Македонија
19 години АУЕ-ФОН: Визионерска трансформација на образованието
Американскиот универзитет во Европа – ФОН заедно со голем број на соработници, поддржувачи, пријатели, студенти и алумни, вчера на 19 март го одбележа своето 19-годишно постоење. Покрај прославувањето на визионерската трансформација на образованието, за време на свеченото одбележување на годишнината на АУЕ – ФОН се оддржа и интерактивна дебата со фокус на тема за перспективите на високото образование во земјата, во чии рамки учествуваа претставници од образовни институции, министерства, бизнис секторот и средношколците.
Бранко Азески, претседател на Стопанска Комора на Република С. Македонија, посочи дека без образовен кадар не може да се оствари никаков раст на економијата, што истовремено преставува клучен фактор за понатамошен раст на општеството. Оттука, според Азески, доколку државата сака да напредува треба да инвестира околу 5 отсто од својот БДП во развој на образованието, дефинирајќи при тоа цели и стратегии кои што ќе доведат до квалитено високо образование, стимулиран академски кадар и млади луѓе кои што со своите вештини ќе останат во државата и ќе бидат дел од општествените промени.
АУЕ – ФОН веќе 19 години ги следи светските трендови, остварува соработка со голем број универзитети ширум светот, што претставува голем поттик и мотивација за студентите, кои го разбираат квалитетот на образованието.
„Покрај природната припадност на европскиот простор за високо образование, АУЕ ФОН изминатата година интензивно работи на прилагодување и акредитација на своите програми на американско тло пред Советот за акредитација на бизнис школи и програми, како додадена вредност за Универзитетот, на тој начин креирајќи пошироки можности за студентите,“ изјави Билјана Пулеска Јанушевска, в.д ректор на АУЕ-ФОН, посочувајќи дека обезбедувањето квалитет на образовниот процес и создавање на конкурентни знаења и вештини останува и натаму приоритет на овој престижен универзитет.
Еден од почесните гости на дебатата Лулзим Алиу, заменик министер за образование и наука изјави дека успешноста на АУЕ ФОН како универзитет е резултат на широката програма што истиот ја нуди, привлекувајќи на тој начин голем број на студенти.
АУЕ-ФОН со поддршка од голем број на претставници од домашни и странски комори, бизнис заедници и владини претставници од државата, но и од странство, веќе низа години инвестира во општеството, а акцентот го става на движечката сила во земјава, а тоа се младите.
„Образованието подразбира постојана надградба и доквалификација. Затоа, државата треба да ги следи современите европски текови, да го стимулира високото образование и да вложува во науката, бидејќи на тој начин ќе се градат млади квалитетни кадри“, истакна Татјана Стојаноска Иванова, претседател на Одбор за акредитација при Агенција за квалитет на високото образование.
Потребата од унапредување на образованието, следењето на трендовите и обезбедувањето на висок квалитет во образовните институции и програми ја нагласи и Марко Ѓоргиевски, директор на Национална агенција за европски образовни програми и мобилност.
„Младите се нашата сегашност и треба да вложуваме во нив. Добрата едукација, можноста за формално и неформално образование во рамки на едукативниот процес нуди можност да ги унапредат своите знаења и вештини. Ако се надополни со пракса каде младите ќе можат да го надополнат и усовршат тоа што го знаат, тие ќе бидат подготвени да бидат лидери на промените кон подобро утре за сите“, истакна Ѓоргиевски.
Претседателот на Сојузот на средношколците, Лука Павичевиќ, на вечерашниот настан ја истакна потребата од итна реформа на процесот на прием на студенти во високообразовните установи за да се препознаат талентите на средношколците кои не се стриктно академски. Според Павичевиќ, наместо исклучиво фокусирање на оценките, процесот треба да стане холистички.
