Македонија
Тренчевска: Инвестираме во детската заштита, за само 100 дена издадени се осум решенија за отворање нови градинки

Министерката за труд и социјална политика, Јованка Тренчевска, во текот на вчерашната посета на Пробиштип, присуствуваше и на одбележувањето на патрониот празник на ЈОУДГ „Гоце Делчев“, кои за таа пригода подготвија свечена приредба во изведба на децата од детските градинки.
На почетокот од своето обраќање министерката Тренчевска изрази големо задоволство на поканата за одбележување на патрониот празник на ЈОУДГ „Гоце Делчев“, која годинава навршува 48 години од нејзиното отворање.
Денес, во рамки на оваа јавна установа, функционираат 4 детски градинки/објекти со вкупен капацитет од околу 420 деца.
Министерката рече дека со доградбата на детската градинка на објектот Срничка, како дел од Проектот за подобрување на социјалните услуги, опфатот на деца во процесот на згрижување и воспитание го зголемуваме за дополнителни 74 деца. Со ова бројката на деца од досегашните 125 се зголемува на околу 200 деца. Овој дел од објектот треба да биде достапен за нови деца веќе од септември оваа година.
„За Владата и Министерството за труд и социјална политика, вложувањето во раниот детски развој е приоритет. Тоа го потврдуваат 69 детски градинки отворени од 2017 година до денес и опфат на околу 4.300 деца. До крајот на 2022 година, предвидено е отворање на нови 13 градинки/објекти со вкупен капацитет за 1.360 деца, а 15 градинки кои се во тек, се планирани да се отворат во 2023 година со вкупен капацитет за 1.905 деца. За 100 дена од оваа Влада издадени се 8 решенија за отворање на нови детски градинки“, рече Тренчевска.
Таа посочи дека, покрај капиталните инвестиции, министерството инвестира и во предучилишното згрижување и воспитание преку зајакнување на компетенциите на стручниот кадар во нив, затоа што квалитетното предучилишно воспитание придонесува за правилен раст и развој на децата.
„Нека е честит патрониот празник на ЈОУДГ ‘Гоце Делчев’, на градоначалникот, директорката и вработените во градинката им посакувам да продолжат со успешниот процес на предучилишно воспитание и уште многу нови генерации на дечиња кои првите чекори и првите сознанија за светот околу нив ги стекнуваат во детските градинки, преку учење низ игра“, рече Тренчевска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Обвинителството бара да се продолжи притворот на осомничените за пожарот во Кочани

Основното јавно обвинителство Кочани побара од Судот да се продолжи притворот за сите осомничени во истрагата за пожарот во дискотеката „Пулс“ во Кочани што се случи на 16 март, а во кој загинаа 61 лице, а повеќе од 100 се повредени. За тројца од осомничените, Обвинителството бара мерката притвор да се замени со куќен притвор.
„Во текот на денешниот ден до Основниот суд Кочани достави предлози за продолжување на мерките за обезбедување – притвор и куќен притвор за сите осомничени во истрагата за пожарот во кочанската дискотека. Само за тројца осомничени, согласно фазата на обезбедување докази и исполнетоста на законските основи се предлага замена за мерката притвор во куќен притвор. Тоа се двајца осомничени од Државниот пазарен инспекторат и еден припадник на обезбедувањето на дискотеката“, соопштија од Обвинителството.
Од таму додаваат дека продолжуваат истражните дејствија во повеќе правци и во неколку институции со цел испитување на евентуална одговорност, за што јавноста ќе биде известена веднаш по донесувањето на соодветна јавнообвинителска одлука.
Македонија
Во недела посебен сообраќаен режим во Скопје

СВР Скопје известува дека 13.04.2025 (недела) со почеток во 10.00 часот, поради одржување на улична трка, Единицата за безбедност на патниот сообраќај ќе преземе мерки за посебен режим на сообраќајот.
Трасата на движење ќе започне од бул.„Илинден“ пред фонтана Лотус (старт и цел) право долж бул.„Илинден“ до крстосница со бул.„8-ми Септември“ каде се врти полукружно назад по бул.„Илинден“ до целта фонтана Лотус, при што сообраќајот ќе се пренасочува по околните сообраќајници.
СВР Скопје апелира до сите граѓани учесници во сообраќајот да ги почитуваат наредбите што ќе ги даваат полициските службеници.
Македонија
Герасимовски: Преку едукативни и практични активности ја зголемуваме свеста кај учениците за безбедно учество во сообраќајот

Денеска, на отвореното спортско игралиште во ООУ „Димитар Миладинов“, се реализираше проектот „И ние децата сме учесници во сообраќајот“, организиран од Општина Центар. Проектот има за цел преку едукативни и практични активности да ја зголеми свеста кај учениците за безбедно учество во сообраќајот.
Во настанот учествуваа вработени од општината, наставници по техничко и физичко образование, како и 24 ученици од 8 основни училишта на територија на општината. Учениците покажаа одлични вештини во возење велосипед на посебно подготвен полигон, поставен од наставниците по техничко образование.
Градоначалникот Горан Герасимовски потенцираше дека општината е посветена на создавање побезбедна средина за децата.
„Преку вакви проекти не само што учиме, туку исто така и градиме одговорни млади учесници во сообраќајот. Настанот беше одличен пример како преку едукација и игра може да се влијае врз свеста за сообраќајната култура кај најмладите”, рече Герасимовски.
Герасимовски ги награди најдобрите учесници со дипломи и вредносни ваучери од Мега спорт во висина од 12.000 денари за прво, 9.000 илјади денари второ и 6.000 денари за трето место. Прво место освои ученикот Димитар Арсиќ од ООУ „Гоце Делчев“, второ место Дамјан Чивчиристовски од ООУ „Киро Глигоров“ и трето место Томи Тодоровски од ООУ „Киро Глигоров“.
„Општина Центар и во иднина ќе продолжи со организирање вакви и слични настани со цел подобрување на безбедноста и едукацијата на младите во сообраќајот”, додаде Герасимовски.