Македонија
Стоилковски: Два месеци нема ништо конкретно од истрагата за пожарот во болницата во Тетово
Два месеци нема ништо конкретно од истрагата за тоа чија е одговорноста за тоа што болница полна со пациенти за три минути се пеплоса, рече портпаролот на ВМРО-ДПМНЕ, Наум Стоилковски.
„По два месеци, Обвинителството сè уште нема утврдено кривична одговорност за избувнување на пожарот на 8 септември кога живи изгореа 14 лица. Истрагата не покажала, цитирам: „Ништо конкретно“ ова се зборовите на ЈО Вилма Русковска, дадена за една национална телевизија. Два месеци нема ништо конкретно за одговорност поврзана со користените материјали за градба на болницата. Ништо конкретно за одговорност поврзана со противпожарните протоколи во болницата. Ништо конкретно за одговорноста за посетите на роднините во објект, внимавајте – Ковид центар.
Ништо конкретно за несоодветна инсталација, за присуство на кислородни боци каде што имало и електрични апарати со висок напон, ништо конкретно за било што коешто води до одговорност кон Венко Филипче, Илир Хасани, Шахпаска, Анѓушев или било кој друг поврзан со градбата на модуларните болници, за било кого од луѓето на режимот на Зоран Заев и СДСМ.
Два месеци ништо конкретно од истрагите на ЈО, истрагата на пет јавни обвинители од Скопје и од Тетово, нема ништо конкретно од истрагата на МВР кое води паралелна истрага, ниту конкретно од било која институција за најтраорната трагедија во современата македонска историја.
14 луѓе на коишто ниту имињата не им ги соопштуваа живи изгореа за неполни три минути. Ништо конкретно по два месеци истрага!
Режимот и по два месеци продолжува да убедува дека „конкретно“ сета вина лежи во продолжен кабел! Ова е повеќе од срамно,ова е најголемата трагедија од најтраорната ноќ во современата македонска историја!
Обвинија кабел, ништо друго конкретно од истрагата. Обвинија кабел за Венко Филипче и Зоран Заев да се спасат.
Нема полошо од режимот на СДСМ; за Македонија нема ништо полошо од Зоран Заев“, изјави портпаролот на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Уапсен врховен судија поради сомненија за примање поткуп
Врховниот судија Наке Георгиев е уапсен поради сомнеж за примање поткуп.
„Денеска 20 мај, лишен од слобода е судија од Врховниот суд поради сомневања за сторено кривично дело Примање награда за противзаконито влијание. Судијата е лишен од слобода на лице место при извршување на кривичното дело. Се чекаат натамошни насоки од надлежен јавен обвинител“, велат од МВР.
Засега не е позната локацијата каде што е приведен судијата, ниту пак, за колкава сума станува збор.
Македонија
Сиљановска доби честитка од кралот Чарлс
Претседателката Гордана Сиљановска Давкова денеска го прими амбасадорот на Обединетото Кралство на Велика Британија и Северна Ирска, Метју Лосон.
На средбата беа разменети мислења за севкупните билатерални односи меѓу двете држави, при што претседателката Сиљановска Давкова истакна дека нашата држава придава особено значење на развојот на пријателските односи и соработката со Обединетото Кралство, вклучувајќи го сојузништвото во НАТО алијансата. Претседателката Сиљановска Давкова посочи на нејзината подготвеност за натамошно унапредување на билатералната соработка со Обединетото Кралство во сите сфери од заемен интерес.
Претседателката Сиљановска Давкова истакна дека како држава особено ја цениме британската поддршка во исполнувањето на стратешката цел – членство во Европската Унија, која продолжи и по Брегзит.
Амбасадорот Лосон на претседателката Сиљановска Давкова и предаде честитка од Кралот Чарлс Трети по повод нејзиното стапување на функцијата, во која упатува најискрени честитки за нејзиниот избор.
„Уверен сум дека ќе го вложите целиот Ваш капацитет за време на Вашиот мандат како Претседател за справување со големите предизвици на нашето време, почнувајќи од справувањето со климатските промени до продлабочувањето на евроатлантската интеграција на Северна Македонија. Многу сум задоволен што нашите две земји имаат воспоставено цврсти трговски и безбедносни односи. Оттука, се надевам дека за време на Вашиот мандат како Претседател односите, кои се веќе толку блиски, уште повеќе ќе се продлабочат“, се вели во честитката од Кралот Чарлс Трети.
Македонија
Сиљановска Давкова се сретна со украинската амбасадорка Дир
Претседателката Гордана Сиљановска Давкова денеска ја прими амбасадорката на Украина, Лариса Дир.
На средбата, беше изразено задоволство од традиционалните пријателски односи, засновани на заемна почит и меѓусебно разбирање. Претседателката Сиљановска Давкова ја нагласи нејзината заложба за продлабочување на соработката во сите области од заеднички интерес, реафирмирајќи ја поддршката за Украина против руската агресија, со која се поткопува европската глобална безбедност и стабилност.
Двете соговорнички разменија мислења и за стратешките определби и перспективите на двете земји, истакнувајќи ја потребата од натамошна заемна помош, споделување искуства и експертиза. Претседателката Сиљановска Давкова ја нагласи македонската поддршка за Украина на нејзиниот пат кон Европската Унија и НАТО.
Амбасадорката Дир, упатувајќи честитки за изборот на претседателката Сиљановска Давкова ѝ посака успешно извршување на функцијата.