Свет
Лавров: САД шират пропаганда за наводната руска инвазија
Рускиот министер за надворешни работи, Сергеј Лавров, во телефонски разговор со американскиот колега Антони Блинкен, изјавил дека Вашингтон води пропагандна кампања за потенцијална руска агресија за да провоцира, соопшти во саботата руското министерство.
Коментирајќи го разговорот меѓу двајцата министри за надворешни работи, руското министерство соопшти дека Лавров рекол дека Вашингтон и Брисел ги игнорирале клучните безбедносни барања на Москва.
Русија бара правни гаранции дека НАТО нема да се прошири понатаму на исток или да инсталира ракетни системи во нејзините соседни земји. Западот, од друга страна, ја обвинува Русија дека подготвува инвазија на Украина.
„Пропагандната кампања што ја започнаа САД и нивните сојузници за руска агресија против Украина има за цел да ги испровоцира и охрабри властите во Киев“, рече Лавров.
Западот ја охрабрува Украина да ги саботира договорите од Минск со цел насилно да го реши проблемот на Донбас, регион контролиран од проруските сили, се наведува на веб-страницата на министерството.
Ден претходно беше објавено дека Западот ги игнорирал „деталните, рационални објаснувања од руските официјални лица“ дека Русија сака мирно решение на украинската криза, во согласност со договорот од белорускиот главен град.
Станува збор за договор од 2014 и 2015 година, потпишан од претставници на Русија, Украина, проруските сепаратистички лидери и Организацијата за безбедност и соработка во Европа (ОБСЕ), а поддржан од Советот за безбедност на ОН.
Договорот вклучува точки како што се повлекување на тешкото оружје од источна Украина, одржување избори во одметничките региони и повторно воспоставување украинска контрола на границата со Русија.
Во соопштението објавено во петокот, руското министерство напиша и дека државите имаат право да распоредат свои војници на нивна територија, а воените вежби што се одржуваат во Белорусија се од одбранбен карактер.
Амбасадорот на Русија во Вашингтон, Анатолиј Антонов, во саботата изјави дека САД создаваат тензија без никакви докази во насока на поддршка на наводите за инвазија, пренесува ДПА.
САД сакаат да создадат впечаток дека агресијата е „неизбежна“, рече рускиот дипломат.
Во сабота навечер, во време кога земјите ги повлекуваат своите дипломати од Украина, телефонски треба да разговараат и претседателите на САД и Русија, Владимир Путин и Џо Бајден.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Остин: Бајден ја запре испораката на оружје за Израел
Американскиот министер за одбрана Лојд Остин денеска изјави дека одлуката на американскиот претседател Џозеф Бајден да ја прекине испораката на муниција за Израел е донесена поради израелските планови да изврши офанзива врз градот Рафах на југот на Појасот Газа.
„Од самиот почеток бевме многу јасни дека Израел не треба да започне голема офанзива во Рафах без да ја земе предвид заштитата на цивилите во областа. Откако ја преиспитавме ситуацијата, престанавме да испраќаме муниција во Израел“, рече тој на сослушувањето во Сенатот и потврди дека конечната одлука „што ќе се случи со таа пратка“ се уште не е донесена, пренесува Ројтерс.
Администрацијата на САД ја запре испораката на околу 3.500 бомби во Израел минатата недела поради загриженоста за најавената копнена офанзива на Рафах, објави претходно денеска Асошиејтед прес, повикувајќи се на неименуван претставник од администрацијата.
Овој функционер појаснил дека не е донесена конечна одлука за испораката на бомбите и дека во суспендираната пратка имало 1.800 бомби од по 900 килограми и 1.700 бомби со тежина од 226 килограми.
Во понеделникот, израелскиот воен кабинет одлучи да ја спроведе планираната операција во Рафах за да „изведе воен притисок врз Хамас“, и покрај претходната најава на Хамас дека се согласува со египетско-катарскиот предлог за прекин на огнот.
Европа
Намалениот број на станови доведе до раст на кириите во Германија
Растат кириите во Германија поради немањето станови во услови на високи градежни трошоци и кредити. Сето тоа го запре градежниот сектор и побарувачката, но и ги намали цените на квадратот, се вели во извештајот на здружението на банките.
Становите во Германија поевтиниле за 4,3 отсто во првиот квартал во однос на истиот период лани, објави здружението на германските банки„Pfandbrief“.
Цените за изнајмување на нови станови се зголемени за 5,6 отсто. Трендот на поскапување на кириите нема да запре, оценуваат од здружението.
„Пазарот за изнајмување станови е под огромен притисок. Побарувачката значително ја надминува понудата“, рече извршниот директор на здружението, Јенс Толкмит.
Трошоците за изградба значително се зголемија во последните години поради повисоките каматни стапки на кредитите и значително повисоките трошоци за работна сила и цените на градежните материјали. Во вакви услови се намали бројот на одобренија за градба, а побарувачката ослабе, што резултираше со пониски цени на становите, смета министерот за финансии.
Според податоците на здружението на банките, цените на недвижностите најмногу паднале во Минхен, за 5,3 отсто.
Во исто време, падот на градежната активност го продлабочува „недостигот“ на станови, зголемувајќи го натамошниот раст на закупнината, кој би можел да продолжи уште некое време.
Здружението оценува дека цените на станбените недвижности треба да се стабилизираат во догледна иднина, за разлика од комерцијалните недвижности, како што се деловните згради и трговските центри.
Цените во тој сегмент паднаа за речиси 10 проценти на годишно ниво и се уште не се гледа „дното“, вели првиот човек на здружението.
Проценките се базираат на податоци за работењето на повеќе од 700 банки кои се активни во финансирањето на недвижен имот, а не на понуди за купување и изнајмување кои служат како основа за Заводот за статистика, забележуваат тие во здружението.
Европа
(Видео) Драма на небото над Трст: забележана несекојдневна појава
Во внатрешноста на заливот Трст, во близина на границата со Словенија, во вторникот попладне се формирал вител.
Италијанските медиуми јавија дека невремето не предизвикало материјална штета, ниту било закана за населението. Интервенцијата на пожарникарите и на пристанишните служби не била потребна.
Waterspout reported in the North Adriatic between the town of Muggia and Koper a few hours ago.
Original video shooting from meteoradar
➡️ https://t.co/SXbq5rbWaj pic.twitter.com/XxRu57Gohs— Alpine-Adriatic Meteorological Society (@aametsoc) May 7, 2024
Италијанската метеоролошка агенција објасни дека ваквите појави не се воопшто ретки и дека се резултат на екстремна нестабилност на атмосферата.
Областа на низок воздушен притисок, која владее со поголемиот дел од Италија, донесе влажни струи во Трстскиот Залив.
„Во овие временски услови, неколку пати годишно може да се појават воздушни вртлози, кои во повеќето случаи се распаѓаат на море“, објаснуваат италијанските метеоролози.