Свет
Нови детали: Болдвин пукал од пиштол со кој пред снимањето гаѓале лименки?
Извор од екипата од снимањето на филмот „’Рѓа“ (Rust), за време на кое актерот Алек Болдвин ненамерно ја застрела камерманката Халина Хачинс, открива дека пред снимањето се пукало од оружје со вистински куршуми.
Како што пренесува Си-ен-ен, истрели биле испукани и од пиштолот што подоцна му бил предаден на Болдвин. Тимот пукал во празни лименки пиво, што во САД е популарно наречено plinking.
Нови детали од филмскиот сет за Си-ен-ен открила Шерон Воксман, основачка на шоубиз-порталот The Wrap, повикувајќи се на нејзин доверлив извор од сетот.
Таа објаснила дека тимот на филмските сетови на тој начин често вежбал пукање користејќи вистински куршуми. Нејзиниот портал дознал дека тие го правеле истото тоа на денот кога Хачинс беше застрелана во градите, а ранет беше и режисерот Џоел Соуза.
Си-ен-ен се огради од наводите на тој портал зашто во моментот не може да ги потврди, а продуцентите на филмот го повториле она што веќе го кажаа – дека безбедноста на актерите и тимот зад камерите е приоритет. Тие истакнале дека соработуваат со полицијата и дека не знаат за поплаките во врска со безбедноста на оружјето и реквизитите на снимањето, односно дека ќе ги испитаат нивните безбедносни процедури, додека снимањето е прекинато.
По трагедијата, американските медиуми објавија дека неколку дена претходно на сетот случајно било пукано од пиштол и тоа неколкупати, но дека нема повредени и дека не е јасно дали во тие ситуаации имало вистински куршуми во пиштолите.
Наводно, неколку членови на тимот го напуштиле сетот поради грижа за сопствената безбедност.
Соуза откри дека Болдвин вежбал извлекување на пиштолот и дека го вперил оружјето во камерата по што истрелал куршум, од кој загина камерманката на сетот, а тој беше ранет. Режисерот додава дека слушнал звук како свиреж и силен бум додека стоел зад застреланата Хачинс, се вели во извештајот на прелиминарната истрага.
Во истиот документ се наведува дека Хачинс била погодена во градите, а неколку часа подоцна била прогласена за мртва. Снимателот Рид Расел изјави дека инцидентот не бил снимен бидејќи екипата само се подготвувала за снимање.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Три лица затрупани во лавина на глечер во Австрија
Лавина го погоди глечерот Штубај во австриски Тирол утрово, а три лица се затрупани, објави „Кронен цајтунг“.
Почната е спасувачка операција.
Според Рајнхард Клир, раководител на жичницата на глечерот, несреќата се случила во зоната надвор од пистата, во близина на превојот Дауншарте околу 9.30 часот утрово.
„Врз основа на моментните информации, снежните маси делумно стигнале до долниот дел од деветтата патека, која потоа била затворена“, рече Клир.
Двајца делумно затрупани скијачи веќе се спасени.
Забележано е дека неколку скијачи надвор од пистата отвориле воздушни перничиња за лавина.
На терен има неколку хеликоптери за итни случаи, вклучувајќи ги „алпин 2“, „мартин 2“ и „либеле тирол“, како и екипи за планинско спасување од Нојштифт им Штубај и Зелден со кучиња трагачи, пренесува „Танјуг“.
Фото: ЕПА
Свет
Унгарскиот министер: Украина би донела опасност и мафија во ЕУ, земјите од Западен Балкан треба да бидат приоритет
Унгарскиот министер за надворешни работи Петер Сијарто во Бања Лука повтори дека владата на Виктор Орбан се спротивставува на приближувањето на Украина кон ЕУ. Тој изјави дека единствен приоритет на Унгарија е интеграцијата на земјите од Западен Балкан.
„Европските интеграции звучат како лоша шега ако во Брисел мислат дека Украина е поспремна за членство од Западен Балкан. Земјите од регионот се подготвени и би придонеле економски, а Украина носи само опасност, војна и украинска мафија“, рече Сијарто.
Тој додаде дека стабилноста на Западен Балкан е од клучно значење за националната безбедност на Унгарија и најави продолжување на соработката со Република Српска.
Сијарто требал да допатува во Бања Лука со воен авион, но министерот за одбрана на БиХ, Зукан Хелез, го забрани летот обвинувајќи ја унгарската влада дека ја поддржува политиката на Милорад Додик, која го доведува во прашање опстанокот на БиХ.
Поради забраната, Сијарто слета со изнајмен цивилен авион.
Свет
Лукашенко до Зеленски: Сега ги имате Одеса и Миколаев, а набргу можете да ги изгубите
Мировниот план на американскиот претседател Доналд Трамп беше набрзина составен, изјави белорускиот претседател Александар Лукашенко на маргините на ОДКБ во Киргистан. Во таа пригода тој му се обрати и на Владимир Зеленски.
„Сакам веднаш да кажам – и се надевам дека тимот на Трамп нема да се навреди – беше набрзина составен. Не сакам да кажам дека беше направен преку колена, но беше набрзина составен. Мора да се презентира во лесно сварлива форма. Сè мора да се разработи до метар, километар, до последен детаљ“, рече Лукашенко.
Како што истакна, во средата разговарал за американскиот мировен план за Украина со својот руски колега Владимир Путин. Според него, Путин му презентирал две верзии на планот.
„Владимир Владимирович ми ги презентира и првата и втората верзија, која беше поделена на делови“, рече претседателот на Белорусија.
Тој верува дека нема победници во украинскиот конфликт, а ако има, тоа нема да биде Европската Унија.
„Мораме да ја завршиме оваа војна. Се плашам дека нема да има победник во оваа војна: тоа е катастрофа. Знаете зошто, ако нема. Но, ако има победник, тоа нема да биде Европската Унија ако Америка ги напушти“, рече тој, пренесува „Спутник“.
Тој му се обрати на шефот на киевскиот режим, Владимир Зеленски.
„Ако сакате да ја задржите Украина во нејзините сегашни граници, мора да преговарате, а не да ги торпедирате преговорите“, рече Лукашенко.
„Размислете, почнувајќи од реалната ситуација, како да го зачувате она што го имате. Имате пристап до морето – и до Одеса, која е ваша, и до Миколаев, а тоа може да исчезне во еден момент. Затоа е потребно добро да се измери сè и да се донесе добро осмислена одлука“, додаде белорускиот лидер.
Фото: ЕПА

