.

„Гласајте за професорката Силјановска Давкова и за листата на ВМРО-ДПМНЕ и коалицијата „Твоја Македонија“. Само овие луѓе носат промени. Само овие луѓе можат да ја направат Македонија твоја и горда. Бидете учесници во историската победа над криминалот и корупцијата, и да си ја вратиме Македонија во рацете на луѓето. Да бидеме пример и надеж за младите. Да бидеме храбри и одлучни, какви што се тие, и да им ја обезбедиме иднината тука – во Македонија, ослободена од канџите на мафијашите од ДУИ и СДСМ. Нивниот крај е наш заеднички почеток. Почеток за горда Македонија. Почеток за твоја Македонија. Промените се во твои раце. Број 2 – за двоен пораз над криминалот. Број 2 – за двојна победа на ВМРО-ДПМНЕ со коалицијата „Твоја Македонија“ и Гордана Силјановска Давкова“, кажа Стојаноска.