Македонија
Објавен првиот прирачник за предавање контроверзни теми во училница
Предавањето и дискусијата на контроверзните теми сѐ уште претставува предизвик за наставниците од училиштата во нашата земја, па затоа дури 86 отсто од учениците никогаш немале можност да разговараат за тековни општествени прашања во рамките на образованието.
За да се надмине ваквата состојба, здружението LEAD го издаде првиот прирачник за предавање контроверзни теми во училница, наменет за наставници и целосно преведен на македонски јазик.
Прирачникот е наменет за професионален развој на наставници и е дизајниран за поддршка и унапредување на предавањето на контроверзни прашања во училиштата. Тој содржи конкретни алатки и техники за предавање и опфаќа разни теми, како што се религија, родови улоги, еднородителски семејства, сексуална определба, екстремизам и слични теми, во училница. Ваквиот пристап на предавање придонесува за подобрување на знаењата на учениците и за вклучување во дијалог ученици со разни ставови и вредности, што е од клучно значење за демократскиот процес и неопходно за заштита и зајакнување на демократијата и за негување на човековите права.
„Контроверзните теми, кои ги дефинираме како теми за кои постојат спротивставени мислења во општеството и будат силни чувства кај луѓето, е значајно да се дискутираат во рамките на образовниот процес за да се поттикне дијалог за нив и да се развие свест за важноста од дискутирање кај тие теми кај младите уште од најмала возраст. Избегнувањето на дискусиите на овие теми и недостигот на конструктивен дијалог за нив само води кон поделба на општеството и зголемување на меѓусебната нетрпеливост“, вели Илија Станковски, програмски директор на здружението LEAD.
Прирачникот „Предавање контроверзни прашања преку едукација за демократско граѓанско и човекови права“ е оригинално издаден од Советот на Европа и преведен на над 15 јазици во Европа. Македонската верзија на прирачникот е бесплатно достапна и може да се преземе од веб-страницата на LEAD на следниот ЛИНК.
Албанската верзија може да се преземе на следниот ЛИНК.
Прирачникот е изработен во рамките на проектот „Наставници за едукација, демократија и човекови права“, имплементиран од здружението LEAD, заеднички финансиран од Европската Унија и Советот на Европа во рамките на програмата „Демократска и инклузивна училишна култура во функција“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„ДКСК да покрене постапка против Битиќи, бара од фирмите на кои им исплаќал државна помош да гласаат за него“, вели ВМРО-ДПМНЕ
„ДКСК да покрене постапка против Битиќи, бара од фирмите на кои им исплаќал државна помош да гласаат за него, им сугерира и број на гласачко ливче. По објавениот документ од кој се гледа како Битиќи бара од компании да го поддржат затоа што им исплаќал државна помош тој требаше да се повлече од политиката“, велат од ВМРО-ДПМНЕ.
„Фактот што Битиќи не само што не се повлече, туку и не се извини, говори како СДС и ДУИ ја заробија државата и како 100тина функционери управуваат со државата како да е нивен личен имот.
ДКСК не смее да чека, да отвори случај и да се отвори постапка и пред другите институции.
Злоупотребите на институциите мора да запрат. По 8ми мај ќе се стави крај ма ваквите практики, а таквите како Битиќи ќе се соочат со одговорност“, соопшти ВМРО-ДПМНЕ.
Македонија
Променливо облачно и нестабилно со пороен дожд и грмежи
Времето денеска ќе биде променливо облачно и нестабилно со пороен дожд и грмежи, особено во источните делови. Локално процесите ќе бидат во форма на краткотрајно невреме со засилен ветер и услови за изолирана појава на град. Минималната температура ќе биде во интервал од 7 до 12, а максималната ќе достигне од 14 до 22 степени.
Во Скопје променливо облачно и нестабилно со пороен дожд и грмежи. Во делови од котлината ќе има услови за краткотрајно невреме со засилен ветер и изолирана појава на град. Минималната температура ќе се спушти до 10, а максималната ќе достигне до 21 степен.
Продолжува периодот на променливо облачно време со повремени локални врнежи од дожд, освен во недела кога ќе биде претежно стабилно и потопло. Во сабота ќе дува засилен северен ветер.
Македонија
Нема подолги задржувања за влез и излез од државата
Сообраќајот на државните патишта се одвива непречено, по влажни коловози, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.