Македонија
(Видео) Општините да се вклучат во интеграција на Ромите и решавање на предизвиците со кои се соочуваат
„Денес е Меѓународниот ден на човековите права. Се радувам што со оваа денешната конференција ја испраќаме пораката за еднаквост во правата, слободата и пристапот до ресурси на сите граѓани, вклучително и Ромите“, рече министерката за труд и социјална политика, Јагода Шахпаска, на конференцијата „Промовирање добро владеење и зајакнување на Ромите на локално ниво“. Конференцијата е организирана од Програмската канцеларија на Советот на Европа во Скопје и тимот на Роми и патници од Стразбур, во тесна координација со Министерството за труд и социјална политика и Делегацијата на ЕУ во Северна Македонија.
Градоначалниците на општините Берово, Битола, Прилеп, Кочани, Штип, Струмица, Крива Паланка, Шуто Оризари, Гостивар, Кичево, Тетово, Дебар, Велес, Виница и Делчево, а кои вклучени во втората фаза од имплементацијата на програмата РОМАКТЕД II, денеска потпишаа меморандум за разбирање помеѓу Советот на Европа и Министерството за труд и социјална политика.
Според министерката Шахпаска, програмата РОМАКТЕД II е дизајнирана за да гради политичка волја и одржлив ангажман на политиката на локалните власти, а нејзината цел е да го зајакне демократското локално управување, да изгради капацитет и да го стимулира зајакнувањето на локалните ромски заедници. Во таа насока, смета Шахпаска, вклучувањето на единиците на локалната самоуправа во интеграцијата на Ромите на локално ниво е клучно за полесно и побрзо адресирање и решавање на реалните проблеми и предизвици со кои се соочува оваа група граѓани.
„Нашите пријатели Роми го збогатуваат спектарот на различности во нашето општество и со својата различност креираат нови предизвици. Јакнењето на Ромите преку обуки, градење вештини и капацитети и нивно организирано вмрежување придонесува за решавање на проблемите во локалната заедница.
Затоа е неопходно подобрување и зголемување на посветеноста на институциите, капацитетите, знаењето и вештините за вклучување на Ромите применувајќи ги концептите на добро управување. Локалните политики кои ја таргетираат ромската заедница се во тесна врска со централните политики за унапредување на животот на ромската заедница. Притоа не само Министерството за труд и социјална политика туку и Министерството за локална самоуправа и Министерство за образование и наука се клучни актери за стратегиите за Ромите“, рече министерката Шахласка.
Таа смета дека Република Северна Македонија во регионот, па и пошироко, стана пример за земја со традиционално меѓуетничка и меѓурелигиска толеранција и земја во која се почитуваат разликите.
„Тоа го постигнавме преку политики што обезбедуваат еднаков степен на вклученост и интеграција на сите етнички заедници. Впрочем, тоа е концептот едно општество за сите, што го промовира Владата на Република Северна Македонија и кој стана општоприфатен во земјата. Подготовката на заеднички локални планови, јакнење на капацитетите на претставниците на советите на општините, поддршката на локалниот развој, ќе придонесат за успешни политики за инклузивност. Како заедничка програма на Советот на Европа и Европската комисија, РОМАКТЕД ќе промовира добро владеење и јакнење на Ромите на локално ниво“, рече Шахпаска.
Програмата РОМАКTЕД II е продолжување на РОМАКTЕД I, а Министерството за труд и социјална политика успешно ја спроведе и РОМЕД-програмата, со што ја внесе Република Северна Македонија на листата на земји со најуспешна имплементација на таа програма.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Маркетите се обидуваат да го заобиколат законот и да остварат профит, вели Трајковски и најавува казни
„Маркетите за многу краток период извадија нови производи само за да ја избегнат Одлуката за ограничување на маржите. Се обидуваат на секаков начин да го заобиколат законот и да остварат профит. Имаат празни рафтови и не се снабдени доволно со производите опфатени со Одлуката. Вршат и големи притисоци врз добавувачите“, рече денеска на прес-конференција директорот на Државниот пазарен инспекторат (ДПИ) Горан Трајковски, најавувајќи строги казни.
Екипите на ДПИ, нагласи Трајковски, се секојдневно на терен и вршат контроли. Тој на прес-конференција извади и неколку млечни производи, објаснувајќи дека маркетите на купувачите не им ги нудат оние пакувања кои претходно ги имало и кои се опфатени со Одлуката за маржите, туку некои други, со помала грамажа.
