Македонија
Ковачевски – Лахдевирта: Значајна е обединетоста на НАТО и на ЕУ и потребна е евроинтеграцијата на Северна Македонија
Претседателот на Владата на Република Северна Македонија, Димитар Ковачевски, се сретна со Кимо Лахдевирта, нерезидентен амбасадор на Република Финска за земјава.
На состанокот е разговарано за војната во Украина, безбедносната ситуација во Европа, како и за можностите за унапредување на добрата билатерална соработка помеѓу двете држави.
Оценета е како значајна обединетоста на државите членки на НАТО и на Европската Унија во позициите за руската агресија врз Украина.
Исто така, констатирано е дека исчекорот на Република Северна Македонија во европските перспективи е важен за нашата држава, но и како охрабрување за целиот регион, а и како придонес во стабилноста и безбедноста на Европа.
Претседателот на Владата, Ковачевски, се заблагодари за поддршката од Финска за европската интеграција на нашата држава и нагласи дека Северна Македонија продолжува активно да споделува исти вредности со земјите членки на НАТО и на ЕУ.
„Како Влада и како држава, поставени сме целосно на линија на политиките на НАТО и на Европската Унија и во поглед на ситуацијата во Украина. Имаме голема усогласеност на законодавството со легислативата на ЕУ, а развиваме и добрососедски односи во духот на европските вредности. Постои добра енергија во односите со Република Бугарија и на тој начин работиме кон решенија на отворените прашања. Денес јасно е и во Брисел дека евроинтеграцискиот напредок на Република Северна Македонија е важен и за регионот и за ЕУ“, рече премиерот Ковачевски.
На состанокот е потврдена меѓусебната поддршка на двете земји за прашања од полза на граѓаните на државите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одлуки за учество на припадници на Армијата на вежби во Германија, Бугарија, Косово
Владата на денешната седница донесе и повеќе одлуки на предлог на Министерството за одбрана, меѓу кои и за испраќање на припадници на Армијата на Република Северна Македонија за учество на вежбата „BEYOND HORIZON 24“, во Република Бугарија, за испраќање на припадници на Армијата на Република Северна Македонија за учество во НАТО операцијата „КФОР“ во Република Косово и за испраќање на припадници на Армијата на Република Северна Македонија за учество на вежбата „Combined Resolve 24-2“ во Сојузна Република Германија.
Македонија
Личните документи ќе можат да се подигнат и в среда, извести МВР
Во пресрет на претстојните Претседателски и Парламентарни избори што ќе се одржат утре, Министерството за внатрешни работи ги известува граѓаните дека Одделот за граѓански работи, односно сите отсеци за управни работи на оваа организациона единица при МВР на 08.05.2024 ќе работат за издавање на лични документи со работно време од 08.00 до 19.00 часот.
„Исто така ги известуваме граѓаните дека сите барања за лични карти кои се поднесени до 03.05.2024 година, се веќе изготвени и граѓаните можат да ги подигнат“, соопшти МВР.
Македонија
Пронајдени три полуавтоматски пиштоли и 139 куршуми, ОЈО Велес отвори истрага за недозволено држење оружје
Основното јавно обвинителство Велес донесе Наредба за спроведување истражна постапка против едно лице за кривично дело – Неовластено изработување, држење, посредување и тргување со оружје или експлозивни материи од член 396 став 5 во врска со став 3 на Кривичниот законик.
„При претрес во домот на осомничениот во селото Мелница, општина Чашка, полицијата пронашла поголемо количество оружје и муниција – три полуавтоматски пиштоли и 139 куршуми со различен калибар. За осомничениот поднесен е предлог за определување мерка притвор“, соопшти Обвинителството.
ОЈО Велес продолжува да постапува и да презема дејствија за проверка на сомненијата за изборен поткуп во однос на овој осомничен и на уште едно лице во велешко кај кое во текот на вчерашниот ден беа извршени претреси, се додава во соопштението.