Лидерот на најголемата опозициска партија во Турција денеска побара одржување предвремени претседателски избори „најдоцна во ноември“, по десетдневните протести поради апсењето на градоначалникот на Истанбул.

„Ќе дојдете и ќе се соочите со нашиот кандидат најдоцна во ноември. Ова е предизвик за вас“, рече лидерот на опозициската Републиканска народна партија (ЦХП) Озгур Озел, обраќајќи му се на турскиот претседател Реџеп Таип Ердоган, за време на вонредниот конгрес на партијата во Анкара.

Озел побара изборите да се одржат во јуни или ноември.

Поддржувачите на таа опозициска партија организираа големи демонстрации на кои присуствуваа десетици илјади луѓе во Истанбул и во други градови во Турција, по апсењето на опозицискиот градоначалник на Истанбул Екрем Имамоглу на 19 март.

Имамоглу, член на ЦХП, во меѓувреме беше номиниран за кандидат на партијата за следните претседателски избори.

ЦХП беше првата политичка сила на локалните избори во март 2024 година со 37,8 отсто од гласовите на национално ниво. Партијата победи во Истанбул и Анкара, каде што е на власт од 2019 година, а дотогаш на власт беше Партијата на правдата и развојот (АКП) на Ердоган.

Лидерката на екстремната десница во Франција, Марин Ле Пен, на која судот и забрани да извршува јавна функција поради проневера на јавни средства, денеска изјави дека ја оспорува пресудата на демократски и мирен начин, мислејќи на борбата за граѓански права во САД од страна на свештеникот Мартин Лутер Кинг помладиот.

„Нашата борба ќе биде мирна борба, демократска борба. Ќе се угледаме на Мартин Лутер Кинг кој ги бранеше граѓанските права затоа што граѓанските права на Французите се доведени во прашање денес“, рече Марин Ле Пен во видео обраќањето до Конгресот на Италијанската лига, антиимигрантската партија на Матео Салвини, што се одржува во Фиренца.

Политичките тензии во земјата беа донесени со острата пресуда во првостепената постапка против француската партија Национален собир, поради проневера на јавни средства и забрана за јавни функции за лидерката на партијата Марин Ле Пен, една од фаворитите на следните претседателски избори во Франција, планирани за 2027 година.

Последниве денови, околината на Марин Ле Пен веќе се осврна на американскиот лидер Мартин Лутер Кинг Јуниор во движењето за граѓански права, кој беше убиен од бел сегрегационист на 4 април 1968 година, на терасата на еден мотел во Мемфис, на југот на САД.

Тие повторија дека партијата Национален собир ќе користи легални средства и мирни демонстрации. Тие ја оспоруваат легитимноста на пресудата во првостепената постапка, изречена поради аферата на помошникот во Европскиот парламент.

„Ќе се бориме, никогаш нема да прибегнеме кон насилство, никогаш нема да попуштиме пред кршењето на демократијата. Ќе ги искористиме сите можни правни средства за да можеме да учествуваме на тие претседателски избори и да го спречиме обидот да се прекине функционирањето на демократијата во Франција“, рече Ле Пен.

Салвини и се заблагодари за возврат: „Благодарам Марине, не сакаме да одземаме повеќе од твоето време… денес ќе биде важен ден за тебе и за Франција“, рече Салвини.

Во Париз попладнево се одржува митинг за поддршка на Марин Ле Пен пред Палатата на инвалидите каде се наоѓа саркофагот на Наполеон.

Големи пожари избувнаа низ Велика Британија изминатите денови поради наглото покачување на температурата, а во денешните извештаи на британските медиуми се наведува дека бранот пожари ја зафатил и Северна Ирска.

Противпожарната служба на Северна Ирска соопшти дека повеќе од 100 пожарникари и 14 противпожарни возила биле испратени на местото на пожарот во Сендбенк Роуд во Хилтаун, округот Даун, пренесува Sky News.

– Фронталниот дел од пожарот се наоѓа на околу 3,5 километри од пространото шумско подрачје и населените места – се наведува во соопштението на северноирската противпожарна служба.

Голем број пожари избувнаа низ Англија во изминатата недела поради невообичаено топли и суви временски услови за овој период од годината. Во саботата, хеликоптери беа испратени да се борат со уште еден голем пожар, четврти што избувна во Шкотска во изминатата недела.

Шкотската полиција соопшти дека пожарот, кој започнал во областа Њутон Стјуарт, се проширил на север и предупреди дека до полноќ пожарот ќе се прошири во областа Лох Доон во Источен Аиршир.