Македонија
ЗНМ бара OJO да ја отфрли кривичната пријава кон Момировски и Милосављевиќ
Здружението на новинарите на Македонија (ЗНМ) бара од Основното јавно обвинителство (ОЈО) во Скопје да ја отфрли кривичната пријава од Агенцијата за разузнавање за новинарите Горан Момировски и Драган Милосављевиќ. Пред извесно време Момировски и Милосављевиќ беа поканети за давање исказ во ОЈО, а повод за ова е емисијата што се емитува на ТВ „Алфа“ со наслов „Заспиј ако можеш“ од 11 јануари 2021 година.
„Укажуваме дека кривичен прогон кон новинари за дела за кои се предвидуваат повеќе години затвор, особено од страна на безбедносни структури, може дополнително да ја загрозат и така кревката слобода на изразување во нашата земја. Вакви постапки може да се толкуваат како притисок кон јавна критика, особено земајќи предвид дека оваа емисија е објавена во јануари 2021 година, а засегнатите се повикани на давање исказ во ОЈО кон крајот на ноември или речиси девет месеци подоцна. Цениме дека новинарите имаат и право и обврска да се занимаваат и со теми што се поврзани со националната безбедност почитувајќи ги во целост етичките и професионалните стандарди во работењето и следејќи го јавниот интерес“, велат од ЗНМ.
Здружението укажува дека доколку Агенцијата за разузнавање или која било друга институција има незадоволство од начинот на кој новинарите или медиумите известуваат за нивната работа, треба да ги користат само/регулативните механизми.
Поднесување претставки до Советот за етика или Советот на честа, велат од ЗНМ, е најдобар начин да се утврди дали известувањето е во согласност со етичките принципи и стандарди на новинарската професија.
ЗНМ додава дека кривичните тужби кон новинари беа честа пракса во минатото и поради нив Македонија драстично падна на сите кредибилни индекси за слободата на изразување и беше перципирана како држава во која слободата на изразување и правото на информирање е ограничено.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Каевски од голтар до милионер, фатен како прави милионски проневери како директор на Агенцијата за млади и спорт, велат од ВМРО-ДПМНЕ
Каевски од голтар до милионер, фатен како прави милионски проневери како директор на Агенцијата за млади и спорт, велат од ВМРО-ДПМНЕ.
„Дарко Каевски како директор на Агенцијата за млади и спорт заобиколувајќи ги законските процедури извршил распределба на пари преку така наречените ваучери до клубови и федерации, кои одредена фирма ги реализирала под услов дел од парите да ги добие назад преку даночно ослободување“, дополнуваат од ВМРО-ДПМНЕ.
Според нив, Каевски е фатен на дело, и веќе на сите им е јасно зошто излегувал и ширел лаги и манипулации во јавноста.
„Тоа се кадрите на СДС, како Дарко Каевски, вмешани во криминал и корупција. Време е Македонија да се ослободи од криминалците како Каевски. Време е да ја вратиме Македонија на народот. Македонија повторно твоја“, завршуваат од ВМРО-ДПМНЕ.
Македонија
Нестабилно време со пороен дожд, грмежи и ветер
Времето ќе биде променливо облачно, од пладневните часови на повеќе места нестабилно со пороен дожд и грмежи, локално во форма на краткотрајно невреме со засилен ветер и услови за изолирана појава на град. Услови за пороен дожд ќе има во текот на ноќта, соопшти УХМР.
Минималната температура ќе биде во интервал од 6 до 12, а максималната ќе достигне од 18 до 25 Целзиусови степени.
Во Скопје ќе биде променливо облачно. Од пладневните часови во делови од котлината ќе биде нестабилно со пороен дожд, грмежи, засилен ветер и услови за изолирана појава на краткотрајно невреме. Минималната температура ќе се спушти до 12, а максималната ќе достигне до 23 степени.
Следува период на променливо облачно време со повремени локални врнежи од дожд. Утре, во ноќта кон петок и во петок на повеќе места ќе има развој на нестабилна облачност проследена со пороен дожд и грмежи, локално во форма на краткотрајно невреме со засилен ветер и услови за изолирана појава на град. Дневната температура од утре до сабота ќе биде во постепено опаѓање, а во недела ќе се покачи за 2 до 4 степени.
Скопје
Без струја дел од корисниците на Волково и Кучково
Дел од корисниците на Волково и Кучково во Општина Ѓорче Петров од 7 до 16 часот ќе немаат електрична енергија.
Како што информира Регионалниот центар за управување со кризи на Град Скопје, по добиеното известување од ЕВН, прекинот на струја е поради технички зафати во електродистрибутивната мрежа.