Свет
Египет, Турција и Саудиска Арабија сакаат да станат членови на групата предводена од Русија
Претседателот на БРИКС, меѓународната асоцијација на економии во развој, Пурнима Ананд денеска изјави дека Турција, Египет и Саудиска Арабија сакаат да се приклучат на оваа група што ја сочинуваат Бразил, Русија, Индија, Кина и Јужна Африка.
Ананд изјави дека одлуката за прием на некои од земјите може да се донесе за време на следниот самит на организацијата во 2023 година. Таа истакна дека претставниците на земјите од БРИКС разговарале за можни нови членки за време на нивниот последен самит во Пекинг, кој се одржа во виртуелен формат на 23 и 24 јуни.
„Сите овие земји покажаа интерес за приклучување и се подготвуваат да аплицираат за членство. Мислам дека тоа е добар чекор бидејќи проширувањето секогаш се перципира позитивно, ќе го зајакне влијанието на БРИКС во светот“, рече Ананд изразувајќи надеж дека приемот на нови членови ќе се случи многу бргу бидејќи сите претставници на земјите што го сочинуваат јадрото на оваа асоцијација заинтересирани за проширување.
Ананд изјави дека членството на Турција, Египет и Саудиска Арабија треба да се случи бргу бидејќи процесот веќе е во тек истакнувајќи дека приклучувањето во организацијата нема да се случи истовремено.
Претходно, Иран и Аргентина исто така поднесоа барања за приклучување кон организацијата, пренесе „Блиц.рс“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
(Видео) Камала Харис: Путин може да ја заврши војната утре
По претставувањето на неговиот план за победа пред Бајден во Белата куќа, украинскиот претседател Володимир Зеленски одржа прес-конференција со демократската претседателска кандидатка Камала Харис.
Американската потпретседателка почна со ветување за поддршка на Украина во нејзината борба против Русија и дека ќе продолжи да го прави тоа доколку биде избрана на претстојните избори.
Таа рече дека Америка мора да се спротивстави на агресорите како рускиот претседател Владимир Путин.
Харис предупреди дека другите потенцијални агресори ќе следат што се случува во Украина и дека мора да им се покаже дека постапките на Путин не се прифатливи.
Додаде дека Путин утре би можел да ја заврши војната доколку ја повлече војската од Украина.
„Украина се спротивстави на руската агресија и денес Киев е слободен и силен“, рече Камала Харис.
„Претседател Зеленски, разбирам. Путин ја започна оваа војна и може да ја заврши утре ако едноставно ја повлече својата војска од украинската суверена територија“.
Без да го именува директно, Камала Харис го повика својот противкандидат на претстојните избори, републиканскиот кандидат Доналд Трамп, велејќи дека има некои луѓе во Америка кои ќе бараат Украина да прифати неутралност и да се откаже од безбедносните односи со другите нации.
„Ова не се предлози за мир. Наместо тоа, тие се предлози за предавање“, додаде таа.
Свет
Палестинскиот претседател повика на прекин на огнот во Газа и Либан
Палестинскиот претседател Махмуд Абас повторно повика на прекин на израелската офанзива на Појасот Газа и побара запирање на испораката на американско оружје за Израел.
Абас излезе на говорницата на Генералното собрание на Обединетите нации во Њујорк и, пред официјално да им се обрати на делегатите, трипати ги повтори зборовите „нема да заминеме“, мислејќи на палестинската определба да не бидат принудени да ја напуштат Палестина среде војната во Газа и нападите од израелски доселеници на окупираниот Западен Брег.
Тој постојано го критикуваше Израел, велејќи дека тој врши геноцид во Газа, кој според него сега се подготвува и за Либан.
Во жестоките забелешки до Вашингтон, кој ја поддржува Палестинската управа што тој ја предводи, Абас го критикуваше континуираното снабдување со американско оружје за Израел, истовремено блокирајќи ги резолуциите на Советот за безбедност на ОН кои повикуваат на прекин на огнот претходно во конфликтот.
Тој не ги спомна Хамас, лутите ривали на секуларната партија Фатах предводена од Абас, но се осврна на нивните напади врз Израел на 7 октомври и рече дека го осудува убиството на цивилите од двете страни.
Свет
Ердоган: Израелските напади врз Либан ќе продолжат се додека Западот молчи
Турскиот претседател Реџеп Таип Ердоган изјави дека израелските напади врз Либан ќе продолжат се додека Западот молчи.
Ројтерс јавува дека Ердоган разговарал со турски новинари во Њујорк пред да го напушти Генералното собрание на ОН.
Се наведува дека турскиот лидер рекол дека воздушните напади на Израел врз Либан се доказ дека се обидува да се прошири војната од Газа во поширокиот регион, додавајќи дека ОН се немоќни да го запрат.
„Додека светот молчи и западните земји го поддржуваат израелското раководство со оружје, овие масакри, за жал, ќе продолжат. Ние го истакнавме тоа на нашите состаноци“, рече турскиот претседател.