Свет
Тајланд го легализира одгледувањето марихуана, владата донира садници

Одгледувањето и поседувањето марихуана во Тајланд од денеска е декриминализирано, а министерот за здравство на таа земја најави дека од утре ќе подели милион садници од ова растение, пренесува АП.
Тајланд е првата земја што донесе ваква одлука во Југоисточна Азија, регион познат по строгите закони за дроги, но употребата на марихуана за рекреативни цели сè уште не е дозволена.
Тајландската влада соопшти дека промовира канабис само за медицинска употреба, предупредувајќи ги оние кои сакаат забава, дека пушењето на јавно место сè уште може да се смета за кривично дело, со потенцијална казна од три месеци затвор и 25.000 тајландски бати (780 долари).
Владата се надева дека локалната трговија со канабис ќе придонесе за развој на земјоделството и туризмот, а за да ги поттикне жителите да го одгледуваат ова растение, одлучи да донира дури милион садници.
„Тоа е можност за луѓето и државата да генерираат приходи од марихуана и коноп. Ако ја имаме вистинската свест, канабисот е како злато, нешто вредно и треба да се промовира“, рече Анутин Чарнвиракул, вицепремиер и министер за здравство.
Клиниките ширум земјата можат послободно да нудат канабис како третман, а владата рече дека планот за легализација има за цел да ослободи околу 4.000 затвореници осудени за злосторства поврзани со канабис.
Статусот на марихуаната сè уште не е целосно законски дефиниран, бидејќи иако таа повеќе не се третира како опасна дрога, тајландските пратеници допрва треба да донесат закон со кој би се регулирала трговијата со марихуана, според АП.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Видео) Израел нападна воени згради во Техеран, објавени се снимки

Израел изврши воздушни напади врз Иран во текот на ноќта, насочени кон неговата нуклеарна програма и капацитетите за балистички ракети со долг дострел, објави израелското воено радио.
Министерот за одбрана Израел Кац рече дека нападот бил „превентивен“.
Израелските сили нападнаа десетици воени објекти низ Иран, вклучувајќи и еден округ во Техеран каде што се сместени високи команданти на Иранската револуционерна гарда, според извештаите на военото радио.
Израел прогласи вонредна состојба во земјата и го затвори својот воздушен простор, пренасочувајќи ги сите летови кон други земји, објавија израелските медиуми.
Иранските медиуми потврдија дека во и околу Техеран се слушнале повеќе експлозии. Иранската државна телевизија, исто така, објави дополнителни силни експлозии во различни делови од главниот град.
Иран ги суспендираше сите летови на аеродромот „Имам Хомеини“ во Техеран, објавија иранските државни медиуми.
Државниот секретар на САД, Марко Рубио, негираше дека Вашингтон имал каква било улога во „едностраните“ напади на Израел врз Иран и го повика Техеран да не ги таргетира американските интереси во регионот, поради шпекулациите дека Иран наскоро би можел да возврати.
Свет
Кого убија Израелците во нападот врз Иран? Воени шефови, нуклеарни научници…

Според иранските државни медиуми, неколку високи ирански воени функционери и нуклеарни научници беа убиени во израелската операција „Rising Lion“, чија цел беше да се спречи напредокот на нуклеарната програма на Иран.
Досега е потврдено дека следните лица се мртви:
Хусеин Салами, командант на Корпусот на Иранската револуционерна гарда (ИРГЦ)
Голамали Рашид, командант на Генералштабот на Хатам-ал Анбија
Ферејдун Абаси, нуклеарен научник и поранешен шеф на Организацијата за атомска енергија на Иран
Мохамед Мехди Техранчи, нуклеарен физичар поврзан со програмата за развој на нуклеарно оружје на Иран
Мохамед Багери, началник на Генералштабот на иранските вооружени сили
Исто така, според ирански извори, Али Шамхани, висок советник на врховниот лидер ајатолахот Али Хамнеи, беше сериозно повреден.
Свет
Израелскиот министер за одбрана: Ова е клучен момент во историјата на Израел

Израелскиот министер за одбрана Израел Кац изјави непосредно пред почетокот на нападот врз Иран дека ова е „клучен момент во историјата на Државата Израел и во историјата на еврејскиот народ“.
„По преземањето на функцијата, спречувањето на нуклеарната програма на Иран го направив апсолутен приоритет“, рече Кац, додавајќи дека „Иран е порешителен од кога било да ја реализира својата визија за уништување на Израел“.
Тој додаде дека Израел е во „критична точка“ и предупреди: „Ако ја пропуштиме, повеќе нема да имаме начин да го спречиме Иран да добие нуклеарно оружје што би го загрозило нашето постоење“.
Тој заклучи дека Израел дејствувал против сојузниците на Иран во регионот во изминатите година и пол, но дека сега „се справува со главата на змијата“.