Македонија
(Видео) Ковачевски и средношколците разговараа за прилагодувања на државната матура
Премиерот Димитар Ковачевски денеска во Владата прими делегација на Сојузот на средношколци предводена од претседателот Лука Павиќевиќ, со кои разговараше за нивните предлози во насока на прилагодувања на државната матура, поради предизвиците кои се случија поради пандемијата од Ковид-19 и штрајкот во кој беа вклучени и вработените во средното образование.
На состанокот, на кој присуствуваа и пратеничките Моника Зајкова и Санела Шкријељ, беа разгледани сите барања на претставниците на Сојузот на средношколци и беа донесени соодветни предлози и решенија.
Ковачевски истакнувајќи дека младите се една од движечките алки во општеството и клучен Владин партнер во креирањето успешни политики за создавање современо и квалитетно образование ги поддржа младите средношколци со свој претставник да бидат вклучени во стручната работна група која ги изготвува измените и дополнувањата на Законот за средното образование, под водство на Министерството за образование и наука.
Ковачевски додаде дека реформите се комплексни и нагласи дека клучно е при реформирањето на услугите и системите, одлуките да се носат заедно со оние на кои се однесуваат, во случајов на младите и нивните професори.
Во врска со барањата за модифицирање на државната матура, која е збир од повеќе екстерни и интерни испити со кои се проверуваат и се вреднуваат знаењата, вештините и способностите на учениците кои ги стекнале во четиригодишно средно образование, беше посочено дека на барање на средношколците од минатата година веќе се скратени програмите за екстерните испити, поради пандемијата од Ковид-19.
Претседателот на Владата и Сојузот се согласија дека прашањата за екстерните испити ќе го опфаќаат материјалот заклучно со март со што не е опфатен периодот кога беше штрајкот на образовниот кадар.
Банките со прашања за интерните испити ќе бидат споделени со ученици најмалку три недели пред денот на испитот. Базата на прашања за интерните испити ќе биде споделена, а за екстерните испити, на веб-страницата на Државниот испитен центар (ДИЦ) се објавени тестовите од сите претходни години. Прашањата се соодветни на испитите од минатите години и ќе бидат опфатени во еден ПДФ документ на веб-страницата на ДИЦ, односно ДИЦ ќе изготви Каталог на прашања за екстерните испити.
На денешниот состанок премиерот Ковачевски повтори дека тој сосема ги разбира барањата на средношколците и како универзитетски професор секогаш во соработка со министерот за образование и наука и останатите образовни институции ќе се ангажира за обезбедување квалитетен образовен процес во континуитет.
По однос на барањето од претставниците на Сојузот на средношколци за продолжување на рокот на изработка на проектна задача, како дел од државната матура беше одговорено дека тоа веќе е сторено, и до 16 мај (понеделник), оние 10 проценти од матурантите во државата (1.598 ученици) кои сè уште немаат завршено со овој, клучен дел од матурскиот испит, ќе можат тоа да го сторат во продолжениот рок.
На денешниот состанок сите учесници се согласија дека матурата е заокружување на еден дел од образованието и учениците коишто не планираат да продолжат со образованието, имаат избор да полагаат или само училишна матура или завршен стручен испит во зависност од нивното училиште.
Воедно по барање на Сојузот беше договорено да се спроведе и дополнителна испитна сесија за оние матуранти кои во испитниот период не би можеле да полагаат заради спреченост од вирусот Ковид-19.
На денешниот состанок со премиерот присутните претставници на Сојузот на средношколци го запознаа премиерот Ковачевски со нивното барање и подготвените предлози од нивна страна за измена во Законот за средно образование, а кои се однесуваат на барањето бесплатниот јавен превоз да биде достапен за сите средношколци, без разлика дали наставата ја посетуваат во јавно или приватно средно училиште, како и да се дефинираат одредени училишта кои поради потребата од пракса имаат потреба од превоз и преку летото.
