Цените во маркетите продолжуваат да се искачуваат до нереално високи нивоа, а зголемувањата достигнаа и до 60 отсто. Овие астрономски цени не се само рекорди, туку и показател за неуспехот на актуелната влада во управувањето со економијата, дури и во најтешките периоди како што беше енергетската криза, велат од СДСМ.

„Како што предупредувавме, мерката за замрзнување на маржите се покажа како краткорочна и неефикасна. СДСМ веќе од почетокот ги истакна нашите сомнежи дека оваа мерка нема да донесе долгорочни резултати, што се потврди со зголемените цени.

Овие растечки цени се резултат на погрешните владини политики и неспособноста на Владата на ДПМНЕ да ги менаџира цените на основните производи. Секоја мерка што ја презела оваа влада до сега се соочува со неуспех. Ниту т.н. есенска и новогодишна кошничка, не успеа да го подобри животниот стандард на граѓаните. Напротив, растот на цените не престана!

Владата не ја прифати нашата иницијатива за пакет од седум закони и решенија. Со нашата иницијатива, само со укинувањето на ДДВ на храната, реално ќе се намалеа цените на повеќе од 250 производи, што ќе значеше значително олеснување за граѓаните.

За жал, помина цела година и овој неуспех на владата доведе до огромна штета за стандардот на граѓаните кои се во тешка ситуација и едвај врзуваат крај со крај. Власта треба да се соочи со реалноста и да ја смени својата неефикасна политика, за да ги заштити интересите на граѓаните и да се спречи понатамошно зголемување на цените, потенцираше портпаролката на СДСМ Богданка Кузеска во одговорот за новинарско прашање на денешната прес-конференција.

Безбедноста на граѓаните е сериозно загрозена. Македонија гори од насилство, убиства по улици, криминал и безредие. Вчерашното убиство во Штип дополнително ја вознемири јавноста. Дивеење како на филм, за на крај да слушнеме за убиство на уште еден млад човек, изјави Богданка Кузеска, портпаролка на СДСМ.

Таа праша како е возможно турски државјанин да поседува пиштол, чие е возилото со кое бегал и пукал дури и на патарина и кој го дозволил ова безредие или најточно кажано анархија?

Според неа, на македонските улици се случува општ хаос.

„Нема ден, а да нема убиство, тепачка – граѓаните стравуваат за својата безбедност – не е сигурно ниту на улица, ниту во кафе бар, ниту дома. Вчерашното убиство во Штип, во кафе бар, е само последно во низата убиства што се случија изминатава година и тоа јавно пред сведоци. Ова е доказ дека министерот за внатрешни работи Тошковски ја губи контролата врз безбедноста на државата“, изјави Кузеска.

Според неа, Тошковски не само што нема капацитет да се справи со криминалот и да ја гарантира безбедноста на граѓаните – туку и дозволува негово слободно ширење на улиците, па дури во полициските станици.

„За 10 месеци Македонија се претвори во Див Запад. Серија убиства се случија само во Скопје – убиство во Мавровка, Бит Пазар, Чаир, Шуто Оризари. Македонија се соочува со безбедносна криза. Министре Тошковски, уште убиства е потребно да се случат за да ви пропаботи совеста и да превземете одговорност.“, изјави Кузеска и додаде дека СДСМ бара целосно расветлување за убиство во Штип и одговорност за секој друг нерешен случај.

РЕК Битола секој ден се уништува, производството се намалува, а работниците работат во услови опасни по живот. Комбинатот работи само со еден блок – Блок 3, а и тој не се знае колку ќе издржи оти има сериозни проблеми, тврди СДСМ.

„Пред извесно време се случи експлозија во командата на отпепелување на Блок 3 во која изгореа трафостаниците што ги снабдуваат со струја траките за отпепелување. За гаснење на пожарот се искористија над 20 противпожарни апарати, а предизвикана е огромна штета. Наместо итно да се оспособат трафостаниците, дел од машините се поврзани на продолжен кабел и од него добиваат струја за работа“, велат од партијата.

Од таму наведуваат дека работниците се принудени рачно да работат се што треба и не треба и секој ден животот им е во опасност, но, како што велат од СДСМ, принудени се да молчат заради закани и притисоци од шефовите.

„Директорите и новопечените советници во РЕК Битола знаат за оваа работа и ништо не преземаат. Тие што тврдеа дека ќе го накренат РЕК Битола кога ќе дојдат на власт, се гробарите на комбинатот. Отпепелувањето на Блок 3 не работи, турбината на Блок 1 има девијација и блокот е надвор од функција, нема абер од ремонти. Во РЕК Битола ситуација никогаш не била полоша“, велат од СДСМ.