Македонија
Маричиќ: Културата ја надминува политиката и ги зајакнува врските меѓу народите
Заменик претседателот на Владата задолжен за европски прашања, Бојан Маричиќ во рамки на Самитот ,,Отворен Балкан” го отвори и водеше панелот посветен на соработка во областа на културата, на кој се обратија и министерките за култура на Северна Македонија, Бисера Костадиновска Стојчевска, Албанија, Елва Маргарити и Србија, Маја Ѓоковиќ.
-Наша обврска е да вложиме напори за зачувување на културното и во исто време да инвестираме во уметноста и креативноста на поединците како придонес кон развојот на културата, но и други области кои имаат директно или индиректно влијание врз култура, рече на панелот вицепремиерот Маричиќ.
Националниот ИПА координатор кажа дека соработката веќе е активна со соседските земји во областа на културата и предмет на финансирање од Европската Комисијата на многу скромен, но значаен начин, посочувајќи неколку проекти од прекуграничната програма.
-Со Грција тоа беше преку културен проект за финансирање на изучувањето на грчкиот јазик во Пелагонискиот регион. Исто така, секоја година фестивалот „Охридско лето“ нè потсетува дека зачувувањето на Античкиот театар, со средства од ЕУ, денес ни овозможува домаќинство на многу културни настани на единствен локалитет, а истовремено Охрид го прави автентичен во културното наследство, истакна Маричиќ.
За вицепремиерот Маричиќ културата е многу моќна алатка која ги надминува политиката, религијата, јазикот и се друго што не разделува, ставајќи акцент на програмата на ЕУ „Креативна Европа“ . која ги обединува уметници од целиот свет, и покрај разликите, и покрај границите, додаде Маричиќ на панел дискусијата на тема: „Отворен Балкан ја отвора културата“.
На крај испрати порака дека треба да се искористат фондовите на ЕУ за отворениот балкански регион за да се подобрат врските и односите на нашите граѓани преку културата и уметноста, со што ќе се даде наш придонес во културно богатата и диверзифицирана Европа, зачувувајќи го нашето културно наследство од минатото, а славејќи го она што е важно за нашата иднина.
Министерките за култура упатија пораки за интензивирање на културната соработка во регионот преку заеднички иницијативи и преку соработка со која ќе бидат рехабилитирани објектите кои се културно наследство преку проекти финансирани од ИПА, како и можностите кои ќе се отворат за уметниците и културните работници, но ќе придонесат и во развојот на културниот туризам во овој дел на Европа. Тие се согласија дека има бројни области во културата во кои има потенцијал за здружување и соработка со кои ќе се постигнат значајни резултати за целиот регион.
Во рамки на Самитот потпишани се четири меморандуми за соработка, од кои еден меморандум за разбирање за културна соработка во Западен Балкан.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„Повторен обид на Министерството за здравство да протурка реновирање на операциски сали и фаворизира одредени фирми“, вели ВМРО-ДПМНЕ
„Министерството за здравство повторно ја објавува постапката за јавна набавка на проектирање и изведба на реконструкција и реновирање на операциски сали, нивни пред простории и ходници со машински соби во УКЦ Мајка Тереза – хируршки клиники по принципот „клуч на рака“, вели Комисијата за здравство на ВМРО-ДПМНЕ.
„Истата пред само месец и половина Државната комисија за жалби по јавни набавки ја поништи од причина што Министерството за здравство изготвило тендерската документација која не е во согласност со Законот за јавни набавки и истата доведува до дискриминација на економските оператори и ограничување на пазарната конкуренција.
Повторената постапка објавена е на ден 24.04.2024 година, неработен ден прогласен со одлука на Влада поради одржување на прв круг претседателски избори.
Во тендерската документација за економска способност на економските оператори се бара минимум 550.000.000 денари со ДДВ вкупен приход во последните три години за секоја година поединечно.
Ова е целосно неосновано.
Прво, затоа што во финансиските извештаи приходот се искажува без ДДВ (ДДВ-то е обврска на друштвото да го плати спрема државата).
Второ, зошто не е објавена проценетата вредност на набавката за да може да се утврди дали овој услов е согласно Законот за јавни набавки? (Според Законот за јавни набавки – Договорниот орган не смее да бара минималниот годишен приход да изнесува двојно повеќе од проценетата вредност на набавката)“, се наведува во статусот на фејсбук на Комисијата за здравство на ВМРО-ДПМНЕ.
Македонија
„Народот доаѓа по своето, по она што Али и Груби му го одзедоа, по она што Заев, Таче и Стево му го продадоа“, рече Стојаноска
„Мора да почнеме поинаку да функционираме и да не молчиме пред неправдите. Мора да се обелоденуваат сите криминали и скандали. Мора да бидеме гласни, за да не станеме невидливи. Криминалот е тој кој треба да биде замолчен. Доста е“, порача Дафина Стојаноска синоќа на митинзите во Гостивар и Тетово.
„На 8-ми мај народот доаѓа по своето, по она што Али и Груби му го одзедоа, по она што Заев, Таче и Стево му го продадоа. На 8 мај нема уценети и поткупени. Никој повеќе не им се плаши, ниту ги сака нивните гнасни пари. Сите до денар ќе му го вратат на народот, како што ќе му ја вратат и државата. Доста долго остана во нивно заложништво. Нема повеќе сила, ниту пара која ќе го сокрие криминалот на ДУИ и СДСМ. Време е за слобода и правда. Време е за нов Претседател на Република Македонија и за нова Влада. Гласајте за професори а не за криминалци“, кажа Стојаноска.
Македонија
„За избор на Владата нема двојно гласање (Бадентер), тоа не е предвидено ниту со Уставот, ниту со било каков договор или закон“, вели Демократскиот сојуз
Демократскиот сојуз ги потсетува партиите, посебно ДУИ, но и сите граѓани, дека соглано член 99 од Уставот на Република Македонија, мандат за состав на Влада добива кандидатот на партијата/ партиите кои имат мнозинство (најмалку 61 пратеник).
„Владата ја избира Парламентот со мнозинство гласови од 120-те пратеници. Мнозинство се 61 пратеник. За избор на Владата нема двојно гласање (Бадентер), тоа не е предвидено ниту со Уставот, ниту со било каков договор или закон, ниту пак има таква пракса. Се работи за класична манипулација или непознавање на политичкиот систем и Уставните решенија за избор на Влада“, велат од Демократскиот сојуз.
„Сосема е извесно дека по 20 години на власт, недопирливите од ДУИ, ќе бидат испратени во долгогодишна опозиција и за грабежот што го направија и разнебитување на институциите и државата во целина ќе одговараат.
Наводната проевропска партија „ги отвори вратите на ЕУ“, при што за време на нивното владеење над 800 илјади граѓани од Македонија се иселија во земјите на ЕУ, меѓу нив и над 200 илјади Албанци.
Сите партии се изјаснија дека по изборите нема да коалицираат со ДУИ. Тоа е јасно за сите граѓани, затоа ќе гласаат за промени, а на ДУИ во опозиција ќе им се приклучи и СДСМ“, се додава во соопштението на Демократскиот сојуз.