Македонија
Утрово снежно на повисоките места, најави има и за снег во Скопје кон крајот на денот

Сообраќајот на државните патишта се одвива непречено по наместа влажни коловози. Снег со слаб интезитет врне на Попова Шапка, Ќафасан, Ѓавато и Железнец.
АМСМ информира дека интензитетот на сообраќај на патните правци надвор од градските средини е умерен. На граничните премини, од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Инаку времето денеска ќе биде облачно и студено со врнежи од снег, а вдолж Повардарието со врнежи од дожд. Наместа врнежите ќе бидат пообилни, (локално над 30 л/м2). особено во ноќните часови. На планините снежната покривка позначително ќе се зголеми (20 до 30 см), а нова ќе се формира и во некои пониски места. Ќе дува слаб до умерен ветер од североисточен правец. Максималната температура ќе достигне од 2 до 7 степени, соопшти УХМР.
Во Скопје, облачно време со повремени врнежи од дожд, кои кон крајот на денот и во текот на ноќта ќе преминат во снег. Максималната температура ќе достигне до 5 степени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Денеска во 12:30 часот во Скопје ќе се одржи протестен марш за Крива Река

Денеска во 12:30 часот ќе се одржи протест за Крива Река. Маршот ќе почне пред Министерството за животна средина и просторно планирање, а ќе заврши пред Пред Државниот инспекторат за животна средина.
Од Зелен Хуман Град велат „институциите што требаше да ја спречат и превенираат хаваријата во рудникот Тораница не само што дозволија таа да се случи, туку и затаија“.
„И кога надлежните затајуваат, од кого да очекуваме веродостојни и итни информации за квалитетот на водата од која се наводнуваат посеви и се напојува добиток? Сите сме загрозени! Да не беше риболовниот клуб „Мрена” да земе мостра уште истиот ден на лице место, денес воопшто немаше да знаеме колку и со што е затруена Крива Река! Веќе не е важно дали си независен, партиски поддржувач, активист, апатичен, млад, стар, жена, маж, дете, куче, риба или птица. Важно е дека сите пиеме иста вода, дишеме ист воздух и јадеме храна од истата загадена почва. И сите ќе ја платиме цената“, стои во објавата на ФБ.
На протестниот марш ќе упатат неколку барања:
• Објавување на сите извештаи и анализи од Државниот инспекторат за животна средина;
• Истрага за службените пропусти при надзорот од Државниот инспекторат за животна средина;
• Истрага на Државниот инспекторат за техничка инспекција, и дополнително:
— Државен инспектор за геологија: задолжен за извештаи за преглед и испитување на опремата и орудијата за работа;
— Државен рударски инспектор (член 103 од Законот за минерални суровини): задолжен за контрола на исправноста на опремата и постапките во рударството;
— Државен инспектор за опрема, производи и постројки (член 104): задолжен за водење евиденција за техничките карактеристики, испитувања, одговорни лица, состојбата и безбедноста;
• Конкретни мерки за спречување на понатамошно загадување;
• Обврска за транспарентност и достапност на сите информации што се од јавен интерес во најкус можен рок.
„Секој молк е дозвола за нова хаварија. Секој од нас кој молчи и не бара одговорност и отчетност од надлежните институции за нивната работа, практично застанува на нивна страна и им ја поклонува платата. Не биди еден од нив“, се наведува во објавата на Зелен Хуман Град.
Предметот за загадување на Крива Река во Крива Паланка го презема Основното јавно обвинителство за гонење на организиран криминал и корупција.
Македонија
Времето денеска променливо облачно со повремен локален дожд

Времето денеска ќе биде променливо облачно со повремен локален дожд.
Според информациите од УХМР, ќе дува умерен, а долж Повардарието и во источните делови засилен ветер од северен правец над 70 километри на час.
Минималните температури ќе се движат од 2 до 8, а максималните од 10 до 20 степени.
Во Скопје, променливо облачно со повремен дожд. Ќе дува умерен, повремено засилен ветер од северен правец. Минималната температура во главниот град ќе биде 6, а максималната 18 степени.
Македонија
Обвинителството бара да се продолжи притворот на осомничените за пожарот во Кочани

Основното јавно обвинителство Кочани побара од Судот да се продолжи притворот за сите осомничени во истрагата за пожарот во дискотеката „Пулс“ во Кочани што се случи на 16 март, а во кој загинаа 61 лице, а повеќе од 100 се повредени. За тројца од осомничените, Обвинителството бара мерката притвор да се замени со куќен притвор.
„Во текот на денешниот ден до Основниот суд Кочани достави предлози за продолжување на мерките за обезбедување – притвор и куќен притвор за сите осомничени во истрагата за пожарот во кочанската дискотека. Само за тројца осомничени, согласно фазата на обезбедување докази и исполнетоста на законските основи се предлага замена за мерката притвор во куќен притвор. Тоа се двајца осомничени од Државниот пазарен инспекторат и еден припадник на обезбедувањето на дискотеката“, соопштија од Обвинителството.
Од таму додаваат дека продолжуваат истражните дејствија во повеќе правци и во неколку институции со цел испитување на евентуална одговорност, за што јавноста ќе биде известена веднаш по донесувањето на соодветна јавнообвинителска одлука.