Иранскиот министер за надворешни работи Абас Аракчи се состана со рускиот претседател Владимир Путин во Москва додека израелските сили продолжуваат да го напаѓаат Иран. Аракчи и се заблагодари на Русија за поддршката и рече дека Москва е на вистинската страна на историјата.

„Односите меѓу Иран и Русија дополнително се продлабочија во последните години“, рече Аракчи и нагласи дека двете земји соработуваат во повеќе области, вклучувајќи ја и нуклеарната програма.

„Русија беше наш партнер и ни помогна. Таа учествуваше во нуклеарните преговори и имаше значајна улога“, рече тој.

Додаде дека Русија стои до Иран во актуелниот конфликт со Израел и по американските воздушни напади врз иранските нуклеарни постројки.

Русија ја изгради иранската нуклеарна централа Бушер на југот на земјата и продолжува да учествува во нејзиното одржување. Путин минатата недела рече дека моментално има околу 200 руски експерти во фабриката и му се заблагодари на Израел што се согласи да ја гарантира нивната безбедност.

На средбата со Аракчи, Путин ги осуди американските напади врз Иран, нарекувајќи ги „агресија без никакво оправдување и основа“ и рече дека иранскиот народ може да смета на поддршката од Русија.

Тој додаде дека, освен со Аракчи, во изминатите неколку дена разговарал и со американскиот претседател Доналд Трамп, израелскиот премиер Бенјамин Нетанјаху, претседателот на Обединетите Арапски Емирати Мохамед Ал Нахјан и иранскиот претседател Масуд Пезешкијан. Точниот тајминг на тие разговори не беше прецизиран, а Кремљ претходно изјави дека не било планирано Путин да разговара со Трамп по американските напади.

На средбата присуствуваа и рускиот министер за надворешни работи Сергеј Лавров и советникот на Путин за надворешна политика Јуриј Ушаков, поранешен руски амбасадор во Вашингтон. Кремљ објави кратко видео од средбата, на кое се гледа како Путин ја прима иранската делегација во раскошна сала.

Унгарскиот премиер Виктор Орбан предупреди дека војната против Иран би можела да има сериозни последици за Европа. Доколку Иран како држава се распадне, конфликтите, како што рече тој, би се прошириле во соседните земји, предизвикувајќи голема безбедносна криза.

Орбан ги даде овие забелешки во радио интервју во петокот, неколку дена пред САД да ги поддржат израелските воени напади врз иранските нуклеарни постројки.

Според Виктор Орбан, војната во Иран претставува три специфични закани за Европа:

Првата е зголемен ризик од терористички напади, бидејќи радикалните групи би можеле да го искористат хаосот за да ги прошират своите активности.

Втората закана е нов бран на миграција, бидејќи илјадници луѓе би можеле да избегаат од регионот разурнат од војна кон европските граници.

Третата опасност се однесува на зголемувањето на цените на енергијата, со оглед на тоа што Иран игра клучна улога во глобалната трговија со нафта, а секое нарушување би можело да предизвика енергетски шок и економски последици низ цела Европа.

Во интервју за радио станицата Кошут, Орбан објасни зошто Иран е особено чувствителна област. Рече дека тоа е земја со повеќе од 90 милиони жители, силна армија и сложена нуклеарна програма. Иран, како што објасни Орбан, има и стратешка позиција бидејќи го контролира теснецот низ кој минува значаен дел од светската трговија со нафта.

Сепак, тој предупреди и за сложената етничка структура на земјата.

„Иран е дом на многу етнички групи. Доколку централната влада ослабне или се распадне, целата земја би можела да се распадне по етнички линии, отворајќи ја вратата за поширок регионален хаос“, вели премиерот.

Орбан особено го истакнува примерот на Азербејџан.

„Иако Азербејџан има население од 10 милиони, уште 20 милиони Азербејџанци живеат на иранска територија. Нестабилноста во Иран би можела да поттикне сепаратистички движења или конфликти во други земји во регионот, вклучително и Пакистан“, вели тој.

Според Орбан, вистинската закана не е само војната, туку опасноста регионот да стане целосно непредвидлив и надвор од контрола, што би имало директно влијание врз Европа.

Американска воена база во Сирија била цел на минофрлачки напад, јавува иранската агенција Мехр, повикувајќи се на повеќе извори.

Агенцијата наведува дека информирани извори објавиле дека нападот бил извршен врз американската база лоцирана во западниот дел на сириската провинција Хасака.

По нападот, според истите извори, биле воведени засилени безбедносни мерки на главниот влез во базата.

Се наведува дека засега нема информации од каде дошол нападот.

Дополнително се тврди дека по гранатирањето, американскиот контингент стациониран во базата бил ставен во состојба на готовност, подигнати се неколку американски хеликоптери, а американски војници ја пребарале областа околу објектот.