Македонија
Радев: Северна Македонија треба да го промени Уставот и да не ги дискриминира македонските Бугари
Република Северна Македонија треба да го промени својот устав. Ова го изјави бугарскиот претседател Румен Радев за „Еурактив“. Според него, ова ќе биде чекор кон решавање на спорот меѓу Софија и Скопје.
„Се верува дека сме во процес на повторно преговарање за Договорот за пријателство и добрососедство, но не сме. Ние сме во процес на барање начин за подобро спроведување на овој договор. Договорите треба да се почитуваат. Ова е главен услов за членство во ЕУ“, рече претседателот.
Нашата најголема грижа, рече Радев, е што Република Северна Македонија не ги применува основните принципи и вредности на ЕУ, како што се човековите права, недискриминацијата.
„Пред четири години верувавме дека договорот ќе ги реши проблемите во билатералните односи, на ист начин како што тоа го правеше и Договорот од Преспа (меѓу Македонија и Грција), но денес гледаме заостаток по сите точки во него. Говорот на омраза против Бугарија се интензивира, не гледаме политичка волја за отстранување на навредливи текстови во учебниците, не гледаме политичка волја да се запре фалсификувањето и уништувањето на бугарското културно и историско наследство во овој дел од светот“, рече Румен Радев.
Според него, дискриминаторскиот третман на македонските Бугари трае со децении.
„Денес над 120.000 македонски граѓани имаат и бугарско државјанство. Тие не се само бугарски државјани, туку и државјани на ЕУ, а тоа значи многу кога зборуваме за човекови права“, нагласи Радев.
Бугарскиот претседател додаде и дека македонските Бугари мора да бидат третирани подеднакво со сите други групи на луѓе споменати во уставот. Тоа е прашање на принципи, вели бугарскиот претседател, а не на преговори.
На Северна Македонија ѝ требаа 6 месеци да го спроведе Договорот од Преспа, дури и го сменија името. Зошто е толку тешко да се додаде еден единствен збор – „Бугари“, праша шефот на државата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одлуки за учество на припадници на Армијата на вежби во Германија, Бугарија, Косово
Владата на денешната седница донесе и повеќе одлуки на предлог на Министерството за одбрана, меѓу кои и за испраќање на припадници на Армијата на Република Северна Македонија за учество на вежбата „BEYOND HORIZON 24“, во Република Бугарија, за испраќање на припадници на Армијата на Република Северна Македонија за учество во НАТО операцијата „КФОР“ во Република Косово и за испраќање на припадници на Армијата на Република Северна Македонија за учество на вежбата „Combined Resolve 24-2“ во Сојузна Република Германија.
Македонија
Личните документи ќе можат да се подигнат и в среда, извести МВР
Во пресрет на претстојните Претседателски и Парламентарни избори што ќе се одржат утре, Министерството за внатрешни работи ги известува граѓаните дека Одделот за граѓански работи, односно сите отсеци за управни работи на оваа организациона единица при МВР на 08.05.2024 ќе работат за издавање на лични документи со работно време од 08.00 до 19.00 часот.
„Исто така ги известуваме граѓаните дека сите барања за лични карти кои се поднесени до 03.05.2024 година, се веќе изготвени и граѓаните можат да ги подигнат“, соопшти МВР.
Македонија
Пронајдени три полуавтоматски пиштоли и 139 куршуми, ОЈО Велес отвори истрага за недозволено држење оружје
Основното јавно обвинителство Велес донесе Наредба за спроведување истражна постапка против едно лице за кривично дело – Неовластено изработување, држење, посредување и тргување со оружје или експлозивни материи од член 396 став 5 во врска со став 3 на Кривичниот законик.
„При претрес во домот на осомничениот во селото Мелница, општина Чашка, полицијата пронашла поголемо количество оружје и муниција – три полуавтоматски пиштоли и 139 куршуми со различен калибар. За осомничениот поднесен е предлог за определување мерка притвор“, соопшти Обвинителството.
ОЈО Велес продолжува да постапува и да презема дејствија за проверка на сомненијата за изборен поткуп во однос на овој осомничен и на уште едно лице во велешко кај кое во текот на вчерашниот ден беа извршени претреси, се додава во соопштението.