„Ќе казнуваме, за никого нема да има компромис, законот ќе важи и мора да важи за сите. Им порачувам и на трговците на мало и на трговците на големо, да не се обидуваат да ги заобиколуваат законите за да не ја почитуваат Одлуката. Тоа нема да го дозволиме. Мора да имаме правичен систем и секој што сака да е дел од него е добредојден, но секој што ќе се обиде да го заобиколи, ќе биде најстрого казнет. И денеска имаме екипи на терен, а за грамажата ќе се консултираме и со АХВ. Ќе постапуваме најригорозно, зашто навистина има обиди да се заобиколат законите. Не викам дека не треба да има 194-грамско кафе. Во Одлуката е опфатено 200-грамското, нека има и од 194, но мора да го има и тоа од 200 грама. Со Одлуката е опфатен и лебот од 450 грама. Има големи добавувачи, апелирам до нив, бидејќи имаат 470-грамски леб, да произведат и 450-грамски леб. Освен кај кафето и кај киселото млеко наоѓаме 300 грамско пакување, иако со Одлуката е опфатено 400-грамско. Можно е ваквите производи да се запленат“, истакна директорот.
Според него, големите маркети и со Одлуката за маржите успеваат да остварат профит, па оттука е најсно зошто се обидуваат да ги заобиколат законите.
„Тие се десет милиони евра во добивка и покрај замрзнувањата и намалувањата. Не знам зошто ова го прават кога пак ќе остварат профит“, рече директорот.
Од донесувањето на Одлуката за ограничувањето на маржата до 10 отсто ДПИ извршил преку 500 надзори кај над 73 категории производи и издал над 30 прекршочни платни налози во вредност од над 4,3 милиони денари.
„Од почетокот на Одлуката до четвртокот беа издадени прекршочни платни налози од над два милиона денари, а само во четвртокот исто така беа издадени налози од над два милиона зашто во средата се увиде дека трговците на мало, големите ланци маркети, имаат празни рафтови и не се снабдени доволно со количините призводи како што е наведено во Одлуката. Тоа нема да го дозволиме. Се додека сум директор на ДПИ, им порачувам на трговците на мало и на големо, да не се обидуваат да ги заобиколуваат зкаоните за да не ја почитуваат Одлуката. Имам информации и дека неколку големи ланци маркети вршат големи притисоци врз добавувачите како да ги заобиколат законите и да остварат профит. Трговците на големо (снабдувачите) да не потклекнуваат на притисоците што ги вршат неколку од големите маркети за да ги заобиколат законите и да не ја почитуваат Одлуката“, подвлече Трајковски.
Тој апелира до трговците, ако имаат простор, да ги намалат цените и на другите производи освен оние опфатени со Одлуката за маржите.
Македонија
Со вонреден инспекциски надзор ќе се утврдува дали има пропусти во лекувањето на починатото бебе
Во Клиничкиот центар ,,Мајка Тереза” во Скопје утрово починало 14-месечно бебе. Директорот на Државниот санитарен и здравствен инспекторат (ДСЗИ) Кирил Лазов вели дека ќе изврши вонреден инспекциски надзор во здравствените установи каде починатото бебе било претходно лекувано, со цел да се утврди вистинитоста за евентуални пропусти во лекувањето.
Државниот санитарен и здравствен инспекторат (ДСЗИ), согласно надлежностите, ќе изврши вонреден инспекциски надзор во здравствените установи, каде починатотото бебе било претходно лекувано.
Како што веќе објавивме, рано утринава на Клиниката за детски болести во Клиничкиот центар „Мајка Тереза“ во Скопје, почина 14-месечно девојче.
Околу 04.50 часот на Детската клиника во Клинички центар „Мајка Тереза“, (В.С.) 29-годишен маж од село Гошинце и неговиот брат, оштетиле инвентар во болницата откако починало детето на В.С., информира МВР.
Бебето било донесено со Итна медицинска помош во болницата околу 03.45 часот, а причините за смртта дополнително ќе се утврдуваат.
„Денеска (05.10.2024) во СВР Скопје е пријавено дека околу 04.50 часот на Детската клиника во Клинички центар ‘Мајка Тереза’ В.С. (29) од с. Гошинце и неговиот брат Б.С. (35) од с. Гошинце оштетиле инвентар во болницата откако починала едногодишната ќерка на В.С., која, според пријавеното, била донесена со Итна медицинска помош во болницата околу 03.45 часот. Се преземаат мерки за расчистување на настанот“, велат од МВР.
Македонија
Во понеделник неколку улици во Скопје ќе бидат затворени поради посетата на Вучевиќ
Во понеделник во Скопје ќе има посебен режим на сообраќај поради официјалната посета на претседателот на Владата на Република Србија, Милош Вучевиќ, соопшти МВР.
„СВР Скопје ги известува граѓаните на Скопје дека на 07.10.2024 (понеделник) поради официјална посета на претседателот на Владата на Република Србија, Милош Вучевиќ, Единицата за безбедност на патниот сообраќај при СВР Скопје ќе преземе мерки за посебен режим на сообраќајот по сообраќајниците на поширокото централно подрачје на град Скопје“, се наведува во соопштението.
СВР Скопје апелира до граѓаните да ги почитуваат наредбите што ги издаваат полициските службеници.