Одделот за сузбивање организиран и сериозен криминал до Основното јавно обвинителство Прилеп поднесе кривична пријава против С. З. (56) од Битола за сторено кривично дело загрозување на сигурноста предвидено и казниво според член 144 став 3 од Кривичниот законик.

Имено, на 11 декември 2021 година, пријавениот С. З., преку редовна пошта од АД „Пошта на Северна Македонија“ – подружница ЦРПС Прилеп, испратил писмо со заканувачка содржина до една амбасада во Скопје, а на 20 и 22 декември 2021 година, С.З., преку редовна пошта од АД „Пошта на Северна Македонија“ – подружница ЦРПС Прилеп, испратил писма со сериозни закани за животот на јавната обвинителка од ОЈО за ГОКК, Вилма Рускоска.

Исто така, на 17 јануари 2022 година преку редовна пошта од АД „Пошта на Северна Македонија“ – подружница ЦРПС Битола, пријавениот испратил писмо со сериозни закани за животот на Љубомир Јовески, јавен обвинител на Република Северна Македонија.

Како испраќач на сите писма пријавениот навел лица со навистинити генералии.

Веднаш по добиените пријави, полициски службеници од Одделот за сузбивање организиран и сериозен криминал и СВР Битола, во соработка со Агенцијата за национална безбедност, презедоа мерки и активности за расчистување на случајот.

Врз основа на издадени наредби за претрес во дом и други простории од ОС Битола, на 21.1.2022 извршени се претреси на две локации на подрачјето на Битола, и тоа во домот на С. З. и во домот на мајка му Љ.З..

При извршените претреси пронајдени се и одземени мобилен телефон, лаптоп и предмети поврзани со кривичното дело.

С. З. е лишен од слобода и во ПС ОН Битола е извршен разговор со него, а по извршено графолошко вештачење од страна на ОКТИВ, утврдено е совпаѓање на обезбедениот рачен ракопис од С. З. и рачниот ракопис во напишаните заканувачки писма.

С. З. е приведен и со кривичната пријава ќе му биде предаден на надлежното обвинителство.