Една од предностите на АУЕ-ФОН, по која што се разликуваа од останатите универзитети во земјата, е можноста што им ја нуди на младите покрај теорија да имаат пракса, па дури и работа за време на нивните студии. Од основањето до денес, на студии од прв и втор циклус, своето образование го завршиле повеќе од 9000 студенти, бројка што го докажува остварувањето на заложбите на универзитетот да обезбеди знаење верифицирано со дипломи, кои се подеднакво вреднувани, како во земјата, така и во странство.
Тежината на АУЕ-ФОН се мери и со врвниот наставен кадар, кој зад себе има богата издавачка дејност. Професорите, кои се дел од овој универзитет, несебично вложуваат во студентите преку секојдневните предавања, како и преку дебатите, кои се одржуваат, каде младите имаат право да се вклучат и разменат мислење и истовремено да го зголемат својот фонд на информации и знаење.
„Образованието мора да се трансформира. Во таа насока, високо-образовните институции, како приватните, така и државните, вклучително државата и бизнис секторот, треба да бидат партнери и заедно да креираат долгорочна стратегија, која ќе резултира со одржлив, инклузивен и применлив образовен систем кој ќе гарантира препознатлива иднина за генерациите кои се образуваат“, изјави Сефер Цаноски, основач и директор на АУЕ – ФОН. Цаноски го потврди својот став пред присутните дека Американскиот универзитет во Европа – ФОН ќе продолжи со иста желба и темпо да инвестира во здрав образовен систем, постојано да ги надградува условите за студирање, да го подобрува квалитетот на знаењето и искуството на професионалниот кадар, да ги споделува на успесите на големото алумни семејство како во земјата, така и во светот, придонесувајки за позитивни промени во различни индустрии и сегменти во општеството.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Посебен режим на сообраќај во Скопје в сабота
Министерството за внатрешни работи ги известува граѓаните на Скопје дека на 04.05.2024 (сабота), поради одржување на манифестација по повод годишнината од смртта на македонскиот револуционер Гоце Делчев во црквата „Св. Спас“ во Скопје, Единицата за безбедност на патниот сообраќај при СВР Скопје по потреба ќе преземе мерки за посебен режим на сообраќајот, односно по потреба за сообраќај ќе биде затворена улицата „Самоилова“ на потегот од улицата „Иљо Војвода“ (виадукт Самоилова) до крстосница со улицата „Прохор Пчински“.
Министерството за внатрешни работи, исто така, ги известува граѓаните на Скопје дека на 04.05.2024 (сабота), Единицата за безбедност на патниот сообраќај при СВР Скопје ќе воведе посебен режим на сообраќај за одредени сообраќајници во централното градско подрачје на Град Скопје, како и во општините Ѓорче Петров и Аеродром.
На 04.05.2024 во периодот од 18.00 часот до завршување на манифестацијата по повод верскиот празник Воскресение Христово Велигден, во центарот на градот по потреба за сообраќај ќе бидат затворени: 1. Бул.„Партизански одреди” од крстосницата со ул.„Франклин Рузвелт” до крстосницата со бул.„ВМРО”. 2. Бул.„Св.Климент Охридски” од крстосницата со бул.„Илинден” до крстосницата со ул.„Димитрие Чуповски”. 3. На возилата од јавниот градски превоз, кои поминуваат преку мостот „Гоце Делчев”, по потреба ќе им се менува трасата на движење, при што ќе се движат по бул.„Илинден” и преку ул.„Франклин Рузвелт” ќе се вклучуваат на бул.„Партизански Одреди”, додека автобусите кои што поминуваат преку Центар ќе се движат по ул.„Митрополит Теодосиј Гологанов”, по што преку ул.„Франклин Рузвелт” ќе се вклучуваат на бул.„Партизански Одреди”.
Во спротивна насока автобусите ќе ги користат истите сообраќајници. Во општина Ѓорче Петров, по потреба, за сообраќај ќе се затвора ул.„Македонска војска“ пред црквата „Свети Петар и Павле“ на потегот од крстосница со бул.„Партизански Одреди“ до ул.„Ѓорче Петров“.
