Свет
Проруските сили: Уште 50 цивили евакуирани од Азовстал
Проруските сили соопштија дека уште 50 луѓе биле евакуирани во саботата од фабриката за челик Азовстал во Мариупол, каде стотици цивили беа заробени со недели заедно со украинските борци кои се кријат во мрежата на подземни тунели од советската ера.
Штабот на територијалната одбрана на самопрогласената Народна Република Доњецк (ДПР) објави на Телеграм дека од фабриката за челик сега се евакуирани вкупно 176 цивили. Ројтерс не можеше веднаш да ги потврди тие тврдења.
Околу 50 цивили беа префрлени во петокот во прифатен центар на територијата на ДПР, чии сили се борат заедно со Русите. Минатиот викенд беа евакуирани десетици цивили.
Мариупол го доживеа најразорното бомбардирање во десетнеделната војна. Фабриката е последниот дел од градот, стратешко јужно пристаниште на Азовското Море, сè уште во рацете на украинските борци.
Десетици цивили се заробени покрај нив со недели во фабрика со малку храна, вода или лекови. Претседателот Володимир Зеленски во доцното ноќно видео обраќање во петокот рече дека Украина работи на дипломатски напори да ги спаси бранителите забарикадирани во фабриката за челик. Не е јасно колку украински борци останале таму.
Украинскиот Генералштаб во саботата соопшти дека руските сили спроведуваат офанзива во источна Украина за да воспостават целосна контрола над регионите Доњецк и Луганск и да одржат копнен коридор меѓу тие територии и Крим.
Во близина на Харков, руските сили продолжуваат со артилериско гранатирање на населени места во близина на градот во североисточниот дел на земјата.
Русија денеска соопшти дека уништила голема залиха воена опрема од САД и европските земји во близина на железничката станица Боходухив во регионот Харков. Министерството за одбрана соопшти дека во текот на ноќта погодило 18 украински воени објекти, вклучително и три складишта за муниција во близина на јужниот пристанишен град Одеса.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Претседателот на Колумбија: Ги раскинуваме дипломатските односи со Израел
Колумбискиот претседател Густаво Петро изјави дека ќе ги прекине дипломатските односи со Израел поради војната во Газа.
Петро претходно силно го критикуваше израелскиот премиер Бенјамин Нетанјаху и повика Колумбија да се приклучи на тужбата за геноцид на Јужна Африка против Израел пред Меѓународниот суд на правдата.
„Овде пред вас, владата на промени, претседателот на републиката, најавува дека утре ќе ги прекине дипломатските односи со државата Израел, затоа што има влада, затоа што има претседател геноциден“, рече Петро на собир по повод Меѓународниот ден на трудот.
Светот не може да биде слеп пред настаните во Газа, додаде тој.
Во шестмесечната воена операција на Тел Авив загинаа 34.488 Палестинци, а ранети се 77.643, според здравствените власти во Газа. Војната ги расели повеќето од 2,3 милиони жители на Појасот Газа и го уништи најголемиот дел од крајбрежната енклава.
Најавата на Петро за прекин на дипломатските односи со Израел доаѓа во екот на се почестите шпекулации дека Израел наскоро ќе го нападне градот Рафах во јужниот дел на Газа, каде што се засолниле повеќе од милион Палестинци раселени од своите домови.
Регион
Tлото на Балканот се тресе: По Хрватска, земјотреси и во Албанија и Грција
Два земјотреси, во растојание од една минута – во 19.19 и 19.20 часот – вечерва се регистрирани на територијата на Албанија.
Земјотресите се со интензитет од 2,1 степен според Рихеровата скала.
Епицентарот на првиот земјотрес бил на седум километри од Елбасан, додека вториот на 62 километри од Тирана.
Според информациите на ЕМСЦ, неколку минути претходно, земјотрес од 2,5 степени имало и во јужниот дел од Грција, а уште два од 2 и 2,3 степени се регистрирани предмалку на Крит.
Претходно денес, Хрватска ја погоди силен земјотрес од 4,7 степени, а беше почувствуван и во Босна и Херцеговина. По овој потрес, следеа неколку помали.
Свет
Хамас: Одговор за предлогот за примирје и ослободување на заложниците веројатно утре
Водачите на Хамас вечерва рекоа дека го проучуваат предлогот за примирје и ослободување на заложниците што им го претставија египетските посредници и велат дека се надеваат оти ќе го испратат својот одговор до утре, се вели во соопштението на палестинската милитантна група испратена до „Асошиејтед прес“.
Тековната рунда разговори за примирје меѓу Израел и Хамас изгледаат сериозни, но страните се во несогласување за едно клучно прашање – дали војната треба да заврши како дел од договорот, објави „Тајмс оф Израел“.
„Многу веројатно утре, односно четврток, ако даде Господ, посредниците ќе добијат одговор“, соопшти Хамас.
Преговорите меѓу Хамас и Израел, преку посредници како САД, Катар и Египет, траат со недели, а по Париз се водат нови рунди разговори во Каиро.