Култура
„Филмска училница“ – проект за филмска писменост и креативна едукација од областа на филмот и аудиовизуелното наследство
Кинотеката со својата „Филмска училница“ создава катче за сите деца што сакаат да се дружат, да гледаат филмови и да учат како од својот богат свет со идеи, фантазии и чувства да создаваат приказни. Се одржаа уште три нови училници, како дел од „Џифони филмските денови“, на кои учесниците имаа можност да се запознаат со разните аспекти на креирање филмски приказни.
Направија кратки вежби на опсервација, кои ги споивме во една целина и со проекција на големо платно ги добија првите сознанија како со спојување на разни кадри и преку разни точки на гледање, настануваат разни филмски приказни. Исто така, направивме и една споредба со првите филмови на браќата Манаки и на браќата Лимиер, кои, всушност, се опсервациски кадри на одбрани ситуации или дејства.
Се обидоа да направат и декомпонирање сцена од филм. По проекциите на кратките филмови „Градот на Вардар“ и „Весници, весници“, кои се приказни за Скопје, снимени во 60-тите години на минатиот век, добија задача да снимат една сцена инспирирана од старо Скопје. Разговаравме и како одредено чувство може да биде основа за креирање филм. Преку пример од книгата „Малиот принц“ на Егзипери дискутиравме за големината и богатството на детскиот свет и за разните перцепции на децата и возрасните. И дека токму од таа детска фантазија се создаваат најубавите филмови.
Дел од работилницата беше и младиот автор Филип Лафазановски, кој сподели свои моменти од првите допири со филмската уметност и за своите први чекори во креирањето приказни.
Беа прикажани и уште два кратки филма од Националниот фонд на Кинотеката: „Лифт горе, лифт долу“ и „Бели штркови“.
Филмската училница продолжува со своите часови. Следни активности се мала работилница за анимација од млад автор и ученик и запознавање со процесот од идеа до сценарио.
В сабота, 28 мај, во Кинотеката, со почеток од 10 часот, почнува 7. ден на „Џифони филмски денови“, со проекција на филм за деца и млади, а од 12.30 следува „Филмската училница“.
„Филмската училница“ – проект за филмска писменост и креативна едукација од областа на филмот и аудиовизуелното наследство, наменет за ученици од основните и средните училишта. Проектот е финансиран од Министерството за култура.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Денес е Ден на македонскиот јазик
Петти мај е прогласен за „Ден на македонскиот јазик“. На овој ден во 1945 година, со решение на Народната влада на Федерална Македонија е усвоена азбуката на македонскиот јазик врз принципот еден глас – една буква, а набргу потоа, на 7 јуни 1945, е усвоен и Правописот на македонскиот јазик.
Кодификацијата на современиот македонски стандарден јазик се заокружува со делата на Блаже Конески – Граматиката на македонскиот литературен јазик, Речникот на македонскиот јазик и Историјата на македонскиот јазик.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.