Во општина Аеродром, по потреба, за сообраќај ќе биде затворен локалниот пат кон село Лисиче. Исто така, по потреба за сообраќај ќе бидат затворани и други сообраќајници кои гравитираат околу верските објекти. Секторот за внатрешни работи Скопје апелира до граѓаните да ги почитуваат наредбите кои ќе ги даваат полициските службеници по сообраќајниците каде што ќе се одвиваат настаните.
Македонија
Македонија најдобро рангирана меѓу државите од регионот според Индексот за слобода на медиумите
Репортери без граници денеска го објавија својот годишен извештај за слободата на медиумите во светот, според кој Македонија се наоѓа на 36 место, што е за две места подобор од 38 место претходната година.
„Иако новинарите не работат во непријателско опкружување, раширените дезинформации и недостатокот на професионализам придонесуваат за опаѓање на довербата на општеството во медиумите, што ги изложува независните медиуми на закани и напади. Понатаму, владините функционери имаат тенденција да имаат лоши и понижувачки ставови кон новинарите“, се наведува во извештајот на Репортери без граници.
Репортери без граници ја издвојува Аргентина под новиот претседател Хавиер Милеи, која падна за 26 места, од 40 на 66 место и пишува за „спектакуларната мимикрија на руските репресивни методи“ низ Источна Европа и Централна Азија, вклучително и во Србија, каде што „провладините медиуми емитуваа Руска пропаганда, а властите им се закануваат на руските новинари во егзил“.
Индексот на слободата на медиумите и натаму го предводи Норвешка, потоа Данска и Шведска, а најлоша е ситуацијата во Еритреја, која го презеде дното на листата од Северна Кореја. Меѓу најлошите десет се и Кина, Иран, Авганистан и Сирија, пишува агенцијата Франс прес.
И Босна и Херцеговина падна многу на овогодинешната листа и сега е на 81 место, Србија е уште полошо, на 98 место, Црна Гора е на 40, Хрватска на 48 место, а Словенија на 42. Од земјите на ЕУ, послаб индекс на слободата на медиумите имаат Романија, Бугарија, Кипар и Грција, која според овој критериум е на 88-то место, најлошо во Унијата.
Албанија е на 99 место, а Косово на 75, според извештајот.
Македонија
„Повторен обид на Министерството за здравство да протурка реновирање на операциски сали и фаворизира одредени фирми“, вели ВМРО-ДПМНЕ
„Министерството за здравство повторно ја објавува постапката за јавна набавка на проектирање и изведба на реконструкција и реновирање на операциски сали, нивни пред простории и ходници со машински соби во УКЦ Мајка Тереза – хируршки клиники по принципот „клуч на рака“, вели Комисијата за здравство на ВМРО-ДПМНЕ.
„Истата пред само месец и половина Државната комисија за жалби по јавни набавки ја поништи од причина што Министерството за здравство изготвило тендерската документација која не е во согласност со Законот за јавни набавки и истата доведува до дискриминација на економските оператори и ограничување на пазарната конкуренција.
Повторената постапка објавена е на ден 24.04.2024 година, неработен ден прогласен со одлука на Влада поради одржување на прв круг претседателски избори.
Во тендерската документација за економска способност на економските оператори се бара минимум 550.000.000 денари со ДДВ вкупен приход во последните три години за секоја година поединечно.
Ова е целосно неосновано.
Прво, затоа што во финансиските извештаи приходот се искажува без ДДВ (ДДВ-то е обврска на друштвото да го плати спрема државата).
Второ, зошто не е објавена проценетата вредност на набавката за да може да се утврди дали овој услов е согласно Законот за јавни набавки? (Според Законот за јавни набавки – Договорниот орган не смее да бара минималниот годишен приход да изнесува двојно повеќе од проценетата вредност на набавката)“, се наведува во статусот на фејсбук на Комисијата за здравство на ВМРО-ДПМНЕ.