Македонија
(Видео) Николоски: Додека прават бугаризација, не забораваат да крадат
„Треба неколку работи да разјасниме пред македонската јавност. Прво, зошто сме денес овде и зошто сме како држава доведени во оваа ситуација. Доведени сме овде и во оваа ситуација затоа што на едната страна ја имаме Бугарија, која максимално ги штити сопствените национални интереси и позиции, кои не се од вчера, туку се истите од пред 150 години и се многу едноставни. И, според Бугарија, на оваа територија живее доминантно бугарско население, кое зборува дијалект на бугарскиот јазик. Тоа е една национална стратегија, која е на Бугарија веќе 150 години. А од другата страна имаме Влада што е длабоко влезена во криминал и корупција и на која единствено ѝ треба сликање за да продолжи неколку дена мандат“, истакна Александар Николоски, пратеник од редовите на ВМРО-ДПМНЕ на денешната собраниска седница.
Тој додаде дека додека во моментот пратениците во парламентот разговараат и дебатираат, во РЕК „Битола“ се местат тендери во корист на власта.
„Додека ние во моментот разговараме, во РЕК ‘Битола’ се подготвува анекс на тендерот во четири очи, кој беше доделен околу Нова година во вредност од 28 милиони евра. Значи, на 28 милиони евра тендер доделен во четири очи, додека ние разговараме овде, подготвуваат анекс, како што вчера ви стигна материјал дека ќе се гласа за задолжување за ЕЛЕМ во вредност од 100 милиони евра за дополнително таму да се прави криминал и корупција. Значи, додека јавноста се занимава со ова, паралелно криминалот и корупцијата си течат и затоа им треба уште некое сликање“, нагласи Николоски.
Посочи да нема манипулација со јавноста бидејќи преговарачката рамка ја усвојува Владата.
„И на оваа преговарачка рамка од Владаа кажаа ‘да’ уште во средината на јуни кога претставници на Министерството за надворешни работи и кабинетот на претседателот Макрон доаѓаа тука во Скопје неколкупати и се среќаваа со нив. И од оваа преговарачка рамка тие не може да мрднат затоа што кажале ‘да’. Оваа преговарачка рамка или се усвојува или се отфрла. И едното и другото може да го направи Владата, а не Собранието. Овде седиме два дена и веројатно и ќе седиме уште некој ден од причина што сакаат да си ја исперат совеста пред јавноста и да излезат во јавноста и да речат – еве, Собранието одлучи“, потенцира Николоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Времето денес променливо облачно со сончеви периоди
Времето денес ќе биде променливо облачно време со сончеви периоди и со локална појава на пороен дожд и грмежи.
Наместа процесите ќе бидат во форма на невреме со интензивен пороен дожд (поголема количина за кратко време), силен ветер и изолирана појава на град. Минималната температура ќе биде во интервал од 11 до 18, а максималната ќе достигне од 27 до 34 степени. УВ=7
Во Скопје променливо облачно со сончеви периоди и со слаб до умерен ветер од јужен правец. Во делови од котлината ќе биде нестабилно со пороен дожд, грмежи и засилен ветер. Минималната температура ќе се спушти до 16, а максималната ќе достигне до 31 степен, јавува УХМР.
Во наредните денови се очекува сончево и топло време со мала до умерена облачност и со слаб до умерен ветер, во вторник од западен, а потоа од северен правец. Во попладневните часови ќе има услови за ретка појава на пороен дожд и грмежи.
Македонија
Делови од Радишани и Волково без струја
ЕВН Македонија АД извести дека н 3 јуни ( понеделник ) без електрична енергија ќе останат:
– во периодот од 09.00 до 15.00 часот, корисниците од Волково лоцирани на потегот од кружниот тек кон село Кучково. (општина Ѓорче Петров )
– во периодот од 11.00 до 13.00 часот, корисниците од ул. Ѓоре Ѓоревски, лоцирани на третиот влез во населба Радишани. (општина Бутел )
Македонија
„Простор за разговор“ во Охрид
Вечерва со почеток во 20 часот, ХЕРА – Асоцијација за здравствена едукација и истражување во соработка со Интерарт културниот центар организира настан „Простор за разговор“ во Младинскиот центар во Охрид, за зајакнување на родовата еднаквост.
Настанот е дел од проектот „Простор за разговор“ со кој преку уметност, танц, театар и филм сплотени во еден перформанс целта е да се зајакне чувството на припадност кон заедницата, да се искоренат стереотипите и да се зајакнат младите, маргинализираните и лицата во социјален ризик.
„Простор за разговор“ се состои од краток филм и танцов перформанс, кои претставуваат уметничка рефлексија на темата и ќе бидат изведени од танчерите на Скопје танцовиот театар. По перформансот ќе има разговор на темата за родова еднаквост со публиката, со цел справување на проблемите на младите. Поканети се социолози, активисти и психолози, кои ќе говорат за тоа, каде сме и што треба понатаму да направиме во однос на социјалната положба и родовата еднаквост.
На 4. јуни (вторник) настанoт се одржува во Струга во Домот на културата во 12 часот, со што завршуваат низата перформанси што се одржаа изминатите 10 дена во шест градови низ државата.
Проектот „Простор за разговор“ е поддржан од Германија преку Германското друштво за меѓународна соработка (ГИЗ) во рамки на регионалниот проект за социјално вклучување на ранливи групи во Западен Балкан.