Во оваа насока, од претставниците на Сојузот на средношколци беше поздравена Одлуката на Владата на Република Северна Македонија преку Министерството за транспорт и врски и Железници на Република Северна Македонија транспорт АД-Скопје да се воведе бесплатен превоз во железничкиот сообраќај за сите ученици во средното образование, еднаш неделно, во среда, одлук а што е согласно мерките за намалување на трошоците на живот за граѓаните и со цел поттикнување на железничкиот сообраќај како најевтин и еколошки превоз.
Претставниците на Сојузот на средношколци го запознаа премиерот Ковачевски и со нивната иницијатива „Лидер/ка на училиште, лидер/ка во иднината“, која ја спроведуваат заедно со ИДУЕП, а за цел има воведување на средношколска демократија во сите средни училишта од државата и регулирање на средношколското организирање за првпат во историјата.
Денешниот состанок од сите учесници беше заокружен со изразување задоволство од планираната нова концепција на матура, којашто ќе биде согласно потребите на актуелното културно и општествено живеење, а која веќе се подготвува од Министерството за образование и наука, Државниот испитен центар и во соработка и учество на сите засегнати страни.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Денеска, на големиот празник Цветници, осветен Македонскиот Крст во Драчево, висок е 63 метри
Денеска, на големиот празник Цветници, во пресрет на Велигден, беше осветен македонскиот Крст во Драчево, висок 63,5 метри, втор по големина во Македонија. Во присуство на г.г. Стефан кој ја водеше церемонијата на осветувањето, градоначалникот на Кисела Вода Орце Ѓорѓиевски, Претседателот на Светскиот Македонски Конгрес Тодор Петров, како инвеститор на објектот, и други видни гости од општествениот, политичкиот и црковниот живот во Македонија, како и огромен број на граѓани, жители на Драчево, се одржа манифестација која за сите присутни ќе остане во трајно сеќавање.
– Од денес погледот кон небото нема да е ист. Од денес- над нас, тука во Драчево стои еден моќен симбол на верата, надежта и љубовта. Крстот е икона на верата, симбол на возвишеноста на човекот пред бескрајната моќ на небото. Во неговите контури е собрано целото значење на христијанството, каде се преплетуваат симболиката на жртвата, спасението и вечната љубов кон Бога! Осветувањето на овој Македонски Крст е чин на почитта кон минатото, вера во иднината и мост кој не спојува сите нас. Тој ќе стои тука, како светилник на нашата заедница, потсетувајќи нè на човековите вредности, на моралот и на нашиот пат кон почит и човекољубие. Силно верувам дека Бог нè осветлува и нè води, потсетувајќи нè дека секој наш чекор, секој наш обид да градиме нешто во Негово име, е благословен и благодетен. И затоа ова е богатството и заветот што го оставаме за следните генерации-истакна во своето обраќање градоначалникот Ѓорѓиевски. Додаде дека очекува овој Крст да биде светилиште за сите, мирно место за размислување и молитва, новото збиралиште и центар на Кисела Вода, а можеби и на цело Скопје, од каде ќе одекнува заедништвото, сплотеноста, и љубовта. Тој им се заблагодари на Светскиот Македонски Конгрес, на МПЦ И Г.Г. Стефан, и на секој поединец, на секоја компанија, на сите кои дадоа свој придонес за изградбата на Македонскиот крст.
– Посебно ми е драго што неговото осветување се случува денес, кога го славиме празникот Цветници, во предвечерјето на најголемиот ден за христијаните-Велигден. Празникот кој ја слави победата на животот над смртта и кој на највисок пиедестал ја издигнува верата. Денешниот ден е силен одек за времињата што доаѓаат, за промените што веќе започнаа да се случувaат, за новите историски моменти кои допрва ќе ги испишуваме во историјата на нашата Македонија. Со Божји благослов продолжуваме напред со проекти, со дела кои ќе бидат нашиот потпис и влог во иднината што ја оставаме на следните поколенија-изјави градоначалникот Орце Ѓорѓиевски.
