Култура
Костадиновска-Стојчевска – Маргарити: Има простор за многу заеднички проекти во културата
Министерката за култура Бисера Костадиновска-Стојчевска е во дводневна работна посета на Република Албанија.
Денеска во Тирана министерката Костадиновска-Стојчевска се сретна со министерката за култура на Албанија, Елва Маргарити, при што главна тема на разговор беше работата на Меѓудржавниот комитет за управување со Охридскиот Регион.
Во тој контекст стана збор и за формирањето на постојан секретаријат составен од релевантни експерти од двете страни, изработката на заеднички стратегиски план со дефинирани цели, иницијативи и проекти за заштита и рехабилитација на природното и културното наследство на Охридскиот Регион како исклучителна вредност.
На средбата се разговараше и за изработката на заедничките извештаи за состојбата со заштитата и напредокот во спроведувањето на препораките на Комитетот за светско наследство и за заедничкото дипломатско делување при организациите на ОН и ЕУ.
Костадиновска-Стојчевска и Маргарити меѓусебно се информираа за реализација на последната фаза од повеќегодишниот сложен процес на реиституција на македонските икони кои се во Албанија, а и ги споделија искуствата околу нормативното уредување во сферата на заштитата на културното наследство.
Министерките на двете земји изразија задоволството од досегашната соработка во културата меѓу двете земји и се согласија дека има простор за уште подлабоко интензивирање на соработката и на индивидуално и на институционално ниво. Особено беше потенциран позитивниот пример на соработка со Музејот на албанската азбука во Битола.
На средбата на која присуствуваше и амбасадорот на Северна Македонија во Тирана, Данчо Марковски, се разговараше за процесите кои може да се отворат со поголема размена во областа на културата на двете земји со Косово, како и за поефикасно учество и аплицирање на грантовите за култура во програмата Креативна Европа.
Добрата културна соработка се потврди и со отворањето на Македонскиот културно-информативниот центар во Тирана, каде во текот на годинава со поддршка на Министерството за култура ќе се реализираат повеќе културни настани, промоции на книги, концерти и изложби на кои македонските уметници ќе се претстават пред јавноста во Тирана.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Денес е Ден на македонскиот јазик
Петти мај е прогласен за „Ден на македонскиот јазик“. На овој ден во 1945 година, со решение на Народната влада на Федерална Македонија е усвоена азбуката на македонскиот јазик врз принципот еден глас – една буква, а набргу потоа, на 7 јуни 1945, е усвоен и Правописот на македонскиот јазик.
Кодификацијата на современиот македонски стандарден јазик се заокружува со делата на Блаже Конески – Граматиката на македонскиот литературен јазик, Речникот на македонскиот јазик и Историјата на македонскиот јазик.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.