Израелската армија соопшти дека извршила масовен воздушен напад врз Иран, гаѓајќи 150 цели со стотици проектили во текот на ноќта. Според израелски воени претставници, нападите биле насочени кон воени објекти, инфраструктура поврзана со нуклеарната програма, како и кон научници и високи воени личности.

„Оваа акција сериозно ја забави иранската нуклеарна програма“, изјави претставник на Израелските одбранбени сили (ИДФ), додавајќи дека штетите се далеку поголеми од неколкунеделно одложување.

Нападот, кој се смета за една од најголемите воени ескалации на Блискиот Исток во последните децении, предизвика големи загуби. Ирански власти информираа дека загинале десетици лица, вклучително и најмалку 20 деца.

Како одговор, Иран истрела четири бранови балистички ракети кон територијата на Израел. Според ИДФ, три израелски државјани загинале, а десетици се повредени.

Израелските сили потврдија дека дел од нападите биле насочени кон стратешки објекти во Натанц и Исфахан – центри на иранската нуклеарна програма. Според израелскиот претставник, биле уништени и локации поврзани со развој на нуклеарна бомба, тврдејќи дека постоеле „конкретни разузнавачки податоци“ за напредок на Иран во таа насока.

Техеран остро ги отфрли обвинувањата, тврдејќи дека нивната нуклеарна програма е од исклучиво мирнодопска природа.

Израел сега ја смета „воздушната рута до Техеран“ за „де факто отворена“, а меѓу загинатите, според ИДФ, се и деветмина ирански нуклеарни научници – клучни фигури во програмата.

Украинскиот претседател Володимир Зеленски соопшти дека руската офанзива во североисточниот дел на земјата е запрена, а украинските сили успеваат да ја стабилизираат ситуацијата во Сумската област, каде што се водат интензивни борби долж самата граница со Русија.

„Ја израмнуваме ситуацијата. Борбите се одвиваат на самата граница. Треба да знаете дека непријателот беше запрен. Максималната длабочина на офанзивата е седум километри од границата“, изјави Зеленски, пренесе неговиот кабинет.

Според украинските власти, Русија распореди околу 53.000 војници во правецот кон Суми, иако главниот фокус на руската армија останува на Доњецката област. Москва најави создавање т.н. „безбедносна зона“ во Сумска и Харковска област, со што дополнително ги засили борбите на североистокот од Украина.

Зеленски истакна дека украинската армија одржува одбранбени линии долж повеќе од 1.000 километри фронт и демантираше дека руските сили влегле во Дњепропетровската област, која се граничи со делумно окупираните територии Доњецк, Херсон и Запорожје.

Во меѓувреме, украинските сили извеле неколку успешни дронски напади, собориле руски авиони и оштетиле стратешки мост што ја поврзува Русија со анектираниот Крим, користејќи подводни експлозиви.

Зеленски повторно призна дека Украина не може целосно да ја врати територијата само со воена сила и повика на построги санкции кон Русија, со цел да се зголеми меѓународниот притисок врз Москва за враќање на преговарачката маса.

Тој потсети дека претходните два круга мировни преговори во Истанбул донесоа ограничен напредок, а засега се спроведуваат само размените на заробеници. Очекувањата се следната размена да се случи до 20 или 21 јуни.

„Договорено е размената да заврши, по што ќе се разговара за следниот чекор“, изјави Зеленски.

Британскиот државјанин Вишвас Кумар Рамеш чудесно ја преживеа страшната несреќа на патнички авион на „Ер Индија“ кој се урна во близина на Ахмедабад, Индија. Тој е единствениот преживеан од 241 патник и моментално се наоѓа на лекување во болница, во состојба на шок и неверување.

„Сè се случи пред моите очи. Не можам да поверувам дека сум жив. Само јас преживеав – сите други беа мртви“, изјави Рамеш за индиските медиуми.

Во сведочењето, Рамеш раскажува дека вратата за итни случаи била скршена, а неговото седиште – уништено. Забележал мал отвор и решил да се обиде да излезе, и покрај хаосот што владеел во авионот.

„Видов дека имам малку простор и се обидов да излезам. Се сеќавам на звукот од пукање метал, луѓе што трчаат… и потоа сè се стемни. За момент почувствував дека ќе умрам. Но, кога ги отворив очите, сè уште бев жив. Го откопчав ременот и излегов низ отворот. Пред мене – стјуардеси, тетки и чичковци… сите лежеа мртви“, раскажува Рамеш.

Тој се потсетува и на еден чуден момент пред самиот пад – само неколку минути по полетувањето, како што вели, авионот одеднаш запрел.

„За една минута, се чувствуваше како авионот штотуку да застана. Зелените и белите светла трепкаа“, рече Рамеш.

Причината за авионската несреќа сè уште не е официјално потврдена, но индиските власти започнаа истрага за трагедијата која однесе над 240 животи.

‘Everything happened in front of my eyes’: Lone survivor of #Ahmedabadplanecrashhttps://t.co/k8FbblQocM pic.twitter.com/N03t3afpY9

— The Hindu (@the_hindu) June 13, 2025