Изградбата на Македонскиот крст во центарот на Драчево, во “Паркот на бранителите”, започна на 16 април 2022 година. Неговото осветување денес е најголемата молитва пред Господа за победата на животот над смртта, за спасение на човештвото, на Македонците по род и државјанство, и на државата Македонија, истакна Претседателот на Светскиот Македонски Конгрес, Тодор Петров.
-Македонскиот Крст во Драчево е дванаесетти во светот, а втор во Македонија. Висок е 63,5 метри, широк 4 метри, со распон на краците 34 метри, секој крак по 15 метри. Постаментот е 12,5 метри, на три нивоа, темелната плоча е со дебелина од 1 метар. Во Македонскиот Крст во Драчево е вградена челична конструкција од 80 тона, премачкана со алкална жолта боја. На крстот е изведена светлечка инсталација со енергетска самоодржливост, што ќе претставува вистинска атракција во овој дел од градот Скопје и општината Кисела Вода. Вечерва ќе не огрее неговата светлина. Крстот претставува симбол на мирот и љубовта наспроти омразата и војната и затоа, радоста е заемна и благодатна за сите граѓани на државата Македонија, за сите Македонци по род и државјанство. За многаја лета Крстот, кој денес се освети, за многаја лета Драчево и општината Кисела Вода, за многаја лета Скопје метрополата и државата Македонија! Нека овој свет крст биде светилник на верата во Бога и на љубовта за татковината Македонија! Нека Господ Бог не’ благослови сите нас, нека Господ Бог ја благослови Македонија-истакна Тодор Петров, кој потоа, како инвеститор на објектот им додели плакети и благодарници на сите кои ја помогнаа изградбата на ова свeто здание.
Настанот беше дополнет со богата музичка програма од познати македонски музичари- Огнен Здравковски, Миле Кузмановски, Бојана Скендеровски како и мешаниот камерен хор ,,Свети Климент Охридски” и дечињата од КУД “Китка”.
Македонија
Мицкоски очекува поддршка за Силјановска Давкова од Димитриевски и ЗНАМ, но и од другите кандидати кои не влегоа во втор круг
„Се слушнавме и со господинот Максим Димитриевски. Знаете дека ВМРО-ДПМНЕ е во коалиција со градоначалникот на Куманово Максим Димитриевски во Куманово. Очекуваме поддршка за нашиот претседателски кандидат од Максим Димитриевски“, истакна претседателот на ВМРО-ДПМНЕ Христијан Мицкоски одговарајќи на новинарско прашање при увидот на градежни активности во Општина Аеродром.
Претседателот Мицкоски продолжи и додаде:
„Ги повикувам сите гласачи на сите кандидати кои не влегоа во вториот круг да го поддржат идниот претседател професорката Гордана Силјановска Давкова затоа што на тој начин Македонија ќе биде повторно ваша, повторно горда, а не понижена ограбена како што е сега. Да одиме напред бидејќи сите одат напред, да не тонеме во политичкото мочуриште кое не влече назад 6 и половина години и да бидеме заробеници на неколкумина кои станаа милионери, а голтари влегоа во политиката“, дециден е Мицкоски.
Македонија
Циривири: ЗНАМ со реформите во здравството ќе овозможи граѓаните да добијат подобри третмани, во современи регионални центри, со реални цени на услугите
Движењето ЗНАМ – За наша Македонија денеска одржа прес конференција на
која професор доктор Јасмин Циривири ги претстави клучните прашања од
областа на здравството во изборната програма „Проглас за достоинствена
Македонија“ на Движењето, за претстојните парламентарни избори.
