Милијардерот Илон Маск одржал приватни разговори со сојузниците за можните начини за соборување на британскиот премиер Кир Стармер пред следните општи избори, објави Фајненшл тајмс.

Маск, најбогатиот човек на светот и близок соработник на новоизбраниот американски претседател Доналд Трамп, минатиот месец ја поддржа германската антиимигрантска партија пред изборите закажани за февруари и постојано ја коментираше британската политика, барајќи оставка од премиерот Кир Стармер.

Маск размислувал како тој и неговите сојузници би можеле да ја дестабилизираат лабуристичката влада и побарал информации за градење поддршка за алтернативните британски политички движења за да се урне владата, се вели во извештајот на весникот, цитирајќи луѓе запознаени со ова прашање, пренесува Ројтерс.

Маск не одговори на барањето на Ројтерс за коментар.

„Неговиот став е дека самата западна цивилизација е под закана“, изјави еден извор за весникот.

Маск претходно го обвини Стармер дека не ги гонел групите мажи кои силувале млади девојки додека Стармер бил главен британски обвинител меѓу 2008 и 2013 година.

Маск треба да биде домаќин на лидерката на партијата Алтернатива за Германија, Алиса Вајдел во интервју во живо на социјалната мрежа „Икс“ во четврток. Најавено е дека ќе разговараат за слободата на говорот и други теми по поддршката на технолошкиот милијардер за германската крајнодесничарска партија на претстојните општи избори во Германија, пренесе ДПА.

Германската партија поддржана од Маск е означена како десничарска и екстремистичка од германските безбедносни служби. Кампањата на извршниот директор на Теска за „АДФ“, во комбинација со навреди кон врвни германски политичари, со недели е извор на контроверзии. Критичарите го обвинуваат дека го искористил својот огромен дострел за да влијае на исходот од изборите во Германија на 23-ти февруари.

Пораките на Маск на „Икс“ допираат до повеќе од 210 милиони корисници ширум светот. Претходно оваа недела, норвешкиот премиер Јонас Гар Стоере изрази загриженост за мешањето на Маск во политиката на другите земји, а со него се согласија и францускиот претседател Емануел Макрон и германскиот канцелар Олаф Шолц.

Повеќе од 130.000 луѓе беа принудени да се евакуираат поради пожарот, додека ветровите дополнително придонесуваат за негово ширење, а како што пренесува „Еј-би-си њуз“, најлошо било во една од најбогатите населби во САД, Пацифик Палисадес.

Актерот Били Кристал и неговата сопруга Џенис изјавиле дека ја изгубиле куќата во таа населба.

„Зборовите не можат да го опишат обемот на уништувањето. Чувствуваме тага за нашите пријатели и соседи кои исто така ги загубија своите домови и бизниси во оваа трагедија. Џенис и јас живееме во таа куќа од 1979 година. Ги одгледавме нашите деца и внуци таму. Секој дел на нашиот дом беше исполнет со љубов“, рече тој.

Во пожарот домот го загуби и американската актерка и милијардерка Парис Хилтон.

„Скршена сум од тага. Седам со моето семејство, гледам вести и го гледам нашиот дом во Малибу како гори до темел на телевизија – нешто што никој не треба да го доживее“, напиша Хилтон додека ги споделуваше извештаите на локалните медиуми за пожарот.

Таа се присети на спомените што ги имала во куќата, истакнувајќи дека таа е посебно место за нејзините две мали деца.

„Оваа куќа беше местото каде што изградивме толку многу скапоцени спомени. Тоа беше местото каде што Феникс ги направи своите први чекори и тоа беше местото каде што сонувавме да создадеме безброј спомени со Лондон“, продолжи Хилтон.

Изгоре и вилата во Лос Анџелес на актерот Адам Броди и неговата сопруга, актерката Лејтон Мистер. Вилата вредна 6,5 милиони долари целосно изгоре, пожарот ги зафати сите соби.

Актерката Џејми Ли Кертис рече дека нејзиниот дом е безбеден, но дека целата населба ја нема.

„Толку многу луѓе изгубија сè. Помогнете каде можете. Ви благодариме на спасувачките тимови и пожарникарите”, напиша Кертис на Инстаграм.

Синот на актерската двојка Том Хенкс и Рита Вилсон, Чет Хенкс, на Инстаграм напиша дека населбата во која пораснал гори до темел.

Актерката Менди Мур се справува со пожарот во Итон, каде на 52.000 луѓе им е наредено да се евакуираат.

Нејзиниот дом се наоѓа во населбата Алтадина, а актерката им се заблагодарила на пријателите кои на нејзиното семејство му обезбедиле сместување за време на евакуацијата.

Шпанската спасувачка служба денеска соопшти дека оваа недела на гумен чамец со мигранти на пат кон Канарските острови се родило машко бебе и објави фотографии од новороденчето, неговата мајка и десетици други мигранти.

Спасувачките служби пред два дена го забележале чамецот покрај брегот на островот Лансароте, а мајката и бебето биле пронајдени во добра состојба, јавува Ројтерс.

„Беше изненадувачки (што најдовме) бебе кое беше родено 10, 15 или 20 минути порано. Жената лежеше на подот на преполниот чамец додека бебето беше во прегратките на некој друг во нејзина близина“, изјави Доминго Трухиљо, капетанот на спасувачкиот брод.

Тој рекол дека потоа го зел бебето во раце и го тапкал по грбот, по што момчето престанало да плаче.

Во чамецот имало вкупно 60 луѓе, меѓу кои 14 жени и четири деца.

На Канарските острови од Западна Африка минатата година пристигнале рекорден број мигранти, поточно 46.843 лица, што претставува зголемување од 17 отсто во однос на 2023 година.

Според проценките на Министерството за внатрешни работи во Мадрид, околу 5.800 малолетници пристигнале на Канарските острови без придружба на возрасен во 2024 година, што предизвика спор меѓу регионалните заедници за нивната грижа, пишува Pais.

Невладината организација Каминандо Фронтерас соопшти дека во 2024 година вкупно 10.457 луѓе загинале обидувајќи се да стигнат до шпанскиот брег преку Медитеранот.