Свет
Украина под чад и рушевини – маж плаче над телото на татка си: „Му реков да бега“
Украинците денеска се разбудија во земја што не ја препознаваат – полна со урнатини, чад и руски тенкови додека се слушаа експлозии и сирени за воздушна опасност.
Во паника многумина побрзаа да си набават резерви и да избегаат што подалеку.
Иако Русија изјави дека напаѓа воени цели, меѓу загинатите и повредените во Украина има и цивили.
Русија денеска изврши симултани напади од југ, исток и од север, од копно и воздух, при што до пладне загинаа најмалку 40 цивили, вклучително и едно момче во станбена зграда во Харков, соопштија украинските власти.
Повредени се и други цивили, а се верува дека уште некои се убиени во 203 напади на руските сили досега, соопшти украинската полиција откога тенковите ја преминаа границата и војниците паднаа со падобран во источните региони претходно денеска.
Луганск, Суми, Харков и Чернихив во источна Украина известија дека биле нападнати, а експлозии биле пријавени и на запад – во Житомир и Лавов, во близина на границата со Полска.
Денешните слики го покажуваат вистинското лице на војната со цивили потопени во крв, на кои им помогнаа службите за итни случаи да се спасат по гранатирањето.
Во источниот украински град Чугујево син плачеше над телото на својот татко меѓу остатоците од ракетниот напад во станбена област.
„Му реков да си оди“, плачеше човекот покрај искривените остатоци од автомобилот.
Во Киев, главниот град на Украина, воздушните напади почнаа пред зори, а звукот на експлозии, пукотници и сирени се слушаше во главниот град со три милиони луѓе, објави „Ројтерс“.
„Се разбудив во пет наутро со звуци на експлозии“, изјави Ивана Климпуш, пратеничка од Европската солидарна партија, зборувајќи за „Инсајдер“ од својот дом во Киев.
Во меѓувреме, главниот меѓународен аеродром во Киев беше погоден во првото бомбардирање на градот по Втората светска војна, а сирените за воздушен напад се огласија над главниот град во мугрите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Во Швајцарија ќе се одржат мировни преговори за Украина, Русите не доаѓаат
Швајцарската влада денеска соопшти дека во оваа фаза Русија не е меѓу 160-те делегации поканети на мировните преговори за Украина што ќе се одржат во Швајцарија во средината на јуни.
„Швајцарија е убедена дека Русија мора да биде вклучена во тој процес“, соопшти швајцарската влада. „Мировниот процес не е можен без Русија“.
Швајцарската влада соопшти дека отсекогаш била отворена за поканата на Русија, но Москва постојано нагласувала дека не е заинтересирана за учество на првиот самит.
Руските власти истакнуваат дека Швајцарија усвоила европски санкции против Москва поради инвазијата на Украина и затоа нема кредибилитет како неутрален посредник.
Свет
(Видео) Застрелани шест лица во Тексас, меѓу нив и деца
Најмалку шест лица на возраст од 3 до 19 години, од кои четири помлади од 15 години, се застрелани во станбена област во Форт Ворт, Тексас. Инцидентот се случил синоќа околу 19:30 часот кога полицијата добила дојава за пукање во западниот дел на градот, пишува „Еј-би-си Њуз“.
„Кога полицијата пристигна на местото на настанот во 19 часот и 38 минути, на паркингот пронашла неколку жртви со прострелни рани. Шест од нив се здобиле со полесни до тешки повреди“, соопшти полицијата во Форт Ворт.
Пет жртви биле префрлени во локалните болници, додека една одбила лекување. Засега не се знае каква е состојбата на жртвите кои се пренесени во болница.
„Потврдуваме дека на овој простор е забележано сомнително возило и дека најмалку едно или повеќе лица од автомобил пукале кон жртвите“, соопшти полицијата. Надлежните сметаат дека станува збор за изолиран инцидент и дека нема понатамошна опасност за јавноста. Покрената е истрага, а полицијата трага по напаѓачите.
Свет
Америка тврди: Русите користеле хемиско оружје во Украина, прекршена е меѓународната конвенција
Соединетите Држави официјално ја обвинија Русија дека користи хемиско оружје како метод за војување против Украина и воведоа нови санкции за руски компании и државни органи.
Во соопштението, американскиот Стејт департмент наведе дека утврдено е дека Русија употребила хемиско оружје хлоропикрин против украинските сили, што ја прекршува Конвенцијата за хемиско оружје (CWC).
Се додава дека Русија користела и солзавец.
„Употребата на таквите хемикалии не е изолиран инцидент и веројатно е поттикната од желбата на руските сили да ги избркаат украинските сили од вградените позиции и да добијат тактички предности на бојното поле“, се вели во соопштението.
Заклучокот на САД се совпаѓа со сведочењето на украинските војници кои велат дека се соочиле со зголемени средби со гас и други хемиски надразнувачи во делови од нивната линија на фронтот во последните месеци.
Украинските вооружени сили соопштија дека регистрирале повеќе од илјада инциденти во кои Русија употребила „муниција со солзавец со токсични хемикалии забранети за војување“, со 250 случаи само во февруари.
Русија негираше дека користела хемиско оружје.
Хлоропикринот бил широко користен како хемиски борбен агенс во Првата светска војна, но повеќе не е одобрен за воена употреба, а сега главно се користи во земјоделството. Ги иритира белите дробови, очите и кожата и може да предизвика гадење, повраќање и дијареа која трае со недели.
Се додава дека САД санкционираат три руски владини субјекти поврзани со програмите за хемиско и биолошко оружје на земјата и четири руски компании кои придонеле за тие тела.
Минатиот април, на самитот на Г7, министрите за надворешни работи на земјите-членки во заедничка изјава изјавија дека Русија ќе се соочи со „тешки последици“ за каква било употреба на хемиско, биолошко или нуклеарно оружје.
Оттогаш, американските власти предупредуваат дека Русија сепак го направила тоа. Во ноември, Мелори Стјуарт, помошник државен секретар на САД за контрола на вооружувањето, одвраќање и стабилност, ги наведе извештаите од Украина дека Москва користи „агенси за контрола на немири“ во војувањето.