Нема да има подобар договор ниту нови условувања, да донесеме одлука со која сите ќе се гордееме, кажа Димитар Ковачевски на 06.08.2023 година. Ова е извадок од соопштение од СДС од нивната официјална страница. Од овде се гледа дека СДС свесно лажеше, вели Валентин Манасиевски, член на ЦК на ВМРО-ДПМНЕ.

„Денес 23.04.2025 година, нецели две години потоа, министерот за надворешни работи на Бугарија лично кажа дека со промената на Уставот, нема да завршат бугарските барања.

Дополнително еврокомесарката Марта Кос, кажа дека не може да потврди дека нема да има нови блокади заради билатерални прашања.

Двете тези на СДС со кои ги лажеа граѓаните дека нема да има нови барања од Бугарија, и втората дека нема да има блокади заради билатерални прашања се побиени“, додава тој.

СДС, според него, ја донесе државата до ќорсокак. Оценува дека лошите политики, кусогледоста и немањето визија денес не чинат и преговарачки позиции и углед.

СДС, вели Манасиевски, треба да се извини за грешките кои ги направија со Бугарија. Штетите, како што рече, се преголеми.

Министерот за животна средина и вицепремиер Изет Меџити очекува министерот за здравство Арбен Таравари и лидер на Алијансата за Албанците, како што ја напушти коалицијата „Влен“ за претстојните локални избори, да ја напушти и Владата. Меџити вели дека синоќа имале седница на Владата, на која, покрај за реализација на програмите и проектите, разговарале и за политичката ситуација.

„’Влен’ нема никакви дилеми, продолжува во таа насока за што и ги побара тие 107 илјади гласа како победник во албанскиот кампус. Како што ветивме – донесовме промена, ротација, плурализам и демократија во албанскиот кампус. Ние стоиме цврсто на тој пат. Тука е проблем господинот Таравари. Ние одлучивме дека ‘Влен’ ќе биде едно, ќе се стопат сите политички партии во ‘Влен’ оти тоа го бараат нашите гласачи. Второ, одлучивме дека и соработка со ДУИ и останување во ‘Влен’ не е можно и мислам дека и соработка со ДУИ и дел од Владата не штима, не оди.  Тоа е нашиот политички став, ист ќе биде и на 29 април и на 1 мај. Нема логика да се соработува со ДУИ и да се биде дел од Владата“, рече денес министерот Меџити по обраќањето на Форумот за енергетика и технологија помеѓу Чешка и Северна Македонија.

Според него, Меџити треба да се определи. Има легитимно право да соработува со ДУИ, но треба да не се срами, да го објави тоа и да премине во тој табор.

Меџити не одговори конкретно на прашањето дали од премиерот Христијан Мицкоски ќе побара Тарвари да ја напушти Владата, но потврди дека е можна средба меѓу нив, на која, без разлика на кој датум ќе се одржи, политичкиот став на „Влен“ ќе биде ист.

Спојувањето на партиите што сега се дел од коалицијата „Влен“, со исклучок на Алијансата за Албанците, е во тек. Меџити извести дека претседателството ќе има 23 члена и дека неговото име е меѓу оние што се споменуваат како кандидати за лидери.

Реформите во правосудниот сектор се најитни. Без нив, сите други реформи се безвредни, изјави премиерот Христијан Мицкоски. Според него, нема европско општество ако обвинителот избира по кого ќе отвори предмет, а по кого ќе премолчи, ако судот носи пресуди по избор на политички центри, а не по Уставот и законите и ако граѓанинот ја губи довербата дека ќе добие правда.

Мицкоски рече дека одговорност на политичарите е да создадат услови за целосна деполитизација на судството, заштита на обвинителите и судиите од политички и бизнис-притисоци, но и поинакви механизми за надворешен надзор и отчетност и вистинска, а не формална поддршка на институциите за борба против корупцијата.

Премиерот рече дека секој народ има моменти кога мора да избере дали ќе остане во удобната стагнација или ќе се соочи со потребата од длабоки и храбри промени.

„Државата е токму во еден таков момент – на раскрсницата помеѓу стариот систем и новата европска иднина. Планот за раст и реформската агенда не се само услов за интеграција. Таа е инструмент за оздравување на нашето општество. Интеграциите и растот се наш компас, но реформите мора да бидат наши одлуки, наши политики, наше национално зреење“, рече премиерот.

Според него, корупцијата е системски проблем, не индивидуална девијација.

„Да бидеме отворени и искрени – корупцијата кај нас не е само појава, таа е дел од начинот на функционирање на одредени делови од општеството. Таа е систем што се штити сам себе. Ако сакаме во Европската Унија, ако сакаме раст, мора да го урнеме тој систем. Имаме наследени ситуации во кои граѓанинот се чувствува понижен, беспомошен, принуден да плати за да добие – било тоа лекарска помош, правна заштита или некаква административна услуга. Таква држава не може да напредува. А уште позагрижувачки е што институциите, кои треба да се борат против корупцијата – Обвинителството и судството, честопати се неми, неефикасни или, пак, под политичко влијание“, истакна Мицкоски.