Македонија
Митрески: Со месеци ВМРО-ДПМНЕ блокира важни закони во Собранието
Координаторот на пратеничката група на СДСМ и коалицијата, Јован Митрески, обвини дека со месеци ВМРО-ДПМНЕ ја блокира работата на Собранието. Собраниските седници траат предолго, а носењето закони во интерес на граѓаните чекаат со месеци – заглавени се во комисиите што ги води опозицијата.
Митрески рече тоа не е само континуираната штета на угледот на Собранието, туку и на ефикасноста, а со тоа пратениците од опозицијата предизвикуваат штета и на граѓаните.
„Вчера цел ден граѓаните можеа да видат како пратениците од ВМРО-ДПМНЕ ја одолжуваа собраниската седница. Не дозволуваат парламентарното мнозинство да биде пресликано и во работните тела и комисиите. Работата на Комисијата за избори и именувања со месеци е закочена, а таа е важна за избор и именување на составите на важни државни институции. Една од нив, секако, е и Уставниот суд, кој со месеци работи во нецелосен состав. Со одолжувањето на оваа седница ВМРО-ДПМНЕ кочи и други важни закони, кои се на дневен ред, меѓу кои и Законот за земјоделството и руралниот развој, кој обезбедува 100 отсто субвенционирана нафта за земјоделците од досегашните 50 отсто. Тоа значи целосно покривање на трошоците за нафта“, рече Митрески.
Покрај ова, како што додаде, со месеци во Собранието се блокирани и други важни закони. Блокиран е Законот за наставниците и стручните соработници во основното и средното образование, кој обезбедува повисоки плати за 27.000 наставници. Законот за служба во Армијата, кој носи подобри услови за пензионирање на војниците, можност на војниците да избираат дали ќе продолжат во јавна служба или ќе добијат надомест до 20.000 евра, исто така е блокиран. Повеќе од една година е блокирана и изградбата на нов клинички центар во Скопје.
Митрески вели дека сето ова ВМРО-ДПМНЕ го прави заради фрустрација од дебаклот при формирањето ново парламентарно мнозинство и од очај за да ги прикрие неспособноста и криминалното однесување на своите градоначалници.
„Како парламентарно мнозинство, нема да се повлечеме пред блокадите на опозицијата, ќе сториме сѐ сите закони важни за граѓаните да бидат донесени и да почне нивната реализација. Мнозинството секогаш ја има можноста, мнозинството има легитимно право дадено од граѓаните, мнозинството за разлика од опозицијата ја носи и одговорноста за донесените одлуки во Собранието. Така е секаде во европските држави, така е и кај нас“, додаде Митрески.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Без струја утре делови од општина Кисела Вода
Без струја утре од 8:00 до 14:00 часот ќе бидат дел од корисниците лоцирани на улиците „Драчево“, „Чучевска“ и „Китка“ во општина Кисела Вода.
Како што соопшти РЦУК-Скопје, прекинот е поради планирани зафати во електродистрибутивната мрежа во Град Скопје.
Македонија
Сиљановска Давкова на Самитот на иднината во Њујорк
Претседателката Гордана Сиљановска Давкова, која ја предводи македонската делегација на 79. Генерално собрание на ОН, денеска треба да се обрати на Самитот на иднината на тема „Мултилатерални решенија за подобро утре“ со учество на шефови на држави и влади.
Целта на Самитот на иднината е државите членки да ја зголемат меѓусебната соработка која, како што се нагласува, е се поважна за човековиот опстанок, но е тешко да се постигне во атмосфера на недоверба, користејќи застарени структури кои повеќе не ги одразуваат денешните политички и економски реалности.
Во фокусот на Нацрт-пактот се човековите права, родот и одржливиот развој во сите поглавја. Содржи поглавја за одржлив развој и финансирање за развој, меѓународен мир и безбедност, наука, технологија и иновации и дигитална соработка, младите и идните генерации и трансформирање на глобалното владеење. Меѓудругото, се бара земјите членки да се согласат и за реформи што се однесуваат на Советот за безбедност, но тоа најверојатно нема да се случи.
На Самитот треба да бидат усвоени и Декларација за идните генерации и Глобален Дигитален договор.
Македонија
ВМРО-ДПМНЕ му порача на СДСМ дека платите растат и можат само да учат како се работи
„Со СДС Македонија ја престигнаа Албанија и БИХ во раст на БДП по глава на жител, а сега се работи забрзано на економска трансформација, а сега СДС манипулира бидејќи со нив заостанавме зад сите во регионот, а реалната плата имаше пад, а не раст“, одговорија од ВМРО-ДПМНЕ како реакција на прес-конференцијата на Јована Тренчевска од СДСМ.
„Додека Македонија имаше раст на БДП по глава на жител во период од 2017 до 2022 од само 20%, во Србија растот е 50%. А за истиот период во Бугарија по глава на жител БДП се зголемил за 64%. Повеќе од двојно поголем раст од Македонија има и Албанија, каде по глава на жител во периодот од 2017 до 2022 година БДП пораснал за 52%. Во 2017 Македонија има поголем БДП по глава на жител и од Албанија и од БИХ, сега и двете земји кои беа зад нас не поминаа, а Србија, Бугарија и Црна Гора се уште повеќе пред нас. Со СДС Македонија има ненадоместливи штети. Со ВМРО-ДПМНЕ Македонија оди кон економска трансформација, нови инвестиции, владеење на правото и нови мерки и проекти за подобра иднина. За првпат во историјата на државата пензиите ќе се зголемат за 5000 денари. Ќе растат и платите. Македонија оди напред, а СДС можат само да учат како се работи“, се вели во реакцијата на ВМРО-ДПМНЕ.