Професор Циривири рече дека Движењето ЗНАМ – За наша Македонија нуди
конкретни мерки за идните реформи во областа на здравството, а тие во
основа подразбираат максимално и професионално залагање од страна на
секој чинител во здравствената сфера. Целта е, како што рече, тој
пристоен и достоинствен живот на секој граѓанин во државата, со еднаков
пристап до потребните услуги. Циривири додаде дека ЗНАМ сака да покаже
дека може да се создадат услови граѓаните да бидат здрави,
работоспособни и да придонесуваат за општата благосостојба. Тој посочи
дека за да се направи тоа е потребно:
„Реконструкција на постојните и доизградба на започнатите медицински
установи на територијата на Македонија, со акцент на формирање на три
здравствени центри во Штип, Битола и Тетово, по примерот на ГОБ „8ми
Септември“. Тоа е од стратешко значење, бидејќи ќе овозможи брз пристап
и услуги на граѓаните, како и подигање на нивото на третманите со
софистицирани дијагностички методи“.
Истовремено, како што рече тој, граѓаните нема да бидат изложени на
дополнителни материјални трошоци и стресови при добивањето на
здравствените услуги, кои им следуваат по сите морални и здравствени
норми во едно современо општество. Циривири додаде дека при тоа ќе се
направи итно пополнување на дефицитарниот специјалистички кадар во овие
установи со упатување на млади лекари на специјализација, вклучувајќи ги
и приватните специјализанти. Исто така ќе се направи и привремено
дополнување на медицинскиот кадар по принципот на ротација во
регионалните центри со кадар од болниците во главниот град, до моментот
на оспособување на доктори од дефицитарните специјалности во истите.
„Очекуваме, рече доктор Циривири, – Со ова да се намалат листите на
чекање за софистицирани дијагностички процедури и особено елективните
оперативни третмани“.
Како втора мерка се предвидува формирање на реални цени на здравствените
услуги од страна на Фондот за здравствено осигурување со цел исплата
според извршените услуги кон здравствените установи, со што ќе се
овозможи самоодржливост на истите.
„Структурата на реалните цени подразбира режиски трошоци, дневниците на
персоналот неопходен за оптимално функционирање на основна единица – на
ниво на одделение, потрошниот санитетски материјал, како и
амортизацијата за одржување на непотрошниот санитетски материјал. Со
овој систем се зголемува мотивираноста на установите да ја зголемат
ефикасноста и постојано да го подобруваат квалитетот во пружањето на
здравствена нега. Овој принцип на економско делување овозможува
непосреден увид во финансиската состојба на установата и активно
учествуво во планирањето и трошењето на потрошниот и непотрошниот
медицински материјал и опрема, како и во одржувањето на болничките
капацитети“, рече Циривири.
Формирањето на диспечерски податаочен центар во Министерството за
здравство, е третата мерка што се предвидува.
„Со неа ќе се овоможи постојан увид во исполнетоста на капацитетите на
сите здравствени установи во државата.Оваа централизација на
логистичките податоци овозможува навремен транспорт и прием на итните
пациенти, за да се надмине беспотребното лутање на болничките возила по
здравствените установи без точна информација за слободно место за прием
на итните пациенти. Овој центар, исто така, ќе има клучна улога особено
при згрижувањето на пациентите при масовни незгоди,
железнички,автобуски, какон и поплави, земјотреси итн“, нагласи доктор
Циривири.
Една од мерките за подоборување на состојбите во здравството е и
креирањето на реални, конкурентни плати во сите сектори и нивоа на
здравството.
„Во ставките за плати, додатоци и надоместоци на плати во Буџетот, ќе се
зголеми масата на средства за најмалку 15 проценти, и на тој начин ќе се
обезбеди соодветно зголемување, како на докторските, така и на платите
на медицинските сестри и помошниот персонал. Порастот на платите ќе се
усогласува со порастот на минималната плата“, рече доктор Циривири.
Тој нагласи дека медицинскиот персонал ќе биде во процес на континуирана
медицинска едукација во соработка со здравствени установи кои се
движечки центри во развојот на современата медицина, а Министерството за
здравство ќе го координира развојот, овозможувајќи доостручување, по
предлог на непосредните носители на стручната дејност, во согласност со
потребите на установите.