Македонија
„Скопје сити мол“ со подарок парк и игралиште за жителите на Карпош и Скопје

На 5. мај во присуство на градоначалникот на општина Карпош, посетители и гости, е пуштен во употреба новиот парк пред Скопје Сити Мол, подарок од трговскиот центар за општина Карпош. Паркот се протега на повеќе од 850 метри квадрати и е хортикултурно уреден со висококвалитетни садници, цвеќиња, зеленило, како и урбана опрема. Во рамки на паркот уредена е и летна тераса на која може да се организираат помали настани.
Ова ново катче наменето за најмладата генерација е донација на „Скопје Сити Мол“, која како општествено одговорна компанија е секогаш насочена кон поддршка и задоволување на општествените потреби, посебно во Општина Карпош со која се негува долгогодишна соработка.
Главна атракција во рекреативниот парк наменета за младите посетители е игралиштето изградено според светските трендови со специјално дизајнирана кула за качување која нуди широк спектар на особено возбудливи активности. Кулата е висока околу 8,5 метри е изградена според најдобрите европски стандарди од сложени форми поставени во облик на структура на ДНК. Челичната конструкцијата за качување може да се искачи преку тродимензионална мрежа направена од јажиња во внатрешноста на кулата, кои истовремено обезбедуваат авантура и учење за совладување на пречки за децата, но обезбедуваат и безбедност за корисниците. Покрај оваа кула има и други реквизити како твистер патека, пикадили вртелешка, љуљашка, лизгалка, еди спинер и други..
„За нашите соседи, жителите на Карпош, за жителите на Скопје и за нашите посетители создадовме ново катче за дружење и забава. Во годината кога го славиме нашиот десетти роденден, ова е наш подарок за позелена околина и нови атрактивни содржини за заедницата во која живееме и работиме.“ – изјави Дамјан Корубин, маркетинг менаџер на Скопје Сити Мол.
Детско парк игралиште исто така е со атрибут на Ботаничка Градина каде има:
18 различни видеа растенија
33 дрвја со старост од 10 -30 години
250 грмуски
550 украсни треви
Од Терцијалниот реликт Гинко Билоба преку Персиското цело дрво до Степски „пердувести треви“ и многу други….
Целосното уредување на паркот е инвестиција во вредност поголема од 32.000.000,00 денари и е целосно донација на Скопје Сити Мол за жителите на Карпош и Скопје, но и за сите посетители на трговскиот центар. Новоуредениот простор е во целосна сопственост и владение на општина Карпош. Скопје Сити Мол ќе се грижи и за тековното одржување на паркот и детското игралиште. Користењето на паркот и детското игралиште се бесплатни.
Повеќе информации се достапни на www.skopjecitymall.mk
(ПР)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Левица: Со почит кон борбата од минатото и визија за промени во сегашноста

По повод 11 Октомври, Денот на востанието на македонскиот народ Левица положи цвеќе на Могилата на непобедените и пред споменикот на Кузман Јосифовски-Питу во центарот на Прилеп. Во полна со дух и средечна атмосфера партиска делегација, предводена од лидерот на Левица, Димитар Апасиев, одржа средба со граѓани на која беше презентирана програмата за Прилеп, се наведува во соопштението на Левица.
Симболиката на денов би требало да ја разбуди свеста на прилепчани и да покажат дека се народ кој е спремен за револуција, и на следните локални избори да изберат советници кои вистина ќе се борат за Прилеп, преку конструктивна критика и објективни одлуки, изјави Жарко Стеваноски, кандидат за советник во Општина Прилеп.
На народната средба носителот на советничката листа на Левица во Прилеп, Методија Костоски, ги претстави четирите главни приоритети на програмата.
„Прво ќе направиме сеопфатна ревизија на сите поголеми проекти, особено на тие што немаат технички прием, заедно со целиот движен имот со кој располага партијата. Следно е инклузија на граѓаните. Сакаме да ги отвориме вратите на општината и да ги вклучиме сите во процесот на одлучување. Трето, а можеби и најважно, е сообраќајниот хаос со кој се соочува Прилеп. Мора да почнеме со регулирање на сообраќајот. Ќе поднесеме иницијатива за укинување на платеното зонско паркирање. Четврто е контрола врз финансиското работење на јавните претпријатија“, истакна Костоски.
И покрај силната цензура кон нив, од Левица порачуваат дека нема да се предадат и ќе продолжат со директни средби со народот низ целата држава, за да ја донесат борбата за правда и транспарентност во секоја општина.
Македонија
Од утре секој ден по 15 часот ќе има блокади за загинатите во дискотеката „Пулс“

Од утре, ќе има мирни јавни собири и блокади на кружниот тек кај двојниот мостот на улицата „Стево Теодосиевски“ во Кочани. Блокадите ќе траат по еден час секој ден, во периодот од 15:15 до 16:15 часот, се додека не започне судењето.
Ова го најавија родителите на загинатите во пожарот во „Пулс“ од 16 март, од 26. „Марш за ангелите“ одржан денеска пред Основниот суд во Кочани, испровоцирани од тоа што, според нив, адвокати на осомничените изјавиле дека судењето ќе трае 10 до 15 години.
– Оваа изјава е срамна и понижувачка за семејствата чии деца ги загубија животите во трагедијата. Таквите зборови звучат како обид да се подготви јавноста за бавно одолговлекување и заборавање. Ние тоа нема да го дозволиме, рече мајка на загинато девоче пред новинарите.
Родителите на настраданите бараат да се зголеми капацитетот на судскиот состав со дополнителни судии и судски соработници за да не се одолговлекува процесот поради недостаток на ресурси. Исто така, нагласија, рочиштата мораат да добијат приоритет и постојано темпо, со цел постапката да тече непречено и без непотребни одложувања. Тие се сомневаат во манипулации или скриено забавување на судскиот процес, бараат јавно и транспарентно следење на сите процесни активности.
-Правдата не смее да се влече. Ќе бидеме тука – на кружниот тек, се додека не почне судењето, а за понатаму зависи како ќе се одвиваат работите. Животот на едно дете вреди повеќе од нечии интереси и адвокатски игри, порачаа членови на семејства што загубија свои блиски во мартовскиот пожар во „Пулс“.
Денешниот 26-ти „Марш за ангелите“ во Кочани, вообичаено започна од „Паркот на Револуцијата“ каде и заврши. Попатно, петнаесетина минути беше блокиран сообраќајот на кружниот тек пред двојниот мост, токму на местото каде што од утре па натаму се најавуваат јавни собири и блокади.
Македонија
Жените од бизнис-секторот го поканија Орце Ѓорѓиевски на ручек

Актуелниот градоначалник на општина Кисела Вода, претседател на ЗЕЛС и кандидат за прв човек на Град Скопје од ВМРО-ДПМНЕ, Орце Ѓорѓиевски присуствувал на ручек со жени од бизнис-секторот.
Тој на Фејсбук објави дека на покана од мрежата „Јас сум жена“ денеска, заедно со неговата сопруга, бил на собир со жени претприемачи, универзитетски професорки, директорки , како што наведе:„силни, самостојни и успешни жени кои го движат Скопје и ја градат посилната Македонија“.
– Разговаравме искрено за предизвиците и за идеите што можат да го унапредат нашиот град. Едно е јасно – Скопје мора повторно да стане отворен град, град во кој комуникацијата со граѓаните и деловниот сектор ќе биде жива, достапна и продуктивна. Им благодарам од срце за силната поддршка која ми ја даваат, за инспирацијата и енергијата што ја носат, напиша Ѓорѓиевски на социјалната мрежа.