Македонија
Поддршката на надарените ученици е важен услов за напредок на државата, вели министерот за образование
Вистина е дека сé може да се одложи, ама грижата за талентот не може. Кога велам грижа, мислам и на онаа институционалната, но секако мислам и на онаа од семејството, од поширокото опкружување и општеството, а најважна е личната волја за надградба, самодовербата и истрајноста на надареното или талентираното дете. Затоа што, верувам дека сите ние сме биле сведоци на ситуации во кои луѓето кои ги поседуваат, ги игнорираат своите таленти и наместо насочување кон тоа што најдобро го знаат, одбираат да се фокусираат на нешто сосема друго.
Ова го кажа министерот за образование и наука Јетон Шаќири на денешниот вебинар посветен на грижата кон надарените и талентираните деца, организиран од Универзитетот „Св. Климент Охридски“ – Битола на кој учествуваа повеќе претставници на академската и научната фела и експерти во областа на образованието.
Шаќири рече дека државата има механизам со кој ги поддржува талентираните ученици, но и дека постои простор за надополнување со нови мерки со цел грижата кон овие деца да биде покомплетна и поефективна.
Посочи на можноста за талентираните ученици да прескокнат најмногу до две одделенија за време на нивното образование, како и за можностите за организирање на дополнителна групна или индивидуална настава со посебна програма која ја изготвува советот на наставници. Информираше и дека талентираните ученици добиваат разни форми на финансиска поддршка.
„Ќе потсетам дека секоја година доделуваме стипендии за талентирани ученици по природни науки, талентирани ученици во области на уметноста и за талентирани спортисти од средните училишта. Оние кои ќе освојат прво место на државен натпревар, прво второ или трето место на меѓународен натпревар по математика, информатика и природни науки, или на некоја од меѓународните научни олимпијади исто така добиваат соодветни парични награди, а воедно се поддржува и нивното учество со покривање на трошоците за котизација и патување“, рече Шаќири.
Потсети и дека од учебната 2020/2021 година отворена е Математичко – информатичка гимназија во Скопје како специјализирано училиште каде по посебни програми се образуваат талентирани ученици од областа на математиката, физиката и информатиката, како и дека Фондот за иновации заедно со УНИЦЕФ креираат програми кои ги вклучуваат талентираните ученици и обезбедуваат поддршка кои ги поттикнуваат да ја развиваат својата креативност.
„Кога говорам за развој на креативноста, сакам да информирам дека како министерство и Влада правиме и системска реформа на основното образование, каде со нови наставни програми, нови учебници и целосно нов пристап на наставниците во наставата го поттикнуваме креативниот потенцијал на учениците. Дополнително, со воведување на повеќе изборни предмети во основните училишта се дава шанса секој да го одбере тоа што му е предмет на интерес, а не нешто кое би му се наметнало. Така се овозможува рана идентификација на афинитети, предиспозиции и талент за одредена работа или во одредена област. Така и навремено започнува следењето на детето и се дава потребната поддршка за да напредува“, додаде Шаќири.
Министерот се заблагодари на организаторите за идејата за овој вебинар, истакнувајќи дека потребни се уште повеќе вакви активности за како што рече, да ја подигнеме свеста за надарените и талентираните деца и заеднички да го надополниме и унапредиме механизмот за нивно идентификување и континуирана поддршка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ДИК: ВМРО-ДПМНЕ освои 59 мандати, СДСМ 19, Европски фронт 18, ВЛЕН 13, Левица 6 и ЗНАМ 5 мандати
Државната изборна комисија ги објави првичните резултати за парламентарните избори, а бројките ги потврдија пресметките на партиските штабови.
„На ниво на држава по мандати коалицијата ’Твоја Македонија’ со ВМРО-ДПМНЕ освои 59 мандати, коалиција ’За европска иднина’ со СДСМ 19 мандати. Коалицијата ’Европски фронт’ има 18 мандати, коалиција ВЛЕН 13 мандати, политичка партија Левица 6 мандати и ЗНАМ 5 мандати. Може да се случат некои мали промени да претрпат овие бројки. 94,05 е голем процент на обработени податоци, не верувам дека ќе има некои сериозни промени. Тоа ќе го знаеме веќе утре“, рече претседателот на Државната изборна комисија, Александар Даштевски.
Вечерва почнаа да течат и рокови за приговори за парламентарните избори. Приговори за текот на гласањето може да се поднесат до 19 часот на десетти мај, а приговори за сумирање и утврдување резултати до 23.30 часот исто така на десетти мај.
Македонија
ВМРО-ДПМНЕ ја слави двојната победа, Мицкоски порача: Сите кои што мислеа дека можат да ја уништат Македонија, завршија на буниште
Членовите на партијата ВМРО-ДПМНЕ, заедно со своите симпатизери ја слават победата на претседателските и парламентарните избори на плоштадот во Скопје.
На насобраните луѓе им се обрати лидерот на ВМРО-ДПМНЕ, Христијан Мицкоски.
„Ја ослободивме Македонија. Сите тие кои што мислеа дека можат да ја ограбат Македонија, да ја понижат, да ја уништат, денеска завршија на буниште, а набргу ќе одговараат“, порача тој.
Мицкоски претходно ги повика граѓаните да дојдат на плоштадите низ сите градови на Македонија заедно да ја прослават победата.
Македонија
Ахмети: ДУИ е втора сила во државата
ДУИ е втора сила во државата, изјави вечерва лидерот на интегративците, Али Ахмети.
„Ние Европскиот фронт сме втора сила во државата. Ние всушност го имавме ВМРО-ДПМНЕ како главен противник, затоа што ВМРО многу му помогна на Влен, но разликата помеѓу Европскиот фронт и Влен е преку 30.000 гласови“, рече Ахмети.
Според официјалните податоци на ДИК, ДУИ освои 18 мандати, коалицијата Влен освои 13 мандати.
ВМРО-ДПМНЕ која извои убедлива победа со 59 пратеници и ќе го добие мандатот за формирање Влада, најави дека ќе почне преговори со Влен за коалицирање. Партискиот лидер, Христијан Мицкоски и вечерва повтори дека е време ДУИ да замине